দেশত ল’কডাউন চলি থকাৰ মাজতে আজি বোকাখাত পৌৰসভাৰ পাঁচ বছৰীয়া কাৰ্যকালৰ অন্ত পৰে। চাৰিটা ৱাৰ্ডেৰে গঠিত বোকাখাত পৌৰসভাই এইখন সমিতিৰ কাৰ্যকালতে নগৰ সমিতিৰ পৰা পৌৰসভালৈ উন্নীত হৈছিল।
আজি কাৰ্যকাল সমাপ্তি হোৱা সমিতিৰ পৌৰপতি আছিল চিত্ৰা কাৰ্ডং। এওঁ নগৰখনৰ ১ নং ৱাৰ্ডক প্ৰতিনিধিত্ব কৰিছিল। সমিতিখনৰ উপ পৌৰপতি আছিল সঞ্জীৱ শইকীয়া আৰু এওঁ নগৰৰ ৩ নং ৱাৰ্ডক প্ৰতিনিধিত্ব কৰিছিল। বাকী দুজন ৱাৰ্ড মেম্বাৰ আছিল ২ নং ৱাৰ্ডৰ পিকংলা ছেত্ৰী আৰু ৪ নং ৱাৰ্ডৰ ৰাণাদেৱ নাথ।
চিত্ৰা কাৰ্ডং আৰু সঞ্জীৱ শইকীয়াই বেচৰকাৰী সংগঠন বোকাখাত নিৰ্মাণ গোটৰ পৰা নিৰ্বাচিত হোৱাৰ বিপৰীতে ৰাণা দেৱ নাথে বিজেপি আৰু পিংকলা ছেত্ৰীয়ে কংগ্ৰেছৰ পৰা নিৰ্বাচিত হৈছিল যদিও পৌৰপতি চিত্ৰা কাৰ্ডং আৰু উপ পৌৰপতি সঞ্জীৱ শইকীয়াই পৰৱৰ্তী সময়ত অগপত যোগদান কৰে।
আজি কাৰ্যকাল শেষ হোৱাৰ অন্তত পৰৱৰ্তী নিৰ্বাচন নোহোৱা পৰ্য্যন্ত বোকাখাতৰ ৰাজহ বিভাগৰ চক্ৰ বিষয়াৰ পৰিচালনাত চলিব পৌৰসভাখন। বিদায়ী পৌৰসভাখনৰ কাৰ্যকালত বোকাখাত নগৰ সমিতিৰ পৰা পৌৰসভালৈ উন্নীত হ’লেও চাৰিটা ৱাৰ্ডৰ পৰা ৮ বা ১০টা ৱাৰ্ডলৈ সম্প্ৰসাৰিত নহ’ল পৌৰসভাৰ পৰিসৰ ৷
আনহাতে পৌৰসভাখনৰ কৰ্মচাৰীসকলে ১৩ মাহৰ দৰমহা পাবলৈ আছে। ল’কডাউনৰ মাজতে কাৰ্যকাল শেষ হোৱাৰ বাবে বিদায় সভা আয়োজন নকৰি পৌৰসভাৰ কৰ্মচাৰীয়ে ঘৰে ঘৰে গৈ পৌৰসভাৰ সদস্যসকলক বিদায় সম্ভাষণ জনায়।
