কাইলৈ অৰ্থাৎ ২২ জানুৱাৰিৰ পুৱাৰ পৰা আৰম্ভ হ’ব দ্বাদশ উত্তৰ কাছাৰ পাৰ্বত্য স্বায়ত্ত শাসিত পৰিষদৰ সাধাৰণ নিৰ্বাচনৰ ভোট গণনা। কিন্তু ইয়াৰ মাজতে দেওবাৰে নিশা প্ৰায় ১১ বজাত হাফলং ডনবস্ক এইচ এছ স্কুলত বেলট বাকচ ৰখা ষ্ট্ৰং ৰুমৰ চিচি টিভি কেমেৰা বন্ধ হৈ যোৱাত এক উত্তপ্ত পৰিস্থিতিৰ সৃষ্টি হয়।
চি আৰ পি এফৰ দায়িত্বত থকা ষ্ট্ৰং ৰুম দুটাৰ চিচি টিভ কেমেৰা বন্ধ হোৱাৰ বিষয় সন্দৰ্ভত অৱগত হৈ বিভিন্ন ৰাজনৈতিক দলৰ নেতাসকল আহি ঘটনাস্থলীত উপস্থিত হয়। আৰু তেওঁলোকে এই ক্ষেত্ৰত প্রশাসনৰ ওপৰত সন্দেহ প্ৰকাশ কৰি এক উত্তপ্ত পৰিস্থিতিৰ সৃষ্টি কৰে।
অৱশ্যে আৰক্ষী অধীক্ষক প্ৰশান্ত শইকীয়া, জিলা ৰিটাৰ্নিং বিষয়া তথা জিলা উপায়ুক্ত আহি ঘটনাস্থলীত উপস্থিত হয়হি আৰু পৰিস্থিতি নিয়ন্ত্ৰণ কৰে।
‘চিচি টিভি কেমেৰাত যান্ত্ৰিক বিজুতি ঘটাৰ বাবে অলপ সময় বন্ধ হৈছিল। কিন্তু লগে লগে সেই কেমেৰা সচল হৈ পৰে।’ এই মন্তব্য কৰে ঘটনাস্থলীত উপস্থিত জিলা ৰিটাৰ্ণি বিষয়া তথা জিলা উপায়ুক্ত অমিতাভ ৰাজখোৱাই।