দেশত বায়ু, পানী আৰু শব্দ প্ৰদূষণৰ মাত্ৰা দিনে দিনে বৃদ্ধি পোৱাৰ সময়তে কেন্দ্ৰীয় চৰকাৰে ২০২৬ চনৰ বাজেটত প্ৰদূষণ নিয়ন্ত্ৰণৰ বাবে আবণ্টিত ধনৰ পৰিমাণ হ্ৰাস কৰিছে। এইবাৰ বাজেটত প্ৰদূষণ নিয়ন্ত্ৰণৰ বাবে ১,০৯১ কোটি টকা ধাৰ্য কৰা হৈছে, যিটো যোৱা বিত্তীয় বৰ্ষৰ সংশোধিত অনুমানতকৈ যথেষ্ট কম। খবৰ অনুসৰি, এই শিতানত সংশোধিত আনুমানিক ধনৰাশি আছিল ১,৩০০ কোটি টকা। চৰকাৰৰ এই পদক্ষেপে এতিয়া দেশজুৰি চৰ্চা লাভ কৰিছে। যদিও যোৱা বছৰ প্ৰথমে ৮৫৪ কোটি টকা ধাৰ্য কৰা হৈছিল, পৰৱৰ্তী সময়ত সেই পৰিমাণ বৃদ্ধি পাইছিল। কিন্তু ২০২৪-২৫ বৰ্ষৰ পৰিসংখ্যাই এক হতাশাজনক ছবি দাঙি ধৰিছে কাৰণ সেই বছৰ প্ৰকৃত ব্যয় হৈছিল মাত্ৰ ১৬ কোটি টকা।
প্ৰদূষণ বৰ্তমান সময়ত কেৱল পৰিৱেশৰ সমস্যা হৈ থকা নাই, ই মানুহৰ জীৱন আৰু জীৱিকাৰ বাবেও ডাঙৰ ভাবুকি হৈ পৰিছে। এই সন্দৰ্ভত আন্তঃৰাষ্ট্ৰীয় অৰ্থনীতিবিদ গীতা গোপীনাথে শেহতীয়াকৈ ডাভোছত অনুষ্ঠিত বিশ্ব অৰ্থনৈতিক মঞ্চত এক তাৎপৰ্যপূৰ্ণ মন্তব্য কৰিছিল। তেওঁ কৈছিল যে আমেৰিকাই আৰোপ কৰা যিকোনো বাণিজ্যিক শুল্কতকৈ বায়ু প্ৰদূষণে ভাৰতৰ অৰ্থনীতিৰ বাবে অধিক বিপদ কঢ়িয়াই আনিব পাৰে। তেওঁ ভাৰত চৰকাৰক বায়ু প্ৰদূষণৰ বিৰুদ্ধে যুদ্ধংদেহী মনোভাব লৈ কাম কৰিবলৈ আহ্বান জনাইছে।
ইফালে বিৰোধী দলৰ নেতা ৰাহুল গান্ধীয়েও এই বিষয়টো গুৰুত্বসহকাৰে লৈছে। তেওঁ দেশত বিৰাজ কৰা প্ৰদূষণক এক ৰাষ্ট্ৰীয় স্বাস্থ্য জৰুৰীকালীন অৱস্থা বুলি অভিহিত কৰিছে। ৰাহুল গান্ধীয়ে সংসদত এই সন্দৰ্ভত এক বিতৰ্কৰ দাবী জনোৱাৰ লগতে চৰকাৰক প্ৰকৃত সম্পদ আৰু সঠিক আঁচনি গ্ৰহণ কৰিবলৈ অনুৰোধ জনাইছে। তেওঁ স্পষ্টকৈ কৈছে যে জনসাধাৰণে এতিয়া খালী প্ৰতিশ্ৰুতি নিবিচাৰে, তেওঁলোকক লাগে কেৱল উশাহ ল’বলৈ বিশুদ্ধ বায়ু।
অন্যহাতে ডালবাৰ্গ এডভাইজাৰ্ছ আৰু ক্লিন এয়াৰ ফাণ্ডৰ এক নতুন প্ৰতিবেদনত কোৱা হৈছে যে প্ৰদূষণ নিয়ন্ত্ৰণ কৰিলে ভাৰতৰ অৰ্থনৈতিক লাভহে হ’ব। প্ৰতিবেদনখনৰ মতে, ২০৩০ চনৰ ভিতৰত বায়ু প্ৰদূষণ হ্ৰাস কৰি ভাৰতে ২২০ বিলিয়ন ডলাৰ পৰ্যন্ত উপাৰ্জন কৰাৰ সুযোগ আছে। যদিহে বায়ুমণ্ডলৰ পৰা সূক্ষ্ম কণাযুক্ত পদাৰ্থৰ মাত্ৰা ২০ শতাংশ হ্ৰাস কৰিব পৰা যায়, তেন্তে দেশৰ বাণিজ্যিক লোকচান হ্ৰাস পোৱাৰ লগতে কোটি কোটি মানুহৰ জীৱন সুৰক্ষিত হ’ব। ইমানবোৰ সতৰ্কবাণী আৰু তথ্য থকাৰ পাছতো বিত্তমন্ত্ৰী নিৰ্মলা সীতাৰমণৰ দীৰ্ঘদিনীয়া বাজেট ভাষণত প্ৰদূষণ শব্দটো এবাৰো উল্লেখ নোহোৱাটোৱে বহুতকে আচৰিত কৰি তুলিছে।
