পিতৃ-মাতৃৰ সপোন পূৰাবলৈ বাংগালোৰলৈ যোৱা হাউলীৰ জেচমিনাৰা আখতাৰ নামৰ মেধাৱী ছাত্ৰী গৰাকীৰ সপোন সপোন হৈয়ে থাকিল৷ বি এছ চি নাৰ্ছিঙৰ অধ্যয়নৰ বাবে বাংগালোৰত যোৱা ছাত্ৰী গৰাকী বুধবাৰে ৰহস্যজনকভাৱে মৃত্যু হয় ৷
হাউলী নগৰঝাৰৰ বাসিন্দা নাজিমউদ্দিন আহমেদ আৰু মৰ্জিনা খাতুনৰ দ্বিতীয় সন্তান জেচমিনাৰা আখতাৰ ধৰ্ষণৰ বলি হৈ অকাল মৃত্যুক সাৱটি লোৱা বুলি অভিযোগ কৰে পৰিয়াল বৰ্গই ৷
জেচমিনাৰাৰ পিতৃয়ে জনোৱা অনুসৰি বাংগালোৰৰ ইষ্ট-ৱেষ্ট কলেজত বি এছ চি নাৰ্ছিঙত অধ্যয়ন কৰাৰ বাবে ১৪ ডিচেম্বৰত খুড়াক আৰু খুড়াকৰ ছোৱালী লিনতাজ জাহানৰ লগত বাংগালোৰত উপস্থিত হয় জেচমিনাৰা ৷
খুড়াকে জেচমিনাৰা আৰু লিনতাজক হোষ্টেলত থয় ৷ বুধবাৰে পুৱা টকা উলিওৱাৰ বাবে এজেন্ট আনিছুৰ ৰহমানৰ লগত এটিএমলৈ যোৱাৰ পিছতে ৰহস্যজনকভাবে মৃত্যুক সাৱটি লোৱা বুলি পৰিয়ালৰ লোকে জনায় ৷ স্থানীয় আৰক্ষীয়ে আনিছুৰ ৰহমানক আটক কৰিছে ৷
গোৱালপাৰাৰ লক্ষীপুৰৰ এজেন্ট আনিছুৰক দৃষ্টান্তমূলক শাস্তি প্ৰদানৰ দাবী উত্থাপন কৰে পৰিয়ালবৰ্গই ৷ আনিছুৰে জেচমিনাৰাক ধৰ্ষণ কৰি হত্যা কৰা বুলি অভিযোগ কৰে পৰিয়ালবৰ্গই ৷
বাংগালোৰৰ পৰা জেচমিনাৰাৰ মৃতদেহ অসমলৈ অনাৰ ব্যৱস্থা গ্ৰহণ কৰাৰ বাবে অসম চৰকাৰৰ সহায় বিচাৰিছে দুৰ্ভগীয়া পৰিয়ালটোৱে ৷
জেচমিনাৰাই ২০১৬ বৰ্ষত হাইস্কুল শিক্ষান্ত পৰীক্ষাত ৬৪ শতাংশ আৰু উচ্চতৰ মাধ্যমিকৰ বিজ্ঞান শাখাৰ চূড়ান্ত বৰ্ষত ৬৫ শতাংশ নম্বৰেৰে উত্তীৰ্ণ হৈছিল।
কাইলৈ পুৱা ৫ বজাত জেচমিনাৰাৰ মৃতদেহ বাংগালোৰৰ পৰা অনা হব।