বাওঁ গোট আৰু বিজেপিয়ে মঙলবাৰে কলকাতাৰ আৰ জি কৰ মেডিকেল কলেজ এণ্ড হস্পিতালৰ কৰ্তৃপক্ষই কেম্পাছত এগৰাকী কনিষ্ঠ চিকিৎসকক ধৰ্ষণ আৰু হত্যাৰ সৈতে জড়িত প্ৰমাণৰ লগত হেৰাফেৰি কৰাৰ চেষ্টা কৰাৰ অভিযোগ উত্থাপন কৰে।
ইণ্ডিয়ান এক্সপ্ৰেছৰ এক প্ৰতিবেদন অনুসৰি মঙলবাৰে চিপিআই (এম)ৰ সৈতে জড়িত ভাৰতীয় ডেম’ক্ৰেটিক ইউথ ফেডাৰেচন (ডি ৱাই এফ আই) আৰু ভাৰতৰ ছাত্ৰ ফেডাৰেচন-(এছ এফ আই)এ চিকিৎসালয়খনৰ জৰুৰীকালীন ভৱনৰ গেটত একত্ৰিত হৈ প্ৰতিবাদ সাব্যস্ত কৰে। তেওঁলোকে অভিযোগ কৰে যে প্ৰমাণ ধ্বংস কৰি প্ৰকৃত দোষীক লুকুৱাই ৰখাৰ প্ৰচেষ্টা চলোৱা হৈছে।
ইফালে বাওঁপন্থী সংগঠন জইণ্ট ফ’ৰাম অৱ ডাক্তৰছৰ সৈতে জড়িত এজন চিকিৎসকে দাবী কৰিছে যে মৰণোত্তৰ পৰীক্ষাৰ প্ৰতিবেদনৰ কিছু তথ্যৰ পৰা অনুমান কৰা হৈছে যে ভুক্তভোগীগৰাকীক এজনতকৈ অধিক লোকে ধৰ্ষণ কৰিব পাৰে।
মৰণোত্তৰ পৰীক্ষাৰ প্ৰতিবেদন দেখাৰ সময়ত ভুক্তভোগীৰ পৰিয়ালৰ সৈতে থকা ডাঃ সুৱৰ্ণ গোস্বামীয়ে কয় যে- ‘এইটো স্পষ্ট যে এইটো এজন ব্যক্তিৰ কাম নহয়… তাইক দলবদ্ধ ধৰ্ষণ কৰা হৈছিল।’
৩১ বছৰীয়া এগৰাকী চিকিৎসকক ধৰ্ষণ আৰু হত্যাৰ গোচৰত ইতিমধ্যে গ্ৰেপ্তাৰ কৰিছে অসামৰিক স্বেচ্ছাসেৱক সঞ্জয় ৰয়ক।
এই গোচৰে সমগ্ৰ দেশতে চাঞ্চল্যৰ সৃষ্টি কৰিছে আৰু বহু চিকিৎসালয়ৰ চিকিৎসকে প্ৰতিবাদ সাব্যস্ত কৰিছে।
মঙলবাৰে আৰ জি কাৰ চিকিৎসা মহাবিদ্যালয়ত প্ৰতিবাদত অংশগ্ৰহণ কৰি ডি ৱাই এফ আইৰ ৰাজ্যিক সম্পাদক মীনাক্ষী মুখাৰ্জীয়ে কয় যে, ‘আমি বিশ্বাস কৰোঁ যে টি এম চি চৰকাৰে প্ৰকৃত দোষীক লুকুৱাবলৈ চেষ্টা কৰিছে। আমি চিকিৎসালয় আৰু চিকিৎসা মহাবিদ্যালয়ৰ বিষয়াসকলক গোচৰৰ প্ৰমাণৰ লগত খেলা-ধূলা কৰিবলৈ নিদিওঁ। এই কাম কৰিবলৈ তেওঁলোকে অহৰহ চেষ্টা কৰি আছে।’
