গোৱালপাৰাত ব্ৰহ্মপুত্ৰৰ বুকুত যোৱা সোম আৰু মঙলবাৰে সংঘটিত দুয়োটা নাও দুৰ্ঘটনাতে পানীত ডুব যোৱাসকলৰ সন্ধান উলিওৱাত বিফল হৈছে এছদিআৰএফ আৰু নদী আৰক্ষী।
এছ দি আৰ এফ আৰু নদী আৰক্ষীৰ ২০জনীয়া দল এটাই বুধবাৰে ১মখন নাও ডুব যোৱা ৰাখালডুবিৰ পৰা ৫ কি.মি. ব্যাসাৰ্ধ্বজুৰি সন্ধান চলাই যদিও শিশুকে ধৰি সন্ধানহীন লোককেইজনক উদ্ধাৰ কৰাত বিফল হয়।
ব্ৰহ্মপুত্ৰৰ বুকুত বতাহ-ধুমুহাত পৰি ডুব যোৱা ১মখন নাৱৰ ১গৰাকী ডেৰ বছৰীয়া শিশু আৰু ২য় খন নাৱৰ পৰা ৭ বছৰীয়া এগৰাকী কন্যাকে ধৰি ৩৭ বছৰীয়া বিল্লাল হুছেইন নামৰ এজন লোক সন্ধানহীন হৈছিল।
উদ্ধাৰ অভিযানৰ সময়ত বুধবাৰে নৈৰ পাৰত অসংখ্য লোকৰ সমাগম হয়।
