আৰক্ষীয়ে আজি অৰুণাচল প্ৰদেশৰ এজন বিধায়কৰ ঘৰত ৰহস্যজনক অৱস্থাত মৃত্যু হোৱা অসমৰ লখিমপুৰৰ এগৰাকী ১২ বছৰীয়া কিশোৰীৰ মৃতদেহটো খান্দি উলিয়ায়।
ইটানগৰ সমষ্টিৰ বিধায়ক টেচি কাছোৰ ঘৰত বনকৰা হিচাপে থকা কিশোৰীগৰাকীৰ যোৱা ২০ মে’ত মৃত্যু হোৱাৰ পিছত মৃতদেহটো মৰণোত্তৰ পৰীক্ষা নকৰাকৈ দ’লহাট বাগিচাৰ তেওঁৰ ঘৰলৈ আনি পুতি থোৱা হৈছিল।
নেশ্যনেল কমিশ্যন ফৰ প্ৰটেকশ্যন অব চাইল্ড ৰাইটছ (NCPCR) আৰু শিশু অধিকাৰ সুৰক্ষাৰ অসম ৰাজ্যিক সমিতিৰ লগতে বিভিন্ন দল-সংগঠন আৰু স্থানীয় ৰাইজৰ আপত্তিৰ পিছত আৰক্ষীয়ে আজি মৃতদেহটো খান্দি উলিয়ায়।
উল্লেখযোগ্য যে ঘটনাৰ দিনা কিশোৰীগৰাকীৰ অভিভাৱকে খবৰ দিয়াৰ পিছতে আৰক্ষী আহি মৰণোত্তৰ পৰীক্ষা আৰু অন্যান্য যাৱতীয় আনুষ্ঠানিকতা নকৰাকৈ মৃতদেহ পৰিয়ালৰ হাতত চমজাই দিছিল।
আনহাতে কিশোৰীগৰাকীৰ মৃত্যুৰ কাৰণ সম্পৰ্কতো ৰাইজে সন্দেহ প্ৰকাশ কৰিছে।
কিশোৰীগৰাকীৰ মাক-দেউতাকে বিধায়ক টেচিৰ ঘৰত যোৱা প্ৰায় ৩ দশক ধৰি কাম কৰি আহিছে। কিশোৰীগৰাকীয়েও তাতে কাম কৰে।
ঘটনাৰ দিনাও কিশোৰীগৰাকী বিধায়কজনৰ ঘৰত প্ৰৱেশ কৰা দেউতাকে নিজ চকুৰে দেখিছিল। কিন্তু অলপ পিছতে তেওঁৰ জীয়েকে চিপ লৈ আত্মহত্যা কৰা বুলি খবৰ দিয়া হয়।
হতভগীয়া, সম্বলহীন মাক-দেউতাকে দুখ-শোকেৰে নিজৰ কন্যাৰ মৃতদেহ লৈ লখিমপুৰৰ দ’লহাট বাগিচালৈ আহে আৰু মৃতদেহটো সৎকাৰ কৰা হয়।
এই গোটেই প্ৰক্ৰিয়াটোত আৰক্ষীয়ে নিজৰ আনুষ্ঠানিকতা ৰক্ষাত অতি অৱহেলা কৰা বুলি জানিবলৈ দিয়ে NCPCR-ৰ সদস্যা ৰৌজী টাবাই।
“যেতিয়া আমি আৰক্ষী থানালৈ যাওঁ, এইটো গম পাওঁ যে মৃতদেহৰ মৰণোত্তৰ পৰীক্ষা কৰা নহ’ল। ঘটনাটোৰ কোনো ফটোগ্ৰাফিক এভিডেন্স ৰখা নহ’ল। যিখন কাপোৰেৰে চিপ লোৱা বুলি কোৱা হৈছে সেইখন জ্বলাই দিয়া হৈছে। মুঠতে বহুত নিয়ম ৰক্ষা কৰা হোৱা নাই”, টাবাই সংবাদ মাধ্যমৰ আগত কয়।
এই মৃত্যুৰ এটা পুংখাপুংখ তদন্ত কৰাৰ বাবে দাবী জনায় NCPCR আৰু ASCPCR-এ।
