কিছুদিনৰ অস্কাৰ জয়েৰে দেশৰ নাম উজ্বলাই তুলিছিল ‘দ্য এলিফেণ্ট হুইছপাৰাৰ্ছ’- এ। বিশ্ব দৰবাৰত সমাদৃত তথ্যচিত্ৰখনৰ এই সাফল্যত সমগ্ৰ দেশে প্ৰকাশ কৰিছিল আনন্দ। ছবিখনত অভিনয় কৰা দুই প্ৰধান চৰিত্ৰ তামিলনাডুৰ মাউত বোমন আৰু তেওঁৰ পত্নী বেলী উষ্ম প্ৰশংসিত হৈছিল।
অস্কাৰ জয়ৰ পিছত হাতত পুৰস্কাৰটি তুলি হাস্য বদনে ফটো তুলিছিল দুয়ো। পিছে সেই হাঁহিমুখীয়া ফটোখনৰ আঁৰত থাকি যোৱা আন এক বিষয় শেহতীয়াকৈ সমুখলৈ আনিছে বোমন-বেলীয়ে। দম্পতীহালে তথ্যচিত্ৰখনৰ পৰিচালক আৰু প্ৰযোজকৰ বিৰুদ্ধে উত্থাপন কৰিছে বিস্ফোৰক অভিযোগ।
ইতিমধ্যে বোমন-বেলীয়ে অস্কাৰ জয়ী তথ্যচিত্ৰখনৰ নিৰ্মাতা কাৰ্তিকি গনজালভেছলৈ জাৰি কৰি আইনী জাননী। পৰিচালক কাৰ্তিকি আৰু প্ৰযোজকে প্ৰতিশ্ৰুতি অনুসৰি প্ৰাপ্য ধন আদায় নিদিয়াৰ অভিযোগ তুলিছে বোমন-বেলীয়ে আৰু সেয়ে প্ৰেৰণ কৰা হৈছে আইনী জাননী।
আইনী জাননীখনত উল্লেখ কৰা মতে, দম্পতীহালক ক্ষতিপূৰণ হিচাপে তথ্যচিত্ৰখনৰ পৰা আহৰণ কৰা আয়ৰ ওপৰত ভিত্তি কৰি এটা উপযুক্ত ঘৰ আৰু ATV বাহন আৰু এককালীন সাহায্য হিচাপে পৰ্যাপ্ত আৰ্থিক সহায়ৰ প্ৰতিশ্ৰুতি দিয়া হৈছিল।
বোমন-বেলীক এফালে সকলোৰে সৈতে তথ্যচিত্ৰখনৰ প্ৰকৃত নায়ক হিচাপে চিনাকি কৰাই দিয়া হৈছিল যদিও আনফালে ছবি নিৰ্মাতাই তামিলনাডুৰ মুখ্যমন্ত্ৰীকে ধৰি দেশৰ প্ৰধানমন্ত্ৰীৰ পৰা আৰ্থিক সুবিধা লাভ কৰিছে বুলি ক্ষোভ প্ৰকাশ কৰা হৈছে।
বোমন-বেলীৰ অভিযোগ মতে, তেওঁলোকে তথ্যচিত্ৰখনৰ শ্বুটিঙৰ সময়ত বহু টকা খৰচ কৰিছিল। সেই ধন প্ৰযোজক আৰু পৰিচালকে তেওঁলোকক ঘূৰাই নিদিলে। পৰিচালক কাৰ্তিকিয়ে তেওঁলোকক ধন পৰিশোধৰ আশ্বাস দিছিল যদিও অস্কাৰ লাভৰ পিছত পৰিচালক-প্ৰযোজকৰ ব্যৱহাৰ সলনি হ’ল বুলি বোমন-বেলীয়ে দাবী কৰে।
ইফালে বোমন-বেলীৰ এই অভিযোগক মিছা বুলি ঘোষণা কৰিছে তথ্যচিত্ৰখনৰ পৰিচালক আৰু প্ৰডাকচন কোম্পানীয়ে। পৰিচালক কাৰ্তিকিয়ে ইতিমধ্যে প্ৰতিশ্ৰুতি অনুসৰি ধন পৰিশোধ কৰা হৈছে বুলি দাবী কৰে। আনহাতে তথ্যচিত্ৰখনৰ প্ৰযোজনা কৰা শিখা এণ্টাৰটেইনমেণ্ট প্ৰাইভেট লিমিটেডেও নস্যাৎ কৰিছে অভিযোগ।
এক বিবৃতিত প্ৰতিষ্ঠানটোৱে বোমন-বেলীয়ে উত্থাপন কৰা অভিযোগ অসত্য বুলি দাবী কৰিছে। প্ৰতিষ্ঠানটোৱে লগতে তথ্যচিত্ৰখন সজাগতা বৃদ্ধিৰ লক্ষ্যৰে নিৰ্মাণ কৰা বুলি দোহাৰি ইয়াৰ দ্বাৰা যথেষ্ট সজাগতা বৃদ্ধি হোৱা বুলি উল্লেখ কৰে।
