‘’ইউপিপিএল দলটো প্ৰমোদ বড়োৰ নিজস্ব মইমতালিৰে চলোৱা দল। তাৰ বাবে ইউপিপিএলৰ মানুহ ক্ষুব্ধ হৈছে। বড়ো জনগোষ্ঠীৰ লোক ক্ষুব্ধ হৈছে। প্ৰমোদ বড়োৰ ইউপিপিএল দলে বড়ো জাতিৰ ইতিহাস ধ্বংস কৰিছে। সংগ্ৰামক ধ্বংস কৰিছে। এই কথা বড়ো মানুহে বুজি পাইছে।‘’
এইদৰে মন্তব্য কৰিছে বিপিএফ নেতা, বিটিচিৰ প্ৰাক্তন কাৰ্যবাহী সদস্য মহেশ্বৰ বসুমতাৰীয়ে।
বসুমতাৰীয়ে কয়, ‘’যিসকলে বিপিএফ ত্যাগ কৰি বিজেপিলৈ গমন কৰিছিল তেওঁলোকে ভুল কৰিছে। শুধৰণি হোৱাৰ সময় এতিয়াও আছে। তেওঁ লোকক আমি আহ্বান জনাইছো তেওঁলোক পুনৰ বিপিএফলৈ উভতি আহক। তেওঁলোকৰ বাবে বিপিএফৰ দুৱাৰ খোলা আছে। কিন্তু তেওঁলোকে নিৰ্বাচনৰ আগতে বিপিএফলৈ ঘুৰি আহিব লাগিব।‘’
শুকুৰবাৰে তামুলপুৰ জিলা বিপিএফৰ কাৰ্যালয়ত নিৰ্বাচন পৰিচালনা সমিতি গঠনৰ বাবে আয়োজিত এখন সভাত এইদৰে মন্তব্য কৰে মহেশ্বৰ বসুমতাৰীয়ে।
তামুলপুৰৰ প্ৰাক্তন বিধায়ক ইমানুৱেল মোছাহাৰীৰ প্ৰসংগত বসুমতাৰীয়ে লগতে কয়, ‘’তেওঁৰ অৱস্থা দেখি আমি দুখ পাইছো। তেওঁ বিপিএফ দল ত্যাগ কৰি যাব নালাগিছিল। এই সভাৰ জৰিয়তে ইমানুৱেল মোছাহাৰীৰ লগত বিপিএফ এৰি অন্য দললৈ যোৱা নেতা কৰ্মীক আমি আহ্বান জনাইছো তেওঁলোক পুনৰ বিপিএফ দললৈ উভতি আহক।‘’
শুকুৰবাৰে তামুলপুৰ জিলা বিপিএফৰ কাৰ্যালয়ত বিপিএফ দলৰ সমষ্টিভিত্তিক নিৰ্বাচন পৰিচালনা সমিতি গঠনৰ উদ্দেশ্যে মহেশ্বৰ বসুমতাৰীৰ সভাপতিত্বত অনুষ্ঠিত সভাত ভাষণ ৰাখি বিপিএফ নেতা গৰাকীয়ে এইদৰে মন্তব্য কৰে।
সভাত উপস্থিত থাকি বিটিচিৰ প্ৰাক্তন কাৰ্য্যবাহী সদস্য তথা বিপিএফৰ জ্যেষ্ঠ নেতা গনেশ কছাৰীয়েও বিজেপি চৰকাৰক তীব্ৰ ভাষাৰে সমালোচনা কৰে। বিজেপি দলে দেশৰ ৰাইজক প্ৰতাৰণা কৰাৰ বাহিৰে আন একোকে দিব পৰা নাই বুলিও কছাৰীয়ে মন্তব্য কৰে। শ্ব’লে চিনেমাৰ ডাইলগ মাৰি ইমানুৱেল মোছাহাৰীক কটাক্ষ কৰি গণেশ কছাৰীয়ে ক’লে –‘অৱকীয়া হোগা তেৰা কালীয়া’।
সভাত উপস্থিত থাকি শৰণীয়া কছাৰী উন্নয়ন পৰিষদৰ প্ৰাক্তন অধ্যক্ষ দীপক ডেকাইও বিজেপি দলক সমালোচনা কৰে।
শুকুৰবাৰৰ সভাতে মহেশ্বৰ বসুমতাৰীক সভাপতি, যোগেন বসুমতাৰীক কাৰ্যকাৰী সভাপতি, চিত্ৰশ্বৰ নাৰ্জাৰীক মুখ্য আহ্বায়ক বলেন বড়োক আহ্বায়ক হিচাপে লৈ ৭১ জনীয়া বিপিএফৰ ৫৮ নং তামুলপুৰ বিধান সভাৰ সমষ্টি ভিত্তিক নিৰ্বাচনী পৰিচালনা সমিতি খন গঠন কৰা হয়।
সভাত সুৰেণ বসুমতাৰীক সভাপতি আৰু কানু কলিতাক মুখ্য আহ্বায়ক হিচাপে লৈ ৫১ জনীয়া গয়বাৰী ব্লক বিপিএফৰ নিৰ্বাচন পৰিচালনা সমিতিখনো গঠন কৰা হয়।
