বম্বে উচ্চ ন্যায়ালয়ে শুকুৰবাৰে ভীমা কোৰেগাঁও গোচৰৰ অন্যতম অভিযুক্ত সক্ৰিয় সমাজকৰ্মী আনন্দ টেলটুম্বডেৰ জামিন মঞ্জুৰ কৰিছে। লাইভ ল’ৰ বাতৰি অনুসৰি বুম্বে উচ্চ ন্যায়ালয়ে টেলটুম্বডেক এক লাখ টকাৰ ব্যক্তিগত জামিন বণ্ডত অন্য দুই অভিযুক্তসহ জামিন প্ৰদান কৰে।
অৱশ্যে জামিন লাভ কৰিলেও অভিযুক্ত টেলটুম্বডে অহা এসপ্তাহলৈকে মুকলি আকাশলৈ অহাৰ সম্ভাৱনা নাই। উচ্চ ন্যায়ালয়ৰ এই ৰায়ৰ বিৰুদ্ধে ৰাষ্ট্ৰীয় তদন্তকাৰী সংস্থা(NIA) উচ্চতম ন্যায়ালয়ত আবেদন দাখিল কৰে। উচ্চতম ন্যায়ালয়ৰ ন্যায়াধীশ এ এছ গাডকাৰী আৰু মিলিন্দ যাধৱৰ বিচাৰপীঠে বোম্বে উচ্চ ন্যায়ালায়ৰ এই ৰায়ক এসপ্তাহৰ বাবে স্থগিতাদেশৰ নিৰ্দেশ দিয়ে।
উল্লেখ্য যে ২০১৮ চনত পুনেৰ সমীপৰ ভীমা কোৰেগাঁৱত সংঘটিত গোষ্ঠীগত হিংসাত্মক ঘটনাৰে জড়িত থকাৰ অভিযোগত গোৱা ইনষ্টিটিউট অৱ মেনেজমেণ্টৰ অধ্যাপক টেলটুম্বেকো গ্ৰেপ্তাৰ কৰা হৈছিল।
NIAৰ দাবী যে ২০১৭ চনৰ ৩১ ডিচেম্বৰত অনুষ্ঠিত এলগাৰ পৰিষদৰ আহ্বায়কসকলৰ ভিতৰত টেলটুম্বডেও আছিল আৰু সেই পৰিষদৰ পাছদিনাই ভীমা কোৰেগাঁৱত হিংসাত্মক পৰিৱেশৰ সৃষ্টি হৈছিল, য’ত এজন লোকৰ মৃত্যু হয়।
NIAই লগতে আনন্দ টেলটুম্বডেই নিজ ভাতৃ মিলিন্দ টেলটুম্বডেক মাওবাদী আন্দোলনত যোগদান কৰিবলৈ প্ৰেৰণা যোগোৱাৰো অভিযোগ উত্থাপন কৰে। যোৱা বছৰৰ ১৩ নৱেম্বৰত মহাৰাষ্ট্ৰৰ গাডচিৰোলি জিলাত নিৰাপত্তাৰক্ষীৰে হোৱা সংঘৰ্ষত নিহত ২৬ গৰাকী মাওবাদীৰ ভিতৰত মিলিন্দ টেলটুম্বডেও আছিল।
জামিন আবেদনত আনন্দ টেলটুম্বডে কয় যে তেওঁ মাওবাদী মতাদৰ্শৰ সমালোচনা কৰি আহিছে আৰু মৃত্যুৰ পূৰ্বে ২৫ বছৰ ধৰি ভাতৃৰ সৈতে কোনো যোগাযোগ কৰা নাছিল।
ইফালে ভীমা কোৰেগাঁও গোচৰৰ অন্যতম এগৰাকী অভিযুক্ত সমাজকৰ্মী গৌতম নৱলাখাক গৃহবন্দী কৰাৰ অনুমতিক প্ৰত্যাহ্বান জনাই NIA-ই উচ্চতম ন্যায়ালয়ত দাখিল কৰা আবেদনৰো আজি শুনানি গ্ৰহণ কৰা হয়।
উল্লেখ্য যে স্বাস্থ্যজনিত কাৰণত যোৱা ১০ নৱেম্বৰত উচ্চতম ন্যায়ালয়ে নৱলাখাক এমাহৰ বাবে গৃহবন্দী কৰি ৰখাৰ অনুমতি দিছিল। ৭০ বছৰীয়া নৱলাখাই কাৰাগাৰত উপযুক্ত চিকিৎসাৰ পৰা বঞ্চিত হোৱা বুলি দাবী কৰি জে’লৰ পৰা অন্য স্থানলৈ স্থানান্তৰিত কৰিবলৈ আবেদন জনাইছিল।
সৰ্বোচ্চ ন্যায়ালয়ে সমাজকৰ্মী গৌতম নৱলাখাক গৃহবন্দিত্বৰ বাবে অনুমতি প্ৰদান কৰিলেও আমোলাতন্ত্ৰিক বাধা আৰু NIA-ই দৰ্শোৱা বিভিন্ন আপত্তিৰ বাবে নৱী মুম্বাইৰ তালোজা কাৰাগাৰতে কাৰাৰুদ্ধ হৈ আছে।
যোৱা বুধবাৰে NIA-ই গৃহবন্দিত্বৰ কালত নৱলাখাই থাকিব বিচৰা বাসগৃহটো তিনিটা প্ৰৱেশ আৰু প্ৰস্থান পথ থাকিলেও তাত চিচিটিভি কেমেৰা নাই বুলি দাবী কৰে। ইয়াৰ পাছতে ন্যায়ালয়ে তেওঁৰ গৃহবন্দিত্ব স্থগিত ৰাখিছিল।
নৱলাখাৰ গৃহবন্দী কৰাৰ বাবে উচ্চতম ন্যায়ালয়ে নিৰ্ধাৰণ কৰা অন্যতম চৰ্ত আছিল ঘৰৰ প্ৰতিটো প্ৰৱেশ আৰু প্ৰস্থান পইণ্টত চিচিটিভি কেমেৰা থাকিব লাগিব। NIA-ই দাবী কৰে যে উক্ত অট্টালিকাৰ তলৰ মহলাটোত এটা ৰাজহুৱা পুথিভঁৰাল আছে যাৰ বাবে অভিযুক্তৰ ওপৰত সতৰ্ক দৃষ্টি ৰখাটো অতি কঠিন হ’ব। ইয়াৰ উপৰিও অট্টালিকাৰ স্বত্বাধিকাৰগৰাকী কমিউনিষ্ট পাৰ্টিৰ সম্পাদক হোৱাৰ বাবে NIA-ই নৱলাখাৰৰ গৃহবন্দিত্বক আপত্তি দৰ্শায়।