আজিও বি টি এ ডিৰ প্ৰাণ কেন্দ্ৰ কোকৰাঝাৰ চহৰৰ মুকলি আকাশত উৰিল বি পি এফৰ দলীয় পতাকা। হাইড্ৰ’জেন গেছ ব্যৱহৃত বেলুনেৰে ১৬×১০ ফুট (দীঘল×বহল ) নাঙলৰ ছবি থকা দলীয় পতাকা উৰুৱালে কোকৰাঝাৰ চহৰত।
ইয়াৰ পূৰ্বেও বি পি এফৰ কৰ্মী সকলে ড্ৰ’নেৰে আকাশত উৰুৱাইছিল বি পি এফৰ পতাকা। পিছে এয়া কিন্তু কোনো এটা উৎসৱৰ আনন্দৰে উৰুৱাই দিয়া নহয়। এয়া এটা প্ৰতিবাদৰ অংশহে। ৰাজ্যপালে বি টি চিত শাসন চলোৱাৰ বিৰুদ্ধে প্ৰদৰ্শন কৰা প্ৰতিবাদ।
উল্লেখ্য যে ২৮ এপ্ৰিলৰ পৰা অসমৰ ৰাজ্যপাল জগদীশ মুখীয়ে বি টি চিত শাসনৰ দায়িত্ব লৈছিল যদিও আজিলৈ বি টি চিত উপস্থিত হৈ প্ৰশাসনৰ ব্যবস্থাৰ ওপৰত বুজ লব পৰা নাই। অথচ ৰাজ্যপালে আজি কোকৰাঝাৰত অহা কথা আছিল যদিও আজিও আহিব নোৱাৰিলে।
অহা ১৭ মে লৈকে ৰাজ্যপাল জগদীশ মুখীয়ে বি টি চিত আহিব নোৱাৰে। কাৰণ তৃতীয় লকডাউনৰ নিৰ্দেশনা অনুসৰি লকডাউনৰ সময়ছোৱাত ৬৫ বছৰৰ ওপৰত আৰু ১২ বছৰৰ তলৰ কোনো নাগৰিকে ঘৰৰ পৰা বাহিৰ ওলাব নোৱাৰে।
৬৫ বছৰৰ উৰ্ধ্বৰ মহামান্য ৰাজ্যপালেও এই নিৰ্দেশনা অমান্য কৰি আহিব নোৱাৰে। তেনে ক্ষেত্ৰত বি টি চিত প্ৰশাসন ব্যবস্থা কেনেকৈ স্বচ্ছ আৰু নিকা হ’ব বুলি আশা কৰিব? এই প্ৰস্ন তুলিছে বি পি এফৰ এগৰাকী সক্ৰিয় কৰ্মী মনঞ্জয় দৈমাৰীয়ে।
এই প্ৰসংগত তেওঁ কয়, ‘বি পি এফৰ দলীয় পতাকা উৰুৱা তথা উত্তোলন কৰা কাৰ্যসূচী অব্যাহত থাকিব যেতিয়ালৈকে বি পি এফৰ মুৰব্বী হাগ্ৰামা মহিলাৰীয়ে নতুনকৈ নিৰ্দেশনা নিদিয়ে’।
উল্লেখ্য যে বি টি চিৰ শাসন ৰাজ্যপালৰ হাতত যোৱাৰ পিছদিনা অৰ্থাৎ ২৮ এপ্ৰিলত প্ৰথম প্ৰতিক্ৰিয়াত হাগ্ৰামা মহিলাৰীয়ে বি পি এফৰ সকলো কৰ্মী তথা সমৰ্থক সকলক ঘৰে ঘৰে দলীয় পতাকা উত্তোলন তথা উৰুৱাবলৈ নিৰ্দেশ দিছিল। সেইমতে বি পি এফৰ কৰ্মী সকলৰ পতাকা উৰুৱা কাৰ্যসূচী আজিও অব্যাহত আছে।
