এজন বছনিয়ান বডি বিল্ডাৰে নিজৰ প্ৰাক্তন পত্নীক ইনষ্টাগ্ৰামত লাইভত নিৰ্মমভাৱে হত্যা কৰে। ঘটনাস্থলীৰ পৰা পলায়ন কৰাৰ সময়তে তেওঁ আৰু দুজন লোকক হত্যা কৰাৰ অভিযোগ উঠিছে। নাৰ্মিন চুলেজমানোভিচ নামৰ যুৱকজনে শেষত নিজকে গুলীয়াই মৃত্যুক আকোঁৱালি লয়।
যোৱা শুকুৰবাৰৰ এই হত্যাকাণ্ডত স্তম্ভিত হৈ পৰিছে দক্ষিণ-পূব ইউৰোপৰ দেশৰ সাধাৰণ নাগৰিকসকল। যুৱকজনে নিজৰ প্ৰাক্তন পত্নীক হত্যা কৰাৰ কাৰণ বিচাৰি তদন্ত অব্যাহত ৰাখিছে আৰক্ষীয়ে।
লগতে পঢ়ক: মণিপুৰৰ বিজেপিৰ সহযোগী সাংসদ লৰ্হো ফ’জে ক’লে-‘সংসদত মোক কথা ক’বলৈয়ে দিয়া নহ’ল’
যোৱা শুকুৰবাৰে গ্ৰেডাচাক নামৰ এখন চহৰত সংঘটিত হৈছিল এই হত্যাকাণ্ড। পত্নীসহ ৩ জন লোকক হত্যা কৰাৰ উপৰিও অভিযুক্ত যুৱকজনৰ আক্ৰমণত আৰু আন ৩ জন লোক আহত হয়।
টুজলা চহৰৰ আৰক্ষীৰ মতে, অভিযুক্ত নাৰ্মিন চুলেজমানোভিচ নামৰ এজন পেছাদাৰী বডি বিল্ডাৰে আত্মঘাতী হয়। এই গোচৰৰ অধিবক্তাই কয় যে পত্নীক হত্যা কৰাৰ পিছত গ্ৰাডাচকৰ ৰাজপথত আগ্নেয়াস্ত্ৰ লৈ তললৈ নামি আহে যুৱকজন। পথচাৰী এজন ব্যক্তি আৰু তেওঁৰ পুত্ৰক গুলীয়াই হত্যা কৰে। তেওঁৰ গুলীচালনাত এজন আৰক্ষী সহ এজন পুৰুষ আৰু এগৰাকী মহিলাও আহত হয়।
লগতে পঢ়ক: উজলিল শুভমন-যশস্বী যুটী! ৱেষ্টইণ্ডিজৰ বিৰুদ্ধে টী-২০ শৃংখলাত সমতা স্থাপন ভাৰতৰ
বছনিয়াৰ সংবাদ মাধ্যমৰ মতে, গ্ৰেডাচাকৰ বডি বিল্ডাৰজনে কিছুদিনৰ পৰা প্ৰাক্তন পত্নীক ভাবুকি দি আহিছিল। তাৰ পিছত শুকুৰবাৰে তেওঁ আগ্নেয়াস্ত্ৰৰে আক্ৰমণ কৰে। মহিলাগৰাকীৰ মৃত্যু হয়।
এই সমগ্ৰ ঘটনা তেওঁ ইনষ্টাগ্ৰামত লাইভ কৰে। অৱশ্যে চৰকাৰী নিৰ্দেশত ইনষ্টাগ্ৰামৰ পৰা আঁতৰাই দিয়া হৈছে এই নৃশংস ঘটনাৰ ভিডিঅ’।
