কানাডা, ফ্ৰান্সকে ধৰি ইউৰোপৰ বহুকেইটা শ্ৰমিক, মানৱ অধিকাৰ সংগঠন আৰু নাগৰিক সমাজে ভাৰতৰ কৃষক আন্দোলনলৈ সমৰ্থন জ্ঞাপন কৰিছে।
এটা যুটীয়া বিবৃত্তিযোগে তেওঁলোকে কয় যে ভাৰত চৰকাৰৰ কৃষি আইনকেইখনৰ খচৰা প্ৰস্তুত কৰোতে কৃষকসকলৰ কোনো প্ৰতিনিধিৰ স’তে কোনোধৰণৰ আলাপ-আলোচনা কৰা হোৱা নাছিল, আইনকেইখন দশক দশকধৰি বিভিন্ন চৰকাৰসমূহে প্ৰদান কৰি অহা প্ৰতিশ্ৰুতিসমূহৰ বিপৰীতে গৈছে।
সংগঠনসমূহে কয় যে আইন তিনিখনে বৃহৎ কৰ্পোৰেট শক্তিক চিধা-চিধিকৈ লাভান্বিত কৰিব, কিন্তু কৃষকসকলক লোকচান কৰিব।
‘‘চৰকাৰ আৰু ইয়াৰ প্ৰপাগাণ্ডা মেচিনটোৱে কৃষকসকলৰ দাবীসমূহৰ সমাধানৰ বাবে মনোযোগ নিদি প্ৰতিবাদটোক ধ্বংস কৰিব বিচাৰিছে’’- সংগঠনসমূহে আক্ষেপ প্ৰকাশ কৰে।
সমগ্ৰ বিশ্বৰ বাবেই কৃষক আন্দোলনটো এটা গৌৰৱপূৰ্ণ উদাহৰণ বুলি অভিহিত কৰি বিবৃত্তিটোত সংগঠনসমূহে কয় যে প্ৰতিবাদকাৰী কৃষকসকলৰ বীৰত্ব আৰু বলিদান সংগঠনসমূহৰ বলিষ্ঠ সমৰ্থন আৰু অশেষ কৃতজ্ঞতা লাভ কৰাৰ যোগ্য।
সংগঠনসমূহে মোদী চৰকাৰক ভাৰতৰ ইতিহাসৰ আটাইতকৈ কৰ্প’ৰেটৰ স্বাৰ্থত কাম কৰা চৰকাৰ বুলি অভিহিত কৰে।
আন্দোলনটোৰ বিশ্লেষণাত্মক মন্তব্য আগবঢ়াই সংগঠনকেইটাই কয় যে প্ৰতিবাদত পুৰুষৰ সমানেই নাৰীৰ অংশগ্ৰহণে উত্তৰ ভাৰতৰ পিতৃতান্ত্ৰিক ব্যৱস্থাক নাকচ কৰিছে।
বিবৃত্তিটোৰ শেষত সংগঠনকেইটাই কৃষি আইনকেইখন বাতিল কৰিবলৈ ভাৰত চৰকাৰৰ আগত দাবী জনায়।
হিন্দুজ ফৰ হিউমেন ৰাইটছ, কানাডিয়ান লেবাৰ কংগ্ৰেছ, কানাডিয়ান ইউনিয়ন অৱ প’ষ্টেল ৱৰ্কাৰ্ছ, কানাডিয়ান ইউনিয়ন অৱ পাব্লিক এম্প্ল’য়ীজ, আম্বেদকাৰীট বুদ্ধিষ্ট এচ’চিয়েচন অব টেক্সাছকে প্ৰায় পঞ্চাশটাকৈ সংগঠনে বিবৃত্তিটোত নিজৰ নামসমূহ সন্নিৱিষ্ট কৰিছে।
