স্বৰাজ্যলৈ ঘূৰি যোৱাৰ বাবে নিজৰ আৰোপিত চৰ্ত পূৰণ হোৱাৰ পিছতো আৰু প্ৰত্যাৱৰ্তনৰ সময় সমাগত হোৱা সত্ত্বেও ত্ৰিপুৰাৰ ব্ৰু শৰণাৰ্থীসকলৰ মাত কোনো উৎসাহ পৰিলক্ষিত হোৱা নাই।
উল্লেখযোগ্য যে অহা ২৫ আগষ্টৰ পৰা ত্ৰিপুৰাত যোৱা দুই দশকৰো অধিক কাল বাস কৰি অহা ৰিয়াং বা ব্ৰু শৰণাৰ্থীসকলক তেওঁলোকৰ গৃহৰাজ্য মিজোৰামলৈ প্ৰত্যাৱৰ্তনৰ বাবে সময় ধৰি দিয়া হৈছিল। এই প্ৰত্যাৱৰ্তনৰ সকলো যাৱতীয় ব্যৱস্থা আৰু চৰ্তাৱলী নিৰ্ধাৰণ কৰা হৈছিল কেন্দ্ৰ, মিজোৰাম আৰু ত্ৰিপুৰা চৰকাৰ সৈতে মিজোৰাম ব্ৰু শৰণাৰ্থী মঞ্চৰ ত্ৰিপাক্ষিক বৈঠকত। বৈঠকৰ পিছত কেন্দ্ৰ আৰু
বৈঠকৰ সিদ্ধান্তৰ ওপৰত ভিত্তি কৰি যোৱা ৩ জুলাইত নতুন দিল্লীত এখন ত্ৰিপাক্ষিক চুক্তি কৰা হৈছিল, য’ত ব্ৰু শৰণাৰ্থীসকলে গৃহৰাজ্য মিজোৰামলৈ ঘূৰি যাবলৈ আৰোপ কৰা চৰ্তবোৰ মানি লোৱা হৈছিল।
এই চুক্তিমতে অহা ২৫ আগষ্টৰ পৰা এই এটা নিৰ্ধাৰিত প্ৰক্ৰিয়াৰে এই শৰণাৰ্থীসকল মিজোৰামলৈ প্ৰত্যাৱৰ্তন কৰাৰ কথা। প্ৰত্যাৱৰ্তন কৰা প্ৰতিটো পৰিয়ালক ৪ লাখকৈ টকা এককালীন সাহায্য হিচাপে দিয়া হ’ব। তাৰোপৰি মিজোৰাম চৰকাৰে এইসকলৰ নাম ৰাজ্যখনৰ ভোটাৰ তালিকাত অন্তৰ্ভুক্ত কৰিব।
কিন্তু এইবোৰ সকলো প্ৰয়োজনীয় চৰ্তৰ বাবে চৰকাৰ সাজু থকাৰ সময়ত শৰণাৰ্থীসকলৰ মাজত নিজ ৰাজ্যলৈ ঘূৰি যোৱাৰ আগ্ৰহ নোহোৱাটোৱে বিশেষ তাৎপৰ্য্য বহন কৰিছে।
উল্লেখযোগ্য যে গোষ্ঠী সংঘৰ্ষৰ বলি হৈ ১৯৯৭ চনতে মিজোৰামৰ পৰা প্ৰায় ৩০ হাজাৰ ৰিয়াং বা ব্ৰু জনজাতিৰ লোক ত্ৰিপুৰালৈ ভাগি গৈছিল। তাৰ পিছৰ পৰা এই লোকসকল যোৱা দুই দশক ধৰি ত্ৰিপুৰাৰ বিভিন্ন অস্থায়ী শিবিৰত বাস কৰি আহিছে।
শেহতীয়া চুক্তি অনুসৰি ত্ৰিপুৰাৰ অস্থায়ী শিবিৰত বাস কৰি অহা ৫,৪০৭টা পৰিয়ালৰ মিজোৰামলৈ প্ৰত্যাৱৰ্তন কৰাৰ কথা। তেওঁলোকৰ মিজোৰাম গমনৰ লগে লগে ত্ৰিপুৰাত থকা অস্থায়ী শিবিৰসমূহ বন্ধ কৰি দিয়াৰ কথা। কিন্তু এতিয়াও শৰণাৰ্থীসকলৰ মাজত প্ৰত্যাৱৰ্তনৰ বাবে নাম পঞ্জীয়নৰ আগ্ৰহ দেখা পোৱা নাই। এই পৰ্য্যন্ত ৬টা শিবিৰৰ ২০০ লোকেহে নাম পঞ্জীয়ন কৰিছে।
