স্বাৰ্থসিদ্ধিৰ বাবে হিন্দুত্বৰ ৰাজনীতি কৰি আছে বিজেপিয়ে। কেৱল হিন্দু মুছলিমৰ মাজত বিভাজন অনাৰ বাবেই বিজেপিয়ে কাম কৰি আছে। এইদৰে পুনৰ পুৰণি মিত্ৰ বিজেপিক ক্ষুৰধাৰ সমালোচনা কৰিছে শিৱসেনাই।
আনকি হিজাব বিতৰ্কৰ দৰে বিষয়সমূহেৰে বিজেপিয়ে দেশক ১৯৪৭ চনৰ দেশ বিভাজনৰ সময়লৈ লৈ যোৱা বুলিও কটাক্ষ কৰে মহাৰাষ্ট্ৰৰ শাসনাধীষ্ঠ দলটোৱে।
দলটোৰ মুখপত্ৰ সামনাৰ শেহতীয়া সংখ্যাৰ সম্পাদকীয়ত এইদৰে প্ৰকাশ পাইছে। বিজেপিৰ হিন্দুত্ববাদক শিৱসেনাই নব্য-হিন্দুত্ববাদ আখ্যা দিছে।
সম্পাদকীয়টোত কাশ্মীৰি পণ্ডিত, নিবনুৱা সমস্যা. মূল্যবৃদ্ধি, চীনৰ ভাবুকি আৰু মোদী চৰকাৰৰ ভূমিকাকো সমালোচনা কৰিছে। জনমানসৰ পৰা এইসমূহ আঁতৰাই ৰাখিবলৈকে বিজেপিয়ে ধৰ্মৰ নামত ৰাজনীতি কৰা বুলি মুখপত্ৰখনত প্ৰকাশ পাইছে।
উল্লেখযোগ্য যে শেহতীয়াকৈ অহৰহ বিজেপিক কটাক্ষ কৰি আহিছে শিৱসেনাই। কিছুদিন পূৰ্বে ঠাকৰেই কৈছিল যে নিজকে হিন্দুৰ ৰক্ষাকাৰী বুলি দাবী কৰি আহিলেও প্ৰকৃততে বিজেপিৰ হিন্দুত্ববাদ ভুৱা! ক্ষমতাৰ বাবে কৰা বিজেপিৰ এয়া এখন নাটক।
ব্ৰিটিছে যিদৰে দেশবাসীৰ দাসত্ব জাপি দিছিল, তেনেধৰণে বিজেপিয়েও সেই পৰিৱেশ ঘূৰাই আনিব বিচাৰিছে বুলিও অভিযোগ কৰিছিল ঠাকৰেই। লগতে প্ৰকৃত হিন্দুৱে কেতিয়াও ইয়াক গ্ৰহণ কৰিব নোৱাৰে বুলি তেওঁ মন্তব্য কৰিছিল।
আনহাতে, বিজেপিৰ দৰেই শিৱসেনাইও হিন্দুত্ববাদত বিশ্বাস কৰে। দলটোৰ প্ৰতিষ্ঠাপক বাল ঠাকৰেৰ আদৰ্শৰ বিষয়ে সকলো জ্ঞাত। কিন্তু নৰেন্দ্ৰ মোদী প্ৰধানমন্ত্ৰী হোৱাৰ পাছৰে পৰা দলটোৱে বিজেপিৰ বিৰুদ্ধাচাৰণ কৰিবলৈ আৰম্ভ কৰে।
২০১৯ চনৰ মহাৰাষ্ট্ৰ বিধানসভা নিৰ্বাচনত দলটোৱে সম্পূৰ্ণ বিপৰীত আদৰ্শৰ এনচিপি আৰু কংগ্ৰেছৰ সৈতে মিত্ৰতা কৰে। বৰ্তমান দলটোৱে মোদী চৰকাৰৰ চৰম বিৰোধী হিচাপে নতুন পৰিচিতি লাভ কৰিছে।