বুধবাৰে আৰক্ষীয়ে জানিবলৈ দিয়া মতে, দক্ষিণ-পূব দিল্লীৰ অমৰ কলনী এলেকাত এগৰাকী জ্যেষ্ঠ আই আৰ এছ বিষয়াৰ কন্যাক নিজ বাসগৃহতে মৃত অৱস্থাত উদ্ধাৰ কৰা হৈছে।
আৰক্ষীৰ মতে, পৰিয়ালৰ লোকে যুৱতীগৰাকীক ঘৰৰ ভিতৰতে সন্দেহজনক অৱস্থাত পৰি থকা দেখি লগে লগে আৰক্ষীক খবৰ দিয়ে। খবৰ পোৱাৰ পিছতেই আৰক্ষীৰ এটা দল ঘটনাস্থলীত উপস্থিত হৈ ঘটনাটোৰ তদন্ত আৰম্ভ কৰে।
সূত্ৰৰ পৰা জানিব পৰা মতে, প্ৰাথমিক তদন্তত পোহৰলৈ আহিছে যে যুৱতীগৰাকীক হত্যা কৰাৰ পূৰ্বে সম্ভৱতঃ যৌন নিৰ্যাতন চলোৱা হৈছিল। তাৰ পিছত ম’বাইল ফোনৰ চাৰ্জাৰৰ তাঁৰেৰে ডিঙি চেপি তেওঁক হত্যা কৰা হয়। প্ৰায় ২১ বছৰ বয়সীয়া এই যুৱতীগৰাকী ঘটনাৰ সময়ত ঘৰত অকলেই আছিল বুলি আৰক্ষীয়ে জানিবলৈ দিছে।
এই ভয়ংকৰ ঘটনাত আৰক্ষীয়ে ঘৰখনৰ এগৰাকী প্ৰাক্তন বনকৰা লোক জড়িত থকাৰ সন্দেহ প্ৰকাশ কৰিছে। এমাহৰো অধিক সময়ৰ পূৰ্বে কামৰ পৰা বৰ্খাস্ত কৰা এই লোকজন বৰ্তমান পলাতক অৱস্থাত আছে। ইতিমধ্যে আৰক্ষীয়ে এটা গোচৰ ৰুজু কৰিছে আৰু দোষীক কৰায়ত্ত কৰিবলৈ কেইবাটাও দল গঠন কৰিছে। সমগ্ৰ ঘটনাটোৰ অধিক তদন্ত বৰ্তমানো তীব্ৰ গতিত চলি আছে।
