পোৱালি অথবা কণীৰ সৃষ্টিৰ বাবে মতা আৰু মাইকী জীৱৰ যৌন মিলন হোৱাটো প্ৰয়োজনীয়।
মতা-মাইকী জীৱৰ যৌন মিলন অবিহনে জীৱৰ জন্মৰ কথা কল্পনাও কৰিব নোৱাৰি।
কিন্তু এনে কল্পনা কৰিব নোৱাৰা ঘটনাও পৃথিৱীত কেতিয়াবা ঘটে।
শেহতীয়াকৈ আমেৰিকাৰ ছান ডিয়েগ’ চিৰিয়াখানাত এটা মাইকী কেলিফ’ৰ্নিয়ান কনডৰে মতা চৰাইৰ সৈতে সহবাস নকৰাকৈয়ে কণী পাৰি পোৱালি জগাবলৈ সক্ষম হৈছে।
চিৰিয়াখানাখনত সংঘটিত এই ঘটনাত সাধাৰণ লোকসকল আচৰিত হৈ পৰিছে যদিও বিজ্ঞানীসকলে পিছে এই ঘটনাত বিশেষ আচৰিত হোৱা নাই।
বিচিত্ৰ প্ৰকৃতিত কেতিয়াবা মতা জীৱৰ সৈতে সহবাস নকৰাকৈয়েই মাইকী জীৱই কণী অথবা পোৱালি জন্ম দিব পাৰে।
ইতিমধ্যে এই কথাৰ প্ৰমাণ জোক, সাপ , ছাৰ্ক , বিভিন্ন প্ৰজাতিৰ মাছৰ ক্ষেত্ৰতো ঘটা দেখা গৈছে। মতা সংগী অবিহনে মাইকী জীৱই পোৱালি বা কণী জন্ম দিয়াৰ এই পৰিঘটনাক বিজ্ঞানৰ ভাষাত parthenogenesis বুলি কোৱা হয়।
বিজ্ঞানীসকলৰ মতে parthenogenesis ৰ ঘটনাত মাইকী জীৱৰ একোটা কোষে মতা জীৱৰ শুক্ৰাণুৰ দৰে আচৰণ কৰিবলৈ লয় আৰু সেই কোষৰ সৈতে মাইকী জীৱৰ ডিম্বাণুৰ মিলন ঘটি কণী বা পোৱালিৰ জন্ম হয়।
বিশ্বত এনে ঘটনা খুব কমেইহে ঘটে যদিও ছান ডিয়েগ’ৰ চিৰিয়াখানাখনত শেহতীয়াকৈ এনে ঘটনাই ঘটিছে।
উল্লেখ্য কেলিফ’ৰ্নিয়ান কনডৰ চৰাই বিধ বিশ্বৰ দুস্প্ৰাপ্য চৰাই বোৰৰ মাজৰে এবিধ।
দক্ষিণ-পশ্চিম আমেৰিকাত আৰ মেক্সিকোত পোৱা এই চৰাইভিধৰ সংখ্যা লক্ষণীয় ভাবে হ্ৰাস পাই আহিছে।
১৯৮০ চনত মাত্ৰ কেইটামান কেলিফ’ৰ্নিয়ান কনডৰ চৰাইহে বন্য অৱস্থাত আছিল।
কিন্তু সংৰক্ষণৰ পদক্ষেপ গ্ৰহণ কৰাৰ পিছতে চৰাইবিধৰ সংখ্যা কিছু বৃদ্ধি পাইছে।
ছান ডিয়েগ’ৰ চিৰিয়াখানাৰ ঘটনাটো American Genetic Association’s Journal of Heredity শেহতীয়াকৈ প্ৰকাশ পাইছে।