অযোধ্যাৰ ৰাম মন্দিৰত দানৰ ধন চুৰি হোৱা ঘটনাক লৈ সমগ্ৰ দেশতে তীব্ৰ প্ৰতিক্ৰিয়াৰ সৃষ্টি হৈছে আৰু এই চুৰিৰ অভিযোগত ইতিমধ্যে আঠজন লোকক গ্ৰেপ্তাৰ কৰা হৈছে। বিশেষ তদন্তকাৰী দলৰ ৰিপৰ্টত পোহৰলৈ আহিছে এই চুৰিৰ ভয়ংকৰ পৰিকল্পনা। জানিব পৰা মতে, চুৰিকাৰী সকলে অতি কৌশলেৰে মন্দিৰৰ চিচিটিভি কেমেৰাসমূহ ঢাকি দিছিল আৰু চুৰি কৰা ধনসমূহ প্ৰথমে শৌচালয়ত লুকুৱাই ৰাখিছিল। তাৰ পিছত সুযোগ বুজি সেই ধন মন্দিৰৰ বাহিৰলৈ উলিয়াই নি সকলোৰে মাজত ভগাই লৈছিল। আটাইতকৈ আচৰিত কথাটো হ’ল যে ২০২৪ চনত মন্দিৰ মুকলি হোৱাৰ পিছৰে পৰা এই চুৰি কাৰ্য চলি আছিল আৰু কেৱল চলিত বৰ্ষৰ ২৭ এপ্ৰিলৰ পৰা ৫ জুনৰ ভিতৰত প্ৰায় ৭০ বাৰকৈ চুৰি হোৱাৰ তথ্য পোহৰলৈ আহিছে।
জেৰাৰ সময়ত গ্ৰেপ্তাৰ হোৱা অভিযুক্ত টিনু যাদৱ আৰু সুভাষ শ্ৰীবাস্তৱে আন কেইবাজনো বেংক বিষয়াৰ নাম উল্লেখ কৰিছে। ইয়াৰ উপৰিও আন কেইবাজনো চৰকাৰী কৰ্মচাৰীও এই চক্ৰটোৰ সৈতে জড়িত থকাৰ সন্দেহ কৰা হৈছে। আৰক্ষীয়ে এই সকলোবোৰ দিশ গভীৰভাৱে পৰীক্ষা কৰি চাইছে আৰু দোষী সাব্যস্ত হ’লে এই চৰকাৰী কৰ্মচাৰীসকলৰ বিৰুদ্ধেও কঠোৰ ব্যৱস্থা গ্ৰহণ কৰাৰ ইংগিত পোৱা গৈছে।
বিশেষ তদন্তকাৰী দলে দাখিল কৰা ৰিপৰ্ট অনুসৰি, ৰাম মন্দিৰলৈ এতিয়ালৈকে ৩,৫০০ কোটিতকৈয়ো অধিক নগদ টকা আৰু অগণন সোণ-ৰূপৰ আ-অলংকাৰ দান হিচাপে আহিছে যদিও ইয়াৰে এক বৃহৎ অংশৰ কোনো হিচাপ পোৱা নাই। নগদ ধন আৰু গহণাৰ লগতে মন্দিৰৰ পৰা দানত পোৱা ৰূপৰ ভুষুণ্ডী কাউৰী এটাও নিৰুদ্দেশ হৈছে। বিভিন্ন সূত্ৰৰ মতে মন্দিৰৰ পৰা প্ৰায় ৭ৰ পৰা ৭.৫ কোটি টকা চুৰি হৈছে বুলি কোৱা হৈছে, অৱশ্যে চৰকাৰীভাৱে এই তথ্য এতিয়াও নিশ্চিত কৰা হোৱা নাই। বৰ্তমানলৈকে আৰক্ষীয়ে প্ৰায় ৭০ লাখ টকা উদ্ধাৰ কৰিবলৈ সক্ষম হৈছে আৰু আগন্তুক সময়ত উদ্ধাৰ হোৱা ধনৰ পৰিমাণ আৰু অধিক বৃদ্ধি পাব বুলি তদন্তকাৰী বিষয়াসকলে আশা প্ৰকাশ কৰিছে।
