অসমৰ পৰা গ্ৰেপ্তাৰ হৈছে সমগ্ৰ দেশতে খলকনি তোলা বিতৰ্কিত বুল্লি বাই কাণ্ডৰ মাষ্টাৰমাইণ্ড। আজি দিল্লী আৰক্ষীয়ে যোৰহাটৰ পৰা নিৰজ বিষ্ণৈ নামৰ ২১ বৰ্ষীয় যুৱক এজনক গ্ৰেপ্তাৰ কৰে। ধৃত যুৱকজন ভূপালৰ ভেলোৰ ইনষ্টিটিউট অৱ টেকন’লজীৰ দ্বিতীয় বৰ্ষৰ B.Tech ছাত্ৰ।
আৰক্ষীয়ে নিৰজক বুল্লি বাই কাণ্ডৰ মাষ্টাৰমাইণ্ড বুলি চিনাক্ত কৰিছে। চাইবাৰ চেলৰ DCP কেপিএছ মালহোত্ৰাই কয়, “আমি ৱেবছাইটটোৰ মুখ্য ষড়যন্ত্ৰকাৰী আৰু সৃষ্টিকৰ্তাক গ্ৰেপ্তাৰ কৰিছো। তেওঁ ৱেবছাইটটোৰ মুখ্য টুইটাৰ একাউণ্টো চলাই আছিল। আমাৰ দলটোৱে তেওঁক অসমৰ পৰা ধৰিছিল। দলটো আবেলি প্ৰায় ৩.৩০ বজাত দিল্লীত উপস্থিত হ’ব।”
গিটহাব নামৰ এটা ৱেবছাইট ব্যৱহাৰ কৰি আপত্তিজনক মন্তব্যৰ লগতে মুছলমান মহিলাসকলৰ আলোকচিত্ৰ প্ৰকাশ কৰি নিলাম কৰিছিল এই বুল্লি বাই কাণ্ডৰ অভিযুক্ত সকলে।
দিল্লীৰ এগৰাকী সাংবাদিকে ৱেবছাইটত তেওঁৰ ফটোৰ অপব্যৱহাৰ হোৱাৰ বিষয়ে দিল্লী আৰক্ষীৰ ওচৰত অভিযোগ দাখিল কৰাৰ পিছত এই কুকাণ্ড পোহৰলৈ আহে ঘটে।
আমেৰিকা যুক্তৰাষ্ট্ৰৰ ছফ্টৱেৰ বিকাশ প্লেটফৰ্ম গিটহাবত সংযুক্ত ৱেবছাইটটোত কমেও ১০০ গৰাকী মুছলমান মহিলাক লক্ষ্য কৰি লোৱা হৈছিল।
আৰক্ষীয়ে জনোৱা অনুসৰি তেওঁলোকে অনুসন্ধানৰ অংশ হিচাপে বিষ্ণৈৰ আইপি ঠিকনা অনুসৰণ কৰিছে। “আমি দেখিছোঁ যে ইতিমধ্যে গ্ৰেপ্তাৰ হোৱা আন তিনিজন ব্যক্তিয়ে বিষ্ণৈৰ নিৰ্দেশনা অনুসৰণ কৰি আছিল। বিষ্ণৈৱে তেওঁলোকক টুইটাৰত একাউণ্ট সৃষ্টি কৰিবলৈ নিৰ্দেশনা প্ৰদান কৰিছিল।” আৰক্ষীৰ এক সূত্ৰই কয়।
উল্লেখ্য যে মুম্বাই আৰক্ষীয়ে ঘটনা সন্দৰ্ভত এতিয়ালৈকে তিনিজনক গ্ৰেপ্তাৰ কৰিছে। ধৃত তিনিওজনে সামাজিক মাধ্যমত সম্পৰ্ক ৰক্ষা কৰি চলিছিল বুলি আৰক্ষী সূত্ৰত প্ৰকাশ পাইছিল।