বোকাখাত জিলা চুতীয়া জাতি সন্মিলন আৰু বোকাখাত মহকুমা চুতীয়া ছাত্ৰ সন্থাৰ যুটীয়া উদ্যোগত বোকাখাতৰ সাধনী ভৱনত ২০১৯ বৰ্ষৰ হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চুড়ান্ত পৰীক্ষাত ভাল ফলাফল কৰি মহকুমাটোলৈ গৌৰৱ কঢ়িয়াই অনা অৰ্ধশতাধিক কৃতী ছাত্ৰ-ছাত্ৰীক সম্বৰ্ধনা জনোৱা হয়।
সম্বৰ্ধনা অনুষ্ঠানৰ আৰম্ভনিতে বিশ্ব পৰিৱেশ দিৱসৰ লগত সংগতি ৰাখি বোকাখাতৰ জ্যেষ্ঠ সাংবাদিক ভৱেশ শইকীয়াই বৃক্ষ ৰোপন কৰে৷ সম্বর্ধনা সভাত সভাপতিত্ব কৰে বোকাখাত জিলা চুতীয়া জাতি সন্মিলনৰ সভাপতি প্রতাপচন্দ্র বৰাই৷ বোকাখাত জিলা চুতীয়া জাতি সন্মিলনৰ সম্পাদক প্রশান্ত শইকীয়াই আঁত ধৰা সম্বর্ধনা সভাখন উদ্বোধন কৰে দেউৰী চুতীয়া সাহিত্য সভাৰ অসমৰ সভাপতি প্রতাপ নেওগে৷
সভাৰ উদ্দেশ্য ব্যাখ্যা কৰে বোকাখাত মহকুমা চুতীয়া ছাত্ৰ সন্থাৰ সম্পাদক লাচিত কাকতিয়ে৷ নির্দিষ্ট বক্তা হিচাপে উপস্থিত থাকি মামনী মহন্তই ছাত্ৰ-ছাত্ৰী সকলৰ উদ্দেশ্যি ভাষণ প্ৰদান কৰে।
সম্বৰ্ধনাসভাখনত কৃৰ্তী ছাত্ৰ-ছাত্ৰীসকলৰ উপৰিও থাইলেণ্ডত অনুষ্ঠিত হৈ যোৱা শিশু মডেলিং প্ৰতিযোগিতাত শ্রেষ্ঠত্ব অর্জন কৰা বোকাখাতৰ বৰা গাঁৱৰ নিকিতা বৰাকো সম্বর্ধনা জ্ঞাপন কৰা হয়।
সম্বৰ্ধনা অনুষ্ঠানত প্রমীলা বৰুৱা সোৱৰণী চুতীয়া কৃতী শ্রেষ্ঠ বঁটা বোকাখাত শংকৰদেৱ শিশুবিদ্যা নিকেতনৰ ছাত্ৰী ডৰথী নেওগক প্ৰদান কৰা হয়৷
অনুষ্ঠানত বিশিষ্ট অতিথি হিচাপে উপস্থিত থাকে সদৌ গোলাঘাট জিলা চুতীয়া ছাত্ৰ সন্থাৰ সম্পাদক কুলেশ বৰা, বোকাখাত জিলা চুতীয়া জাতি সন্মিলনৰ উপ-সভাপতি লক্ষীপ্রসাদ মুদৈ, বোকাখাত টাউন হাইস্কুলৰ প্রধান শিক্ষক জীতেন শইকীয়া, বোকাখাত জিলা চুতীয়া জাতি সন্মিলনৰ প্ৰাক্তন সম্পাদক খগেন বৰা, বিশিষ্ট লেখক শিক্ষাবিদ গোলক চন্দ্র বৰা, বোকাখাত মহকুমা ছাত্র সন্থাৰ সম্পাদক গীতার্থ শইকীয়া, জে.ডি.এইচ.জি মহাবিদ্যালয়ৰ প্রাক্তন অধ্যাপক শৈলেন্দ্র তামুলী, বিশিষ্ট শিক্ষয়িত্রী বোধেশ্বৰী বৰা, বোকাখাত জিলা চুতীয়া জাতি মহিলা সন্মীলনীৰ সভানেত্রী চন্দ্ৰপ্ৰভা শইকীয়া ডেকাকে প্রমুখ্য কৰি ভালেসংখ্যক ব্যক্তি উপস্থিতি থাকে৷
