বৰ্তমান স্বাতী ভাৰ্গৱ দেশৰ অন্যতম সফল মহিলা উদ্যোগী। স্বাতী তেওঁৰ বিৰাট কৰ্পৰেট কেৰিয়াৰৰ পিছত তেওঁ আৰু স্বামী ৰোহনে ভাৰতৰ সৰ্ববৃহৎ কেছবেক পৰ্টেল Cashkaro মুকলি কৰে। ২০১৬ চনত ৰতন টাটাই এই কোম্পানীত ধন বিনিয়োগ কৰিছিল। কোম্পানীটোৰ মুঠ ব্যৱসায়িক মূল্য (GMV) ইতিমধ্যে যোৱা বছৰ ৪ হাজাৰ কোটি টকা অতিক্ৰম কৰিছে।
গ্ৰছ মাৰ্চেণ্ডাইজ ভেলু বা GMV হৈছে এটা নিৰ্দিষ্ট সময়ছোৱাত ই-কমাৰ্চ প্লেটফৰ্মৰ জৰিয়তে বিক্ৰী হোৱা সামগ্ৰীৰ মুঠ মূল্য। মূলতঃ Cashkaro-ৱে ই-কমাৰ্চ পৰ্টেলৰ গ্ৰাহকসকলক তেওঁলোকৰ বেংক একাউণ্টত কেছবেকৰ সুবিধা প্ৰদান কৰে। ইয়াৰ উপৰিও তেওঁলোকে উপহাৰ ভাউচাৰৰ সুবিধাও প্ৰদান কৰে। যোৱা বছৰ কোম্পানীটোৰ ৰাজহ সংগ্ৰহ আছিল ২২৫ কোটি টকা।
স্বাতী ভাৰ্গৱ আম্বালাৰ বাসিন্দা। দশম শ্ৰেণীত হাৰিয়ানাৰ টপাৰ হয়। একাদশ আৰু দ্বাদশ মান পঢ়া-শুনা সম্পূৰ্ণ কৰিবলৈ তেওঁ বৃত্তি লৈ ছিংগাপুৰলৈ যায়। দশম শ্ৰেণীৰ পৰীক্ষাত স্বাতীয়ে গণিতত ১০০ নম্বৰ পাইছিল। পিছলৈ লণ্ডন স্কুল অৱ ইকনমিক্সৰ পৰা অৰ্থনীতি আৰু গণিত বিষয়ত স্নাতক ডিগ্ৰী লাভ কৰে।
স্বাতীয়ে ২০০৫ চনৰ পৰা ২০১০ চনৰ ভিতৰত গোল্ডমেন চ্যেক্সত কাম কৰিছিল। তাৰ পিছত তেওঁ নিজাকৈ ব্যৱসায় আৰম্ভ কৰাৰ সিদ্ধান্ত লয়। ২০০৯ চনত ৰোহন নামৰ ইনভেষ্টমেণ্ট বেংকাৰজনৰ সৈতে বিবাহপাশত আবদ্ধ হয়। এই ক্ষেত্ৰত তেওঁলোকে হানিমুনৰ পৰিকল্পনা কৰাৰ সময়ত কেছবেক ৱেবছাইটৰ জৰিয়তে ব্ৰিটেইনলৈ বিমান বুকিং কৰি আছিল। তাত তেওঁলোকে বহুত টকা ৰাহি কৰে। তাৰ পৰাই তেওঁ নিজৰ ষ্টাৰ্টআপৰ ধাৰণাটো পাইছিল। স্বাতীয়ে ব্ৰিটেইনত Pouring Pounds নামৰ কেছবেক ৱেবছাইট এটা তৈয়াৰ কৰে।
তেওঁ ২০১৩ চনত ভাৰতত ১৭ জন কৰ্মচাৰী আৰু ইন্টাৰ্ণৰ সৈতে একেধৰণৰ কোম্পানী এটা আৰম্ভ কৰে। যাৰ নাম ৰখা হয় Cashkaro। ২০১৪ চনত স্বাতীয়ে ধন সংগ্ৰহৰ আশাত লণ্ডন স্কুল অৱ ইকনমিক্সৰ ছিনিয়ৰ আৰু বন্ধু-বান্ধৱীৰ কাষ চাপিছিল। ৪৮ ঘণ্টাৰ ভিতৰতে তেওঁলোকে নিজৰ উদ্দেশ্যৰ দুগুণ ধন লাভ কৰে। কেৱল সেয়াই নহয়, ২০১৫ চনত তেওঁলোকে কালাৰী কেপিটেলৰ পৰা ২৫ কোটি টকা সংগ্ৰহ কৰিছিল।
স্বাতী আৰু ৰোহনৰ সাংঘাতিক বুজাবুজি আৰু কঠোৰ পৰিশ্ৰমৰ বাবে দেশত Cashkaro-ৱে জনপ্ৰিয়তা লাভ কৰিবলৈ আৰম্ভ কৰে। ইফালে ২০১৬ চনত ৰতন টাটাইও এই কোম্পানীত বিনিয়োগ কৰিছিল। মুম্বাইৰ তাজ হোটেলত তেওঁলোকে টাটাক লগ পাইছিল। য’ত টাটাই কৈছিল, “যিখন দেশত সকলোৱে টকা সঞ্চয় কৰি ভাল পায়, সেইখন দেশত আপুনি বিনামূলীয়াকৈ টকা দি আছে।”
Cashkaro ৰ এটা সহজ ব্যৱসায়িক মডেল আছে। তেওঁলোকে খুচুৰা অংশীদাৰৰ পৰা ৫ৰ পৰা ১০ শতাংশ কমিচন পায়। এই ক্ষেত্ৰত তেওঁলোকে এই সুবিধা তেওঁলোকৰ গ্ৰাহকলৈ প্ৰেৰণ কৰে। ইয়াৰ দ্বাৰা দুয়োপক্ষই লাভৱান হয়।
এই সন্দৰ্ভত স্বাতী ভাৰ্গৱে নিজৰ লিংকডইন প্ৰফাইলত লিখিছে, “CashKaro ৰ ১৮ মিলিয়নতকৈ অধিক ডাউনলোড হৈছে। ই একমাত্ৰ ভিচি সমৰ্থিত কেছবেক চাইট যিয়ে কালাৰি কেপিটেলৰ নেতৃত্বত ছিৰিজ এ ফাণ্ডিং আৰু কোৰিয়া ইনভেষ্টমেণ্ট পাৰ্টনাৰ্ছৰ নেতৃত্বত ছিৰিজ বি ফাণ্ডিঙৰ জৰিয়তে ১৫ মিলিয়ন ডলাৰ সংগ্ৰহ কৰিছে। ইয়াৰ বাৰ্ষিক বিক্ৰী ৫০ কোটি ডলাৰ অতিক্ৰম কৰে। টাটা ছঞ্চৰ প্ৰাক্তন অধ্যক্ষ ৰতন টাটাৰ পৰাও আমি বিনিয়োগ পাইছো।”
