অসমৰ বিশিষ্ট কাৰ্টুনিষ্ট ত্ৰৈলক্য দত্তৰ বুধবাৰে নিশা ৯০ বছৰ বয়সত পৰলোকপ্ৰাপ্তি ঘটে।
বাৰ্ধ্যজনিত ৰোগত আক্ৰান্ত হৈ গুৱাহাটী চিকিৎসা মহাবিদ্যালয় হস্পিটেলত শেষ নিশ্বাস ত্যাগ কৰে বিশিষ্ট শিল্পী গৰাকীয়ে।
১৯৩০ চনত বজালীৰ ৰতনপুৰ গাঁৱত জন্মগ্ৰহণ কৰা ত্ৰৈলক্য দত্তই অসমৰ কাৰ্টুন জগতক এক নতুন মাত্ৰা প্ৰদান কৰিছিল।
কলিকতাৰ চাৰুকলা মহাবিদ্যালয়ত চিত্ৰ শিল্পৰ শিক্ষা গ্ৰহণ কৰা ত্ৰৈলক্য দত্তই পৰৱৰ্তী সময়ত অসমৰ সংবাদ জগতৰ সৈতে জড়িত হৈ পৰে।
ত্ৰৈলক্য দত্তই ৰামধেনু আলোচনীৰ লগতে দৈনিক অসম বাতৰি কাকতৰ সৈতেও জড়িত হৈ আছিল।
দৈনিক অসম কাকতত দত্তই কাহুঁদী শিৰোনামাৰে অংকন কৰা কাৰ্টুন সমূহ অসমৰ প্ৰতিগৰাকী লোকৰ মনত সজীৱ হৈ আছে।
অসম চৰকাৰৰ শিল্পী পেঞ্চন লাভ কৰা শিল্পী গৰাকীয়ে ২০০৮ চনত বিষ্ণু ৰাভা বঁটা, ২০১৩ চনত অমূল্য কাকতি বঁটাৰ লগতে শোণিত কোঁৱৰ গজেন বৰুৱা বঁটা লাভ কৰিছিল।
