তিনিচুকীয়া জিলাৰ মাৰ্ঘেৰিটাৰ এটা পেট্ৰ’ল পাম্পত আজি সংঘটিত হোৱা এক ৰহস্যজনক চুৰি কাণ্ডই চাঞ্চল্যৰ সৃষ্টি কৰিছে।
প্ৰাপ্ত খবৰ অনুসৰি ইণ্ডিয়ান অইল কোম্পানিৰ মাৰ্ঘেৰিটা চাংলাং তিনিআলিস্থিত ‘ইষ্টাৰ্ণ উড প্ৰডাক’ নামৰ পেট্ৰ’ল পাম্পটোৰ টকা জমা ৰখা লকাৰৰ পৰা প্ৰায় ৭লাখৰো অধিক ধন হৰলুকী হয়।
উল্লেখ্য যে পূজা উপলক্ষে বেংক বন্ধ থকাৰ বাবে সমস্ত ধন পেট্ৰ’ল পাম্পটোৰ লকাৰত ৰাখিছিল। কিন্তু আজি পুৱা পেট্ৰ’ল পাম্পটোৰ মালিকে ধন সমূহ বেংকত জমা দিবৰ বাবে পেট্ৰ’ল পাম্পটোৰ কৰ্মচাৰীক নিৰ্দেশ দিয়াতহে এই সমগ্ৰ ঘটনা পোহৰলৈ আহে।
ঘটনাৰ খবৰ পাই মাৰ্ঘেৰিটা আৰক্ষীয়ে পেট্ৰ’ল পাম্পটোৰ মেনেজাৰক থানালৈ সোধা পোচাৰ বাবে আনিছিল যদিও পৰৱৰ্তী সময়ত পাম্পটোৰ মালিকে মাৰ্ঘেৰিটা আৰক্ষী থানাত উপস্থিত হৈ আৰক্ষী জিম্মাৰ পৰা মেনেজাৰক মুকলি কৰে।
মাৰ্ঘেৰিটা আৰক্ষীৰ প্ৰাথমিক তদন্তত এই বৃহৎ পৰিমাণৰ টকা চুৰি ঘটনাত পেট্ৰ’ল পাম্পটোৰ কৰ্মচাৰী জড়িত থকাৰ সন্দেহ কৰিছিল যদিও মালিকৰ কৰ্ম-কাণ্ডই ৰহস্যৰ সৃষ্টি কৰিছে। ইয়াৰ উপৰি বাতৰি প্ৰেৰণ কৰালৈকে পেট্ৰ’ল পাম্পৰ মালিকপক্ষই কোনো ধৰণৰ এজাহাৰ দাখিল কৰা নাই।
আনহাতে সংবাদ মাধ্যমে সমগ্ৰ ঘটনা জানিব পাৰি পাম্প কৰ্তৃপক্ষৰ সৈতে যোগাযোগ কৰাত কৰ্মচাৰীয়ে সংবাদ পৰিৱেশন নকৰিবলৈ অনুৰোধ কৰাৰ লগতে ধনেৰে মেনেজ কৰাৰ চেষ্টা কৰে সাংবাদিক সকলক। যাৰ বাবে ঘটনাটো এতিয়া অধিক ৰহস্যৰ আৱৰ্তত সোমাই পৰিছে।
উল্লেখ্য যে প্ৰায় ডেৰ বছৰে উক্ত পেট্ৰ’ল পাম্পটোৰ চিচি টিভি কেমেৰাও বিকল হৈ আছে। মাৰ্ঘেৰিটা আৰক্ষীয়ে কেইবাবাৰো চিচি টিভি কেমেৰা সক্ৰিয় কৰিবলৈ কৈ আহিছিল যদিও মালিক পক্ষই এইক্ষেত্ৰত গুৰুত্ব নিদিয়াৰ অভিযোগ উত্থাপিত হৈছে।
আন এক সূত্ৰই জানিবলৈ দিয়া অনুসৰি কিছুদিন পূৰ্বে ‘ইষ্টাৰ্ণ উড প্ৰডাক’ নামৰ পেট্ৰ’ল পাম্পটোৰ স্বত্বাধিকাৰিক অজ্ঞাত উগ্ৰপন্থীয়ে ফোন যোগে ধন দাবী কৰিছিল। এই ঘটনাও ৰহস্যজনক ভাৱে সংবাদ মাধ্যমৰ পৰা গোপনে ৰাখিছিল পেট্ৰ’ল পাম্পটোৰ মালিকপক্ষই।
ইফালে চোৰাং কয়লা মাফিয়াই এই পেট্ৰ’ল পাম্পটোৰ জৰিয়তে চোৰাং কয়লা সৰবৰাহত ব্যৱহাৰ হোৱা বিভিন্ন গাড়ীত তেল ভৰাই ব্যৱসায় কৰাৰ অভিযোগ থকাৰ লগতে পাম্পটোৰ মালিকৰ বহু অবৈধ ব্যৱসায় আছে বুলিও আন একাংশই অভিযোগ আনিছে।
এনে বহু ৰহস্যজনক কাৰণতে চিচি টিভি সমূহ বিকল কৰি ৰখাৰ লগতে কেচু খান্দোতে সাপ ওলোৱাৰ ভয়তেই ৰহস্যজনকভাৱে পেট্ৰ’ল পাম্পটোৰ চুৰি কাণ্ডটো গাপ দিয়াৰ চেষ্টা অব্যাহত ৰাখিছে মালিকপক্ষই।