কেমেৰা ট্ৰেপিং (দূৰ নিয়ন্ত্ৰিত ব্যৱস্থাৰে ফটো তোলা) পদ্ধতিৰ জৰিয়তে প্ৰথমবাৰৰ বাবে চলোৱা এটা জৰীপত মানস ৰাষ্ট্ৰীয় উদ্যানত থকা জৈৱ বৈচিত্ৰৰ প্ৰাচুৰ্যৰ কথা গম পোৱা গৈছে।
নৱেম্বৰৰ ১০ তাৰিখে আৰম্ভ কৰা এই জৰীপ অহা বৰ্ষৰ জানুৱাৰি মাহৰ ৩১ তাৰিখে সম্পন্ন হ’ব বুলি জানিব পৰা গৈছে। এই জৰীপটো চিৰাং বন সংমণ্ডল আৰু নিউ হৰাইজন নামৰ এটা বেচৰকাৰী সংস্থাৰ সহযোগত ভাৰতীয় বন্যপ্ৰাণী সংস্থাই সম্পন্ন কৰিছিল।
উল্লেখ্য যে ২০১৬ৰ অসম চৰকাৰে আনুষ্ঠানিকভাৱে অন্তিম গেজেট নটিফিকেশ্যন জাৰি আৰু স্বাক্ষৰ কৰাৰ পাছত অধুনালুপ্ত মানস সংৰক্ষিত বনাঞ্চলৰ ৩৫০ বৰ্গ কিঃমিঃ এলেকাক আনুষ্ঠানিকভাৱে মানস ৰাষ্ট্ৰীয় উদ্যানৰ প্ৰথম সংযোজন হিচাপে ঘোষণা কৰা হয়।
ৰাষ্ট্ৰীয় উদ্যানখনৰ এই সংযোজনটো অৰণ্যখনৰ পূব অংশত অৱস্থিত আৰু ইয়াৰ পাৰিপাৰ্শিক অৱস্থা অধ্যয়নৰ বাবে জৰীপ আৰম্ভ কৰা হৈছে। এই জৰীপে ভৱিষ্যতৰ বাবে ৰাষ্ট্ৰীয় উদ্যানখনত বন্যপ্ৰাণী সংৰক্ষণৰ কৌশল অৱলম্বন কৰাত এটা অতি গুৰুত্বপূৰ্ণ ভূমিকা পালন কৰিব।
টেলিগ্ৰাফ কাকতত প্ৰকাশিত এটা প্ৰতিৱেদনত প্ৰকাশ পাইছে যে নতুনকৈ গঠন কৰা ৰাষ্ট্ৰীয় উদ্যানখনত এনে ধৰণৰ এইটো প্ৰথম জৰীপ।
কেমেৰা ট্ৰেপৰ ফটোত বিৰল প্ৰজাতিৰ ‘গ্ৰে পীক’ক ফীজেণ্ট’ নামৰ ম’ৰা পৰিয়ালৰ (Phasianidae)আৰু ‘ব্লেক ষ্টৰ্ক’ নামৰ বগলী পৰিয়ালৰ (ciconiidae) চৰাইৰ উপস্থিতি ধৰা পৰিছে। এই চৰাই দুটি মানস ৰাষ্ট্ৰীয় উদ্যানৰ বাবে অতি মূল্যৱান হিচাপে পৰিগণিত হৈছে।
এই প্ৰজাতি দুটাৰ উপৰিও এছিয়ান হাতী, গোধাফুটুকী বাঘ, সোণালী বান্দৰ, বনৰীয়া কুকুৰ, ভাৰতীয় গৌৰ, নাহৰফুটুকী বাঘ, কেকোৰা কোৱা নেউল, ছম্বৰ, বাৰ্কিং ডিয়েৰ আৰু হগ ডিয়েৰ আদি প্ৰজাতিৰ প্ৰাণী কেমেৰা ট্ৰেপিঙৰ ফটোত ধৰা পৰিছে।
ভৰতীয় বন্যপ্ৰাণী ন্যাসৰ সমন্বয়ক ভস্কৰ চৌধুৰীয়ে কৈছে, ‘‘কেমেৰা ট্ৰেপিঙত এলেকাটোৰ সম্পদশালী জৈৱ বৈচিত্ৰৰ কথা ধৰা পৰিছে। এই ক্ষেত্ৰত নীতি নিৰ্ধাৰক আৰু বিধায়কসকলে এই প্ৰজাতিসমূহক ভৱিষ্যতৰ প্ৰজন্মৰ বাবে সংৰক্ষণ কৰাৰ ক্ষেত্ৰত মনোযোগ দিব লাগে।
তেওঁ আৰু কৈছে যে জৰীপ সপূৰ্ণ হোৱালৈকে আৰু অধিক প্ৰজাতিৰ প্ৰাণীৰ উপস্থিতি ধৰা পৰাৰ সম্ভাৱনা আছে।
হিমালয়ৰ পাদদেশত অৱস্থিত মানস ৰাষ্ট্ৰীয় উদ্যানত বৈচিত্ৰপূৰ্ণ আৰু বিৰল প্ৰজাতিৰ প্ৰাণী আৰু উদ্ভিদ আছে। এই উদ্যানখন পপশ্চিম ৰেঞ্জ (পানবাৰীৰ ওচৰত), কেন্দ্ৰীয় ৰেঞ্জ (বৰপেটাৰোডৰ ওচৰৰ বাঁশবাৰী), আৰু পূৰ্বীয় (পাঠশালাৰ ওচৰৰ ভূঞাপাৰা) ৰেঞ্জত বিভক্ত।
