বম্বে উচ্চ ন্যায়ালয়ে মঙলবাৰে পুনেৰ ফাৰাহ দীবা নামৰ এগৰাকী মহিলাৰ বিৰুদ্ধে দাখিল কৰা এফআইআৰ বাতিলৰ আবেদন খাৰিজ কৰিছে। অভিযোগ অনুসৰি তেওঁৰ হাউছিং ছ’চাইটিৰ হোৱাটছএপ গ্ৰুপত ভাৰতীয় সেনাৰ অপাৰেচন সিন্দূৰৰ প্ৰশংসা কৰা এটা মেছেজত হাঁহিৰ ইমোজিৰে প্ৰতিক্ৰিয়া প্ৰকাশ কৰিছিল। ন্যায়াধীশ এ এছ গাডকাৰী আৰু ৰাজেশ পাটিলৰ বিচাৰপীঠে কয় যে তেওঁৰ এই কাৰ্য্যই ভাৰতৰ সাৰ্বভৌমত্ব, অখণ্ডতা আৰু ঐক্যক বিপদত পেলোৱা, গোটৰ মাজত শত্ৰুতা প্ৰসাৰ কৰা, জাতীয় সংহতিৰ বিৰুদ্ধে পক্ষপাতিত্বমূলক বক্তব্য, শান্তি ভংগৰ উদ্দেশ্যে ইচ্ছাকৃত অপমান আৰু ৰাজহুৱা উপদ্ৰৱৰ সৃষ্টিৰ অভিযোগৰ অধীনত প্ৰাথমিকভাৱে গোচৰ গঠন কৰে।
আদালতে উল্লেখ কৰে যে ৪৬ বছৰীয়া শিক্ষয়িত্ৰী ফাৰাহ দীবাই হোৱাটছএপত ভাৰতৰ পতাকা জ্বলোৱা আৰু প্ৰধানমন্ত্ৰী নৰেন্দ্ৰ মোদীক ৰকেটত থকা দৃশ্যৰ এটা ষ্টেটাছ পোষ্ট কৰিছিল, যাক আপত্তিজনক বুলি গণ্য কৰা হৈছে। তেওঁ ভাৰতক প্ৰতাৰক বুলি অভিহিত কৰি তেওঁৰ পিতৃ আৰু মাতৃৰ পৰিয়ালৰ পাকিস্তানী উৎপত্তিৰ কথা উল্লেখ কৰিছিল, যিয়ে তেওঁৰ “দোষী মন”ৰ ইংগিত দিয়ে বুলি আদালতে মন্তব্য কৰে। এই পোষ্টৰ ফলত তেওঁৰ হাউছিং ছ’চাইটিৰ বাসিন্দাসকলে প্ৰতিবাদ কৰি তেওঁৰ বিৰুদ্ধে আইনী ব্যৱস্থা গ্ৰহণৰ দাবী জনায়।
২০২৫ চনৰ ১৫ মে’ত পুনেৰ কলেপদল আৰক্ষী থানাত “সাথ সাথ মাৰ্গোছা লেডিজ” হোৱাটছএপ গ্ৰুপৰ এজন সদস্যৰ অভিযোগৰ ভিত্তিত এফআইআৰ দাখিল কৰা হয়। এই ঘটনা ৭ মে’ত ভাৰতীয় সেনাৰ অপাৰেচন সিন্দূৰৰ পিছত সংঘটিত হয়।
অভিযুক্ত মাহিলাগৰাকীয়ে যুক্তি দিছিল যে তেওঁ সেই সময়ত মানসিকভাৱে অস্থিৰ আছিল আৰু পোষ্টবোৰ আপত্তিজনক বুলি বুজি পোৱাৰ পিছত ক্ষমা বিচাৰি আঁতৰাই পেলাইছিল। লগতে তেওঁ শিক্ষকতাৰ চাকৰি হেৰুৱাৰ পেছাগত পৰিণতিৰ কথাও উল্লেখ কৰে। আদালতে এই যুক্তি নাকচ কৰি কয় যে স্নাতকোত্তৰ আৰু বি.এড. ডিগ্ৰীধাৰী শিক্ষিত ব্যক্তি হিচাপে তেওঁ নিজৰ কাৰ্য্যৰ প্ৰভাৱ আগতেই বিবেচনা কৰা উচিত আছিল। দেশে সেনাৰ সফলতা উদযাপন কৰি থকাৰ সময়ত তেওঁৰ পোষ্টৰ দ্বাৰা ক্ষতি কৰাৰ উদ্দেশ্য প্ৰকাশ পাইছে। তেওঁৰ মানসিক অৱস্থাৰ অজুহাত গ্ৰহণযোগ্য নহয় বুলি বিচাৰপীঠে জোৰ দিয়ে।
আদালতে ভাৰতীয় ন্যায় সংহিতাৰ ধাৰা ১৫২ (সাৰ্বভৌমত্ব বিপন্ন কৰা), ধাৰা ১৯৬ (শত্ৰুতা প্ৰসাৰ), ধাৰা ১৯৭ (জাতীয় সংহতিৰ বিৰুদ্ধে পক্ষপাতিত্ব), ধাৰা ৩৫২ (ইচ্ছাকৃত অপমান) আৰু ধাৰা ৩৫৩ (ৰাজহুৱা উপদ্ৰৱ)ৰ অধীনত দাখিল এফআইআৰ সমৰ্থন কৰে। লগতে আদালতে ইয়াৰ বাবে অধিক তদন্তৰ প্ৰয়োজন বুলিও উল্লেখ কৰে।
