শিৱসাগৰত আজি পুৱা চি বি আইৰ উপ-অধীক্ষক টি এল জামালৰ নেতৃত্বত অহা ৪০ জনীয়া এটা দলে কেমিকেল চোৰাং ব্যৱসায়ীৰ ঘৰত অতৰ্কিতে অভিযান চলায়।
চি বি আইৰ দলটোৱে আজি পুৱা দৰিকাপাৰৰ এন আৰ এল পে’ট্ৰল পাম্পৰ সমীপৰ বাবুল দিহিঙীয়াৰ ঘৰত আৰু ষ্টেশ্যন চাৰিআলিৰ হংসৰাজ ভৱনত থকা সঞ্জীৱ কাকতিৰ মালিকনাধীন উদিপ্তা এনাৰ্জীৰ নামৰ ব্যৱসায়িক প্ৰতিষ্ঠানতো অভিযান চলায়।
গুৱাহাটী আৰু শ্বিলং কাৰ্যালয়ৰ পৰা পূৰ্বতে ৰুজু হোৱা কেমিকেল চুৰি সংক্ৰান্তীয় এক গোচৰৰ ভিত্তিতেই চি বি আইৰ দলটোৱে অভিযান চলায় বুলি জানিব পৰা গৈছে।
উল্লেখযোগ্য যে বিগত সময়ছোৱাত শিৱসাগৰ আৰক্ষীয়ে অ’নজিচিৰ চোৰাং কেমিকেল মাফিয়াৰ বিৰুদ্ধে যুদ্ধংদেহি স্থিতি গ্ৰহণ কৰাৰ পাছতেই কেন্দ্ৰীয় পে’ট্ৰলিয়াম মন্ত্ৰীৰ নিৰ্দেশত চোৰাং কেমিকেল মাফিয়াৰ বিৰুদ্ধে চিবিআইৰ ওচৰত এটা গোচৰ ৰুজু কৰিছিল।
উক্ত গোচৰৰ ভিত্তিতেই যোৱা ২৮ মাৰ্চত চি বি আইৰ এটা বৃহৎ দলে ওৰে নিশা বাবুল দিহিঙ্গীয়াৰ গোদামত অভিযান চলাই দুখন কেমিকেল ভৰ্তি ট্ৰাক সহ দুই কোটি টকাৰ অ’এনজিচিৰ চুৰি কেমিকেল জব্দ কৰিছিল।
আনহাতে বিগত সময়ছোৱাত এনজিচিৰ চোৰাং কেমিকেল বেহাৰ সৈতে ব্যৱসায়ী সঞ্জীৱ কাকতিৰ দৰে কোটিপটি ব্যৱসায়ীয়ে বাবুল দিহিঙ্গীয়াৰ চোৰাং বেহাৰ সৈতে আঁৰত থাকি নেতৃত্ব দিয়া বুলি অভিযোগ উত্থাপন হৈছিল।
তাৰোপৰি বাবুল দিহিঙীয়াই চুৰি কৰি অনা নিগমৰ বাবে আবণ্টিত কোটি কোটি টকাৰ বেন্টনাইড, কে চি এল (পটাছিয়াম ক্লৰাইড), ক্লাষ্টিক চ’ডা, বৰিক এছিড, পলিমাৰ শ্ৰেণীৰ কেমিকেল সমূহ শিৱসাগৰতে ৰি পেকেজিং কৰি আন যোগনীয়াৰ সহায়ত অ’এনজিচিক যোগান ধৰি অহা বুলি এক গুৰুতৰ অভিযোগ উত্থাপন হৈছে।
যাৰ বাবে আজি বাবুল দিহিঙীয়া আৰু সঞ্জীৱ কাকতিৰ বাসভৱন, ব্যৱসায়িক প্ৰতিষ্ঠানৰ লগতে সঞ্জীৱ কাকতিৰ গাণনিকজনৰ মেলাচকৰৰ বাসগৃহতো চিবিআইৰ দলটোৱে দীৰ্ঘ সময় ধৰি তালাচী অভিযান চলায়।
চি বি আইৰ এই অভিযানৰ পিছত কোনো ব্যক্তিক আটক কৰা নাই আৰু কোনো ধৰণৰ সামগ্ৰী, নথিপত্ৰ জব্দ কৰা নাই বুলি জানিব পৰা গৈছে।
ইফালে চোৰাং কেমিকেলৰ বিৰুদ্ধে চি বি আইয়ে অভিযান চলাই থকাৰ সময়তেই আইকৰ বিভাগে নগৰৰ বিজি ৰোডৰ মাংগিলাল ডালমিয়াৰ মালিকনাধীন দুৰ্গা হাৰ্ডৱেৰত অভিযান চলায়। অৱশ্যে এই অভিযান সন্দৰ্ভত আয়কৰ বিভাগে সংবাদ মাধ্যমৰ মন্তব্য দিয়াৰ পৰা বিৰত থাকে।
