উত্তৰ প্ৰদেশৰ এটা কোচিং চেণ্টাৰৰ ভিতৰত ভয়ংকৰ বিস্ফোৰণৰ ঘটনা সংঘটিত হৈছে। এই ঘটনাত কমেও দুজন নিহত হৈছে। আহত আন সাতজন। উত্তৰ প্ৰদেশৰ ফাৰুখাবাদত শনিবাৰে সংঘটিত হয় এক চাঞ্চল্যকৰ ঘটনা।
এই ঘটনাটোৱে যথেষ্ট উত্তেজনাৰ সৃষ্টি কৰিছে। অঞ্চলটোত আতংক বিয়পি পৰে। বিস্ফোৰণৰ খবৰ পাই ক্ষীপ্ৰতাৰে সেই স্থানত উপস্থিত হয় বৃহৎ আৰক্ষী বাহিনী।
এই বিস্ফোৰণ কেনেকৈ সংঘটিত হ’ল সেয়া এতিয়াও স্পষ্ট হোৱা নাই। অৱশ্যে কোচিং চেণ্টাৰৰ বেছমেণ্টত আছে চেপ্টিক টেংক। আৰক্ষীৰ প্ৰাৰম্ভিক ধাৰণা যে তাত ঘন মিথেন থকাৰ বাবেই বিস্ফোৰণ সংঘটিত হ’ব পাৰে। যদিও, বিস্ফোৰণৰ আঁৰত কূতাঘাতৰ কোনো সম্পৰ্ক আছে নে নাই সেই বিষয়েও তদন্ত চলি আছে।
স্থানীয় সূত্ৰৰ পৰা জানিব পৰা মতে, প্ৰতিদিনে ছাত্ৰ-ছাত্ৰী পঢ়া-শুনা কৰিবলৈ এই কোচিং চেণ্টাৰলৈ আহে। শনিবাৰে হঠাৎ বিস্ফোৰণৰ শব্দত অঞ্চলটো জোকাৰি যায়। সংঘটিত হয় এক ৰক্তাক্ত ঘটনা। এই খবৰ পোৱাৰ পিছতে আৰক্ষী আৰু অগ্নিনিৰ্বাপক বাহিনী উপস্থিত হয়। ঘটনাস্থলীলৈ যায় ফৰেনছিক বিষয়া। বিস্ফোৰণটো কেনেদৰে সংঘটিত হ’ল সেয়া নিশ্চিত কৰিবলৈও সেই স্থানৰ পৰা নমুনা সংগ্ৰহ কৰা হয়।
উত্তৰ প্ৰদেশৰ মুখ্যমন্ত্ৰী যোগী আদিত্যনাথে ইতিমধ্যে এই ঘটনাক লৈ শোক প্ৰকাশ কৰি ইয়াৰ তদন্তৰ বাবে বিতং পদক্ষেপ গ্ৰহণ কৰিছে। একে সময়তে আহতসকলৰ ক্ষিপ্ৰ চিকিৎসাৰ লগতে মৃতকৰ পৰিয়াললৈ সমবেদনা জ্ঞাপন কৰিছে।
কেৱল সেয়াই নহয়, মুখ্যমন্ত্রীয়ে মৃতকৰ পৰিয়ালৰ কাষত থিয় দিয়াৰ আশ্বাসো দিছে৷ আনহাতে, জানিব পৰা মতে, ঘটনাটো কেনেদৰে সংঘটিত হ’ল তাৰ সম্পূৰ্ণ তদন্তৰো নিৰ্দেশ দিছে।