সূত্ৰ অনুসৰি, শনিবাৰে চিকিৎসালয় কৰ্তৃপক্ষই এটা কোঠা আৰু কাষৰ মহিলাৰ শৌচাগাৰটো ভাঙি পেলোৱাৰ নিৰ্দেশ দিছিল – যিটো দুয়োটা চেমিনাৰ কক্ষৰ পৰা মাত্ৰ কেইফুটমান দূৰত আছিল। তেওঁ কয় যে বুকুৰ চিকিৎসা বিভাগত ছাত্ৰ-ছাত্ৰীসকলে জিৰণি লোৱা ঠাইৰ দাবীৰ পিছতে এই কাম কৰা হৈছে।
কিন্তু চিকিৎসকৰ মৃতদেহ উদ্ধাৰৰ মাত্ৰ এদিন পাছতে অট্টালিকাটো ভাঙি পেলোৱাৰ নিৰ্দেশ অহাৰ লগে লগে কৰ্তৃপক্ষই প্ৰমাণৰ লগত খেলা-ধূলা কৰাৰ চেষ্টা চলোৱাৰ অভিযোগ উত্থাপন হৈছে।
বিজেপিৰ বিধায়ক তথা বিধানসভাৰ বিৰোধী নেতা সুবেন্দু অধিকাৰীয়ে কয়, ‘ইতিমধ্যে তেওঁলোকে বহু প্ৰমাণৰ লগত খেলা কৰিছে। অনতিপলমে চিবিআইয়ে গোচৰটো হাতত ল’ব লাগে। আমি ইতিমধ্যে ৰাজ্যৰ মুখ্যমন্ত্ৰী আৰু গৃহমন্ত্ৰী মমতা বেনাৰ্জীৰ পদত্যাগৰ দাবী জনাইছো।
আৰ জি কৰ মেডিকেল কলেজত পোষ্ট কৰা এজন আৰক্ষী বিষয়াই কয়, ‘মঙলবাৰে পুৱা ৰাষ্ট্ৰীয় মহিলা আয়োগৰ এটা দল পি অ’ (অপৰাধস্থলী) চাবলৈ আহিছিল। অপৰাধস্থলীৰ সমীপত নিৰ্মাণ কাৰ্য চলি থকা দেখি প্ৰতিবাদ সাব্যস্ত কৰে। ইয়াৰ পাছত অলপ সময়ৰ পিছতে SFI-DYFI সমৰ্থকসকলে প্ৰতিবাদ কৰিবলৈ আৰম্ভ কৰে।
পৰিয়ালৰ অধিবক্তা তথা চিপিআই (এম) নেতা বিকাশ ৰঞ্জন ভট্টাচাৰ্যই কয়, ‘পিডব্লিউডি (ৰাজহুৱা কাম বিভাগ)ৰ সহায় আৰু ৰাজ্য চৰকাৰৰ সেউজ সংকেত অবিহনে চিকিৎসা মহাবিদ্যালয় কৰ্তৃপক্ষই একো ভাঙিব বা নিৰ্মাণ কৰিব নোৱাৰে। গতিকে এই পদক্ষেপৰ আঁৰত যে ৰাজ্য চৰকাৰ আছিল সেয়া স্পষ্ট।
যোৱা কেইদিনমানৰ পৰা বিজেপি আৰু চিপিআই (এম)ৰ নেতাসকলে অভিযোগ উত্থাপন কৰি আহিছে যে ধৃত অভিযুক্ত সঞ্জয় ৰায়হে চিকিৎসকগৰাকীৰ ধৰ্ষণ আৰু হত্যাকাণ্ডৰ সৈতে জড়িত একমাত্ৰ ব্যক্তি নহয়। ইয়াৰ লগত জড়িত আন লোকসকলক বচাবলৈ চেষ্টা চলাইছে বুলি অভিযোগ উত্থাপন কৰিছে টিএমচিয়ে।
