দেওবাৰে নগাঁৱত এখন সংবাদমেল আয়োজন কৰি কেন্দ্ৰীয় ৰে’ল ৰাজ্য মন্ত্ৰী ৰাজেন গোঁহাইৰ লগতে নগাঁও আৰক্ষীৰ বিৰুদ্ধে সোচ্ছাৰ হৈ পৰে কৃষক শ্ৰমিক উন্নয়ন পৰিষদ অসমৰ কেন্দ্ৰীয় সমিতিৰ সভাপতি প্ৰদীপ কলিতা আৰু সংগঠনটোৰ অন্য নেতৃত্ব।
কেন্দ্ৰীয় ৰে’ল ৰাজ্য মন্ত্ৰী তথা নগাঁও লোকসভা সমষ্টিৰ সাংসদ ৰাজেন গোহাঁইৰ বিৰুদ্ধে ধৰ্ষণৰ দৰে গুৰুতৰ অভিযোগ উত্থাপন হোৱা তথা গোচৰ পঞ্জীয়নভূক্ত হোৱাৰ ১৮ দিন উকলি যোৱাৰ পিছতো নগাঁও আৰক্ষীয়ে গোঁহাইক সোধা পোচা নকৰাক লৈ এতিয়া সকলো দল সংগঠন জাঙুৰ খাই উঠা পৰিলক্ষিত হৈছে।
ইয়াৰ উপৰি নগাঁও আৰক্ষীৰ পক্ষপাতদুষ্ট ভূমিকাৰ বাবেই এতিয়া নিজৰ ন্যায় প্ৰাপ্তিৰ ক্ষেত্ৰত চৰম অনিশ্চয়তাত ভুগিব লগীয়া হৈছে ভুক্তভোগীৰ পৰিয়াল।
কেন্দ্ৰীয় ৰে’ল ৰাজ্য মন্ত্ৰী ৰাজেন গোহাঁইক “অসমৰ ৰাজনৈতিক জগতৰ সৰ্বকালৰ নিকৃষ্ট আৰু কলংকিত ব্যক্তি” আখ্যা দি কৃষক-শ্ৰমিক উন্নয়ন পৰিষদ অসমৰ সভাপতি প্ৰদীপ কলিতাই কয় -“এই গৰাকী ৰাজেন গোহাঁইৰ বিৰুদ্ধে জিলাখনৰ এগৰাকী মহিলাই যৌন নিৰ্যাতনৰ অভিযোগ তুলি নগাঁও সদৰ আৰক্ষী থানাত এজাহাৰ দাখিল কৰিছিল। এজাহাৰ দাখিল কৰাৰ পাছত গোহাঁইৰ বিৰুদ্ধে গোচৰ পঞ্জীয়ন হোৱাৰ পিছতো নগাঁও আৰক্ষীয়ে তেওঁক গ্ৰেপ্তাৰ কৰাটো দূৰৈৰ কথা সামান্যতম সোধা পোচা কৰিবলৈকো সাহস গোটাব পৰা নাই। যিটো অতি দুৰ্ভাগ্যজনক বিষয়’।
সংবাদমেলত কলিতাই ৰাজেন গোহাঁইৰ নব্বৈ দশকৰ কেতবোৰ নাৰী কেলেংকাৰীৰ কথাও উল্লেখ কৰে। কলিতাই কয়- “যদিহে অহা বৃহস্পতি বাৰৰ ভিতৰত ৩৭৬ ধাৰা মৰ্মে আৰক্ষীয়ে ৰাজেন গোহাঁইক গ্ৰেপ্তাৰ নকৰে তেন্তে শনিবাৰৰ পৰা পৰিষদে নগাঁৱত বিভিন্ন আন্দোলনৰ কাৰ্যসূচী গ্ৰহণ কৰিব।
আৰক্ষীয়ে গোহাঁইক গ্ৰেপ্তাৰ নকৰা পৰ্যন্ত সংগঠনটোৱে নগাঁৱত এই আন্দোলনৰ কাৰ্যসূচী অব্যাহত ৰাখিব বুলিও কলিতাই সংবাদ মেলত হুংকাৰ দিয়ে। সংবাদ মেলত কৃষক শ্ৰমিক উন্নয়ন পৰিষদৰ জিলা সমিতিৰ সভাপতি প্ৰদীপ শইকীয়া, সাধাৰণ সম্পাদক অম্লান জ্যোতি মহন্ত, কেন্দ্ৰীয় সমিতিৰ যুটীয়া সম্পাদক উৎপল বৰুৱাও উপস্থিত থাকে।
আনহাতে, শনিবাৰে অবিভক্ত নগাঁও জিলাৰ ডবকাতো কৃষক মুক্তি সংগ্ৰাম সমিতিয়ে কেন্দ্ৰীয় ৰে’ল ৰাজ্য মন্ত্ৰী ৰাজেন গোঁহাইক গ্ৰেপ্তাৰৰ দাবীত প্ৰতিবাদ সাব্যস্ত কৰাৰ লগতে গোহাঁইৰ পুত্তলিকাও দাহ কৰা পৰিলক্ষিত হয়।
উল্লেখ্য যে কেন্দ্ৰীয় ৰে’ল ৰাজ্য মন্ত্ৰী ৰাজেন গোহাঁইৰ বিৰুদ্ধে বিজেপি দলৰেই ভাতৃ সংগঠন বিজেপি যুৱ মৰ্চাৰ নগাঁও জিলা সমিতিৰ এজন সক্ৰিয় সদস্যৰ ২০/২২ বছৰীয়া পত্নীয়ে ধৰ্ষণৰ অভিযোগ তুলি নগাঁও সদৰ আৰক্ষী থানাত এজাহাৰ দাখিল কৰিছিল। আৰু তেতিয়াৰে পৰা নগাঁৱলৈ অহা নাই কেন্দ্ৰীয় মন্ত্ৰীজন।
তেওঁৰ নগাঁও আগমনৰ লগে লগেই বিভিন্ন দল সংগঠনে প্ৰতিবাদৰে নগাঁও কঁপাই তোলাৰ বাবে শংকাতেই তেওঁৰ দিল্লীৰ পৰা নগাঁৱলৈ অহা নাই বুলি ৰাইজৰ মাজৰ চৰ্চা আৰম্ভ হৈছে।
ইপিনে, গোহাঁইৰ বিৰুদ্ধে উত্থাপিত ধৰ্ষণৰ দৰে গুৰুতৰ অভিযোগৰ সন্দৰ্ভত ৰাজ্যিক বিজেপি আৰু দলৰ হাইকামাণ্ড জ্ঞাত হোৱাৰ পিছতো এই পৰ্যন্ত কোনো ধৰণৰ প্ৰতিক্ৰিয়া প্ৰকাশ নকৰাত ৰাইজৰ মাজত অসন্তুষ্টি জোৱাৰ উঠিছে। এই গোচৰটোৰ সন্দৰ্ভত নগাঁও জিলা বিজেপি, নগাঁও জিলা অগপ, জিলা কংগ্ৰেছৰ মৌনতাও ৰহস্যৰ সৃষ্টি কৰিছে।