গোৱালপাৰা জিলাৰ ব্যৱসায়ৰ প্ৰাণকেন্দ্ৰ স্বৰূপ কৃষ্ণাই বজাৰত সঘনে সংঘটিত হয় অগ্নিকাণ্ড৷ বছৰটোত দুই, তিনিবাৰকৈ সংঘটিত অগ্নিকাণ্ডৰ ফলত ব্যৱসায়ীসকলে লাখ লাখ টকাৰ লোকচানৰ সন্মুখীন হৈ থাকিব লগা হৈছে৷
এই বিপৰ্যয় ৰোধৰ বাবে স্থানীয় লোক তথা ব্যৱসায়ীসকলে চৰকাৰৰ লগতে জিলা প্ৰশাসনক কৃষ্ণাইত এটা অগ্নিনিৰ্বাপক কেন্দ্ৰ স্থাপনৰ দাবী কৰি আহিছে৷
কিন্তু পৰিতাপৰ কথাটো হ’ল আজিলৈ কৃষ্ণাইত অগ্নিনিৰ্বাপক কেন্দ্ৰ স্থাপন নহ’ল৷ শেহতীয়াভাৱে উপায়হীন ব্যৱসায়ীসকলে অৱশেষত চৰকাৰ প্ৰশাসনৰ আশা এৰি শৰণাপন্ন হৈছে ব্ৰহ্মা দেৱতাৰ ওচৰত৷
বিগত তিনি বছৰ ধৰি কৃষ্ণাই বজাৰৰ ব্যৱসায়ী সকলে অগ্নি দেৱতাৰ কোপ দৃষ্টিৰ পৰা ৰক্ষা পাবলৈ ব্ৰহ্মা দেৱতাৰ চৰণত শৰণাপন্ন হৈ আহিছে৷ সেই ধাৰা অব্যাহত ৰাখি এইবেলিও কৃষ্ণাই বজাৰৰ ব্যৱসায়ীসকল একত্ৰিত হৈ ব্ৰহ্মা দেৱতাৰ পূজা অৰ্চনা সম্পন্ন কৰে৷
