ভাৰতীয় জনতা পাৰ্টিৰ নেতৃত্বত কেন্দ্ৰীয় চৰকাৰে আদালতত মুখথেকেচা খালে। কেন্দ্ৰীয় চৰকাৰে গঠন কৰা ‘ফেক্ট চেক ইউনিট’ (FCU) অসাংবিধানিক বুলি ৰায় দিছে বম্বে উচ্চ ন্যায়ালয়ে। ন্যায়াধীশ অতুল চন্দুৰকাৰে কয় যে এই সংশোধিত নিয়ম সংবিধানৰ ১৪ আৰু ১৯ নং অনুচ্ছেদৰ পৰিপন্থী।
সংবাদ মাধ্যম বা ছ’চিয়েল মিডিয়াত চৰকাৰৰ বিৰুদ্ধে মিছা, অৰ্ধসত্য আৰু ভুৱা বাতৰি বা তথ্য ৰোধ কৰিবলৈ কেন্দ্ৰীয় চৰকাৰে ২০২৩ চনৰ এপ্ৰিল মাহত তথ্য প্ৰযুক্তি নিয়ম, ২০২১ সংশোধন কৰি এই ‘এফ চি ইউ’ গঠন কৰাৰ সিদ্ধান্ত লয়। মিছা, অৰ্ধসত্য, ভুৱা বা বিভ্ৰান্তিকৰ বাতৰি চিনাক্ত কৰি সেই সন্দৰ্ভত বিহিত ব্যৱস্থা গ্ৰহণৰ দায়িত্ব দিয়া হৈছিল সংস্থাটোক। চৰকাৰৰ এই সিদ্ধান্তই বিতৰ্কৰ সৃষ্টি কৰিছিল। বিভিন্ন মহলে আপত্তি কৰি কৈছিল যে এইদৰে চৰকাৰে ছ’চিয়েল মিডিয়াৰ ওপৰত নিয়ন্ত্ৰণ স্থাপন কৰিব বিচাৰিছে।
বিশিষ্ট কমেডিয়ান কুনাল কামৰাই চৰকাৰৰ এই সিদ্ধান্তত স্থগিতাদেশ বিচাৰি বম্বে উচ্চ ন্যায়ালয়ত গোচৰ তৰে। তেওঁৰ অনুৰোধ আছিল যে নতুন নিয়ম আদালতে বৈধতা প্ৰদান নকৰালৈকে এফ চি ইউ গঠন স্থগিত ৰাখিব লাগে। লগতে উচ্চতম ন্যায়ালয়ৰ কাষ চাপিছিল। উচ্চতম ন্যায়ালয়ে কয় যে ইউনিট গঠন সন্দৰ্ভত কেন্দ্ৰীয় চৰকাৰে দিয়া অধিসূচনা বোম্বাই উচ্চ ন্যায়ালয়ত গোচৰ নিষ্পত্তি নোহোৱালৈকে কাৰ্যকৰী কৰিব নোৱাৰিব।
লগতে পঢ়কঃ ভয়ংকৰ আক্ৰমণৰ পৰিকল্পনা! ম্যানমাৰৰ পৰা মণিপুৰত অনুপ্ৰৱেশ ৯০০ উগ্ৰপন্থীৰ, সষ্টম সেনা
বম্বে উচ্চ ন্যায়ালয়ৰ বিভাগীয় বিচাৰপীঠে যোৱা জানুৱাৰী মাহত এই গোচৰৰ বিভাজিত ৰায় দিছিল। ন্যায়াধীশ গৌতম পেটেলে এই নিয়ম বাতিলৰ সপক্ষে ৰায় দিয়াৰ বিপৰীতে ন্যায়াধীশ নীলা গোখেলে এই নিয়মৰ সপক্ষে ৰায় দিয়ে। ন্যায়াধীশ পেটেলে কয়, এই নিয়ম চেঞ্চৰশ্বিপৰ সমান। অৱশ্যে ন্যায়াধীশ গোখেলে কয়, ইয়াৰ দ্বাৰা বাক স্বাধীনতাত কোনো বাধা আহিব নোৱাৰে। এই বিভাজনৰ বাবে গোচৰটো ‘টাইব্ৰেকাৰ’ ন্যায়াধীশৰ বিচাৰপীঠলৈ প্ৰেৰণ কৰা হয়। ন্যায়াধীশ অতুল চন্দুৰকাৰে নতুন নিয়ম অসাংবিধানিক বুলি ৰায় দিয়ে।
ন্যায়াধীশ চন্দুৰকাৰে কয় যে নিয়মত থকা ‘মিছা, ভুৱা, বিভ্ৰান্তিকৰ’ শব্দবোৰ বিহংগম দৃষ্টিৰে আৱৰা। সেই শব্দবোৰৰ সংজ্ঞা দিয়া হোৱা নাই।
কুনাল কামৰা (৩৫) ভাৰতৰ প্ৰতিষ্ঠিত ‘ষ্টেণ্ডআপ কমেডিয়ান’। তেওঁৰ কৌতুকবোৰত চোকা ৰাজনৈতিক কটাক্ষৰ সৈতে মিহলি হৈ আছে। তাৰ বাবেই তেওঁ ক্ৰমান্বয়ে বিজেপি আৰু উগ্ৰ হিন্দুত্ববাদী সমৰ্থকৰ চকুৰ কূটা হৈ পৰে। ২০১৩ চনত তেওঁৰ এটা অনুষ্ঠানৰ ভিডিঅ’ ছ’চিয়েল মিডিয়াত ভাইৰেল হোৱাৰ পাছত উগ্ৰ হিন্দুত্ববাদীয়ে তেওঁক হত্যাৰ ভাবুকি দিছিল। নৰেন্দ্ৰ মোডীৰ কাৰ্যকালতে বহু ৰাজ্যত তেওঁৰ কাৰ্যসূচী বলপূৰ্বকভাৱে বন্ধ কৰি দিয়া হৈছিল।
লগতে পঢ়কঃ পোখৰাণত অনুশীলনৰ সময়ত মৰ্টাৰ ফাটি আহত ৩ সেনা জোৱান, কাশ্মীৰত বাছ খাৱৈত পৰি শ্বহীদ ৩ জন
২০২০ চনত সাংবাদিক অৰ্ণব গোস্বামী কুনালৰ সহযাত্ৰী আছিল ব্যক্তিগত বিমান সংস্থাৰ ইণ্ডিগ’ বিমানত। কুনালে তেওঁৰ সৈতে মুখামুখি বিতৰ্কত বহিবলৈ আহ্বান জনায়। যেতিয়া সেই ভিডিঅ’ ভাইৰেল হৈছিল, তেতিয়া বিমান সংস্থাটোৱে চৰকাৰী পদক্ষেপত তেওঁক ছমাহৰ বাবে নিষেধাজ্ঞা আৰোপ কৰিছিল। পিছদিনা চৰকাৰী এয়াৰ ইণ্ডিয়াই তেওঁক আজীৱন নিষেধাজ্ঞা আৰোপ কৰিছিল।
তদানীত্বন অসামৰিক বিমান পৰিবহণ মন্ত্ৰী হৰদীপ পুৰীয়ে কৈছিল যে আন বিমান সংস্থাসমূহেও একে কাম কৰিব লাগে। সেই কথা শুনি ‘স্পাইচজেট’ আৰু ‘গ’ এয়াৰ’ইও একেই সিদ্ধান্ত লৈছিল। এই সন্দৰ্ভত বিতৰ্কই চৰম পৰ্যায়ত উঠিছিল। সেই কুনালে ‘এফ চি ইউ’ বাতিল কৰাই কেন্দ্ৰীয় চৰকাৰক শলঠেকত পেলালে।
