জাৰ্মানীত অসুস্থতাৰ ছুটী অৰ্থাৎ ছিক লিভৰ নিয়মসমূহ অতি সোনকালেই কঠোৰ কৰা হ‘ব। জাৰ্মান চেঞ্চেলৰ ফ্ৰেডৰিক মাৰ্জৰ মিত্ৰজোঁটৰ চৰকাৰে এক ডাঙৰ প্ৰস্তাৱ আগবঢ়াইছে, য‘ত অসুস্থতাৰ ছুটীৰ নিয়ম সলনি কৰাৰ পৰিকল্পনা কৰা হৈছে। প্ৰস্তাৱিত পৰিৱৰ্তনসমূহৰ অধীনত নিয়োগকৰ্তাই কৰ্মচাৰীসকলৰ পৰা ছুটীৰ প্ৰথম দিনাই ডাক্তৰৰ প্ৰমাণপত্ৰ বিচাৰিব পাৰিব। পূৰ্বৰ নিয়ম অনুসৰি বহু কৰ্মচাৰীয়ে কোনো স্বাস্থ্য সম্পৰ্কীয় প্ৰমাণ নোহোৱাকৈ একেৰাহে তিনি দিনলৈকে অসুস্থতাৰ ছুটীত থাকিব পাৰিছিল। এই পদক্ষেপৰ মূল উদ্দেশ্য হৈছে উৎপাদনশীলতা বৃদ্ধি কৰা আৰু জাৰ্মানীৰ অৰ্থনীতিক পুনৰুজ্জীৱিত কৰা।
এপিৰ মতে, জাৰ্মান চৰকাৰে বৃহস্পতিবাৰে ৩৪ টা অৰ্থনৈতিক সংস্কাৰৰ প্ৰস্তাৱ ঘোষণা কৰিছে। ইয়াৰ উদ্দেশ্য হৈছে দেশৰ উন্নয়নক প্ৰসাৰিত কৰা, আমোলাতন্ত্ৰ হ্ৰাস কৰা আৰু অৰ্থনৈতিক প্ৰত্যাহ্বানসমূহৰ সৈতে মোকাবিলা কৰা। ইয়াৰ ভিতৰত আটাইতকৈ বেছি চৰ্চা হৈছে অসুস্থতাৰ ছুটীৰ নিয়ম সলনি কৰাৰ বিষয়ে। যদি ই অনুমোদন লাভ কৰে, তেন্তে কৰ্মচাৰীসকলে নিয়োগকৰ্তাই বিচৰাৰ পিছত মেডিকেল ডকুমেণ্ট নিদিয়াকৈ কোনো অসুস্থতাৰ ছুটী ল‘ব নোৱাৰিব। ইয়াৰ ফলত চিকিৎসকৰ ওচৰলৈ যোৱাৰ সলনি কেৱল ফোনৰ জৰিয়তে এসপ্তাহৰ অসুস্থতাৰ ছুটী লোৱা প্ৰথাটো সম্পূৰ্ণৰূপে বন্ধ হ‘ব।
জাৰ্মান চৰকাৰৰ মতে, এই পৰিৱৰ্তনসমূহৰ প্ৰধান উদ্দেশ্য হৈছে কৰ্মচাৰীসকলৰ দায়বদ্ধতা নিশ্চিত কৰা আৰু কৰ্মক্ষেত্ৰত তেওঁলোকৰ অনুপস্থিতি হ্ৰাস কৰা। জাৰ্মান চেঞ্চেলৰ ফ্ৰেডৰিক মাৰ্জে বাৰে বাৰে অভিযোগ কৰিছিল যে জাৰ্মানীত অসুস্থতাৰ ছুটীৰ হাৰ বহুত বেছি আৰু ইয়াৰ ফলত দেশৰ উৎপাদনশীলতা যথেষ্ট ক্ষতিগ্ৰস্ত হৈছে। মাৰ্জে প্ৰস্তাৱটোৰ বিষয়ে সংবাদ মাধ্যমক জনাই কয় যে আমি আমাৰ কোম্পানীসমূহত অসুস্থতাৰ ছুটীৰ এই সঘনাই হোৱা মাত্ৰা আৰু সহ্য কৰিব নোৱাৰোঁ। আমি ফোনত অসুস্থতাৰ ছুটী লোৱা ব্যৱস্থাটো শেষ কৰিছোঁ আৰু অসুস্থ হোৱাৰ প্ৰথম দিনাই মেডিকেল চাৰ্টিফিকেট জমা দিয়াৰ নিয়ম কঠোৰভাৱে আৰম্ভ কৰিছোঁ।
