গাখীৰ-চেনি দিয়া চাহৰ অভ্যাস লাহে লাহে সলনি কৰি এতিয়া স্বাস্থ্য সচেতন লোকসকলে গ্ৰীন টি (Green Tea) বা অন্যান্য ভেষজ চাহৰ প্ৰতি আকৰ্ষিত হৈছে। বিশেষকৈ ওজন কমোৱা আৰু ৰক্তত শৰ্কৰাৰ পৰিমাণ (Sugar Level) নিয়ন্ত্ৰণত ৰখাৰ বাবে এনে চাহৰ চাহিদা বৃদ্ধি পাইছে। যদি আপুনিও আগন্তুক পূজা বা উৎসৱৰ বতৰৰ আগতে ওজন আৰু চুগাৰ নিয়ন্ত্ৰণ কৰিব বিচাৰিছে, তেন্তে আপোনাৰ দৈনন্দিন তালিকাত এই বিশেষ ‘নীল চাহ’ বা ব্লু-টি (Blue Tea) অন্তৰ্ভুক্ত কৰি চাব পাৰে।
দেখাত আকৰ্ষণীয় এই নীল চাহ প্ৰকৃততে অপৰাজিতা ফুলৰ পৰা প্ৰস্তুত কৰা হয়। সতেজ বা শুকান অপৰাজিতা ফুলৰ পাহি গৰম পানীত সিজাই এই স্বাস্থ্যসন্মত পানীয়বিধ তৈয়াৰ কৰা হয়। চিকিৎসাবিজ্ঞানৰ মতে, এই চাহ শৰীৰৰ বাবে অত্যন্ত উপকাৰী।
অপৰাজিতা ফুলৰ চাহ খোৱাৰ উপকাৰিতাসমূহ:
- ৰোগ প্ৰতিৰোধ ক্ষমতা বৃদ্ধি: অপৰাজিতা ফুলত ‘এন্থ’চায়ানিন’ (Anthocyanin) নামৰ এবিধ এণ্টি-অক্সিডেণ্ট থাকে, যিয়ে শৰীৰৰ ৰোগ প্ৰতিৰোধ ক্ষমতা বৃদ্ধি কৰে আৰু যিকোনো সংক্ৰামক ৰোগৰ আশংকা হ্ৰাস কৰে।
- মানসিক চাপ আৰু অৱসাদ দূৰ: স্নায়ৱিক ৰোগৰ আশংকা কমোৱাত এই চাহ অতি কাৰ্যকৰী। ইয়াক পান কৰিলে মানসিক চাপ, অৱসাদ আৰু বিষণ্ণতা দূৰ হয় বুলি দাবী কৰা হয়।
- ডায়েবেটিছ নিয়ন্ত্ৰণ: এই চাহত ৰক্তত গ্লুক’জৰ মাত্ৰা নিয়ন্ত্ৰণত ৰখাৰ গুণ আছে। সেয়েহে ডায়েবেটিছ ৰোগীসকলৰ বাবে এই চাহ অতি উপকাৰী।
- হজম শক্তি উন্নত কৰে: অপৰাজিতাৰ চাহে হজম প্ৰক্ৰিয়া উন্নত কৰে। পেট ফুলা, পেট গধুৰ লগা আৰু ভোক লগাৰ সমস্যা দূৰ কৰাত ই সহায়ক।
- ছাল আৰু চুলিৰ যতন: এই চাহত থকা ‘ফ্লেভনইড’ (Flavonoids) উপাদানে ছাল আৰু চুলিৰ স্বাস্থ্য ৰক্ষাত সহায় কৰে। বিশেষকৈ শুষ্ক ছাল আৰু চুলি সৰা সমস্যাত ভোগা লোকসকলে এই চাহৰ পৰা সুফল পাব পাৰে।
কেনেকৈ প্ৰস্তুত কৰিব অপৰাজিতা ফুলৰ চাহ?
প্ৰয়োজনীয় উপকৰণ:
- ৪-৫ পাহ সতেজ বা শুকান অপৰাজিতা ফুল
- ১ কাপ পানী
- ১ চামুচ মৌ
- সামান্য নেমুৰ ৰস
প্ৰস্তুত প্ৰণালী:
প্ৰথমে এটা পাত্ৰত এক কাপ পানী গৰম কৰি লওক। অপৰাজিতা ফুলকেইপাহ ভালদৰে ধুই উতলি থকা পানীত দি দিয়ক। পানীখিনি অলপ সময় উতলাৰ পিছত গেছ বন্ধ কৰি ৩ ৰ পৰা ৫ মিনিট সময় পাত্ৰটো ঢাকি থওক। পানীখিনিৰ ৰং নীলা হোৱাৰ পিছত এখন চেঁকনিৰে চেকি লওক। এতিয়া তাত সামান্য নেমুৰ ৰস আৰু মৌ মিহলাই গৰমে গৰমে পান কৰক।
