চুবুৰীয়া ৰাজ্যৰ মেঘালয়ত কোভিড১৯ত আক্ৰান্ত হৈ মৃত্যু ঘটা প্ৰথমজন লোকৰ শৱদেহ সৎকাৰত বাধা প্ৰদান কৰিছে স্থানীয় লোকে।
ৰাজ্যখনৰ প্ৰথমজন ক’ৰ’নাত আক্ৰান্ত শ্বিলঙৰ বেথানি হাস্পতালৰ সঞ্চালক ডাঃ জন এল ছাইল’ ৰিণটাথিয়াঙ বুধবাৰে পুৱতি নিশা ২.৪৫ বজাত মৃত্যু ঘটে।
মেঘালয়ৰ ৰাজ্য চৰকাৰে বুধবাৰে সন্ধিয়া বিশ্ব স্বাস্থ্য সংস্থাই কোভিড১৯ত আক্ৰান্ত মৃতকৰ শেষকৃত্যৰ বাবে দিয়া নিৰ্দেশনা অনুসৰি ডাঃ ৰিণটাথিয়াঙৰ শৱদেহ সৎকাৰ কৰাৰ কাম আৰম্ভ কৰে।
সিদ্ধান্ত অনুসৰি শ্বিলঙৰ ঝালুপাৰা শ্মশানত শেষ কৃত্য কৰাৰ কথা আছিল।
কিন্তু ঝালুপাৰাৰ স্থানীয় লোকসকলে শৱদেহ সৎকাৰ কৰিলে অঞ্চলটোত ক’ৰ’না সংক্ৰমণ ঘটিব বুলি আশংকা কৰি শেষ কৃত্য সম্পন্ন কৰাত বাধা প্ৰদান কৰে।
স্থানীয় লোকৰ মতে ক’ৰ’নাত আক্ৰান্ত হৈ মৃত্যু হোৱা লোকৰ শৱদেহ সৎকাৰ কৰাৰ বাবে উক্ত শ্মশানখনত কোনো সুৰক্ষামূলক ব্যৱস্থা আৰু সা-সৰঞ্জাম নাই। যাৰ ফলত তাৰ পৰা এই মাৰাত্মক ভাইৰাছবিধ স্থানীয় লোকৰ শৰীৰলৈ সংক্ৰমণ ঘটিব পাৰে।
পূৱ খাচী পাহাৰীয়া জিলাৰ উপায়ুক্ত এম ডব্লিউ নংব্ৰিৰ সৈতে যোগাযোগ কৰাত জানিবলৈ দিয়ে যে তদাৰকৰ বাবে জিলা দণ্ডাধীশক দায়িত্ব দিয়া হৈছে।
জানিব পৰা মতে ডাঃ ছাইল’ ৰিণটাথিয়াঙৰ শৱদেহটো ৰি-ভোই জিলাৰ নাংফোৰ ওচৰৰ ছাইল’ৰ ফাৰ্ম হাউছৰ সমীপত এটা কফিন তৈয়াৰ কৰি সৎকাৰ কৰা হ’ব।
কিন্তু নংফোৰ স্ননোঙৰ দৰবাৰ কাৰ্যবাহী কমিটিয়ে সিদ্ধান্ত গ্ৰহণ কৰিছে যে ডাঃ ছাইল’ৰ ফাৰ্ম হাউছৰ সমীপত কোভিড১৯ত আক্ৰান্ত হৈ মৃত্যু ঘটা ডাঃ ছাইল’ৰ শৱদেহ সৎকাৰ কৰিবলৈ অনুমতি নিদিয়ে।
দৰবাৰৰ সদস্যসকলৰ মতে তাত সৎকাৰ কৰাৰ ফলত অঞ্চলটোত ক’ৰ’না ভাইৰাছ বিয়পি পৰিব।
