তেজপুৰ বিশ্ববিদ্যালয়ৰ গণসংযোগ আৰু সাংবাদিকতা বিভাগে আজি এক গৌৰৱোজ্জ্বল ক্ষণত ভৰি দিলে। অসমীয়া কথাছবিৰ ৯১ সংখ্যক বৰ্ষপূতি আৰু বিভাগৰ প্ৰতিষ্ঠাৰ ২৫ বছৰীয়া ৰূপালী জয়ন্তী উপলক্ষে বিশ্ববিদ্যালয়ত এক বিশেষ চলচ্চিত্ৰ বিষয়ক কৰ্মশালা আৰু আলোচনাচক্ৰ সম্পন্ন হয়। এই অনুষ্ঠানত বিশিষ্ট চলচ্চিত্ৰ নিৰ্মাতা পাৰ্থজিত বৰুৱা আৰু আন্তঃৰাষ্ট্ৰীয় খ্যাতিসম্পন্ন পৰিচালিকা ৰীমা দাসে সমল ব্যক্তি হিচাপে অংশগ্ৰহণ কৰি ছাত্ৰ-ছাত্ৰীসকলৰ সৈতে মত বিনিময় কৰে। অনুষ্ঠানৰ আৰম্ভণিতে অসমীয়া ছবিৰ জন্মদাতা জ্যোতিপ্ৰসাদ আগৰৱালালৈ শ্ৰদ্ধা জনোৱাৰ লগতে জয়মতী আৰু ইন্দ্ৰমালতী ছবিৰ কিছু বিৰল দৃশ্য প্ৰদৰ্শন কৰা হয়। বিশেষকৈ জ্যোতিপ্ৰসাদ আগৰৱালাই শ্বিলঙৰ পৰা তেজপুৰলৈ ঘূৰি অহাৰ এক দুষ্প্ৰাপ্য ভিডিঅ’ই উপস্থিত সকলোকে আবেগিক কৰি তোলে।
কৰ্মশালাত অংশ লৈ পাৰ্থজিত বৰুৱাই তথ্যচিত্ৰ নিৰ্মাণৰ বিভিন্ন কাৰিকৰী আৰু সৃজনশীল দিশৰ ওপৰত আলোকপাত কৰে। তেওঁ কয় যে এখন ভাল তথ্যচিত্ৰৰ বাবে গভীৰ গৱেষণা আৰু স্পষ্ট দৃষ্টিভংগীৰ খুবেই প্ৰয়োজন। সামাজিক আৰু ৰাজনৈতিক বিষয়ক লৈ নিৰ্মাণ কৰা ছবিয়ে সমাজৰ প্ৰকৃত ছবিখন দাঙি ধৰিব পাৰে বুলি তেওঁ মত পোষণ কৰে। বৰুৱাই লগতে গণসংযোগ বিভাগৰ এই ২৫ বছৰীয়া গৌৰৱময় যাত্ৰাক লৈ এখন তথ্যচিত্ৰ নিৰ্মাণ কৰিবলৈ পৰামৰ্শ দিয়ে যাতে ভৱিষ্যতৰ ছাত্ৰ-ছাত্ৰীসকলে ইয়াৰ পৰা অনুপ্ৰেৰণা লাভ কৰিব পাৰে। তেওঁ তথ্যচিত্ৰক কেৱল মনোৰঞ্জনৰ মাধ্যম হিচাপে নলৈ জ্ঞান আহৰণ আৰু ইতিহাস সংৰক্ষণৰ আহিলা হিচাপে গ্ৰহণ কৰিবলৈ আহ্বান জনায়।
আনহাতে অলপতে বাৰ্লিন আন্তঃৰাষ্ট্ৰীয় চলচ্চিত্ৰ মহোৎসৱত নিজৰ নতুন ছবি নট এ হিৰোৰ বাবে সন্মান লাভ কৰা ৰীমা দাসক বিভাগৰ তৰফৰ পৰা উষ্ম সম্বৰ্ধনা জনোৱা হয়। ছাত্ৰ-ছাত্ৰীৰ সৈতে হোৱা অন্তৰংগ আলাপত তেওঁ কয় যে চলচ্চিত্ৰ নিৰ্মাণৰ বাবে দামী কেমেৰাতকৈও শক্তিশালী কাহিনীৰ অধিক প্ৰয়োজন। যদি কাৰোবাৰ মনত নিষ্ঠা আৰু কিবা এটা কৰাৰ হেঁপাহ থাকে, তেন্তে এটা মোবাইল ফোনেৰেও অস্কাৰ জয় কৰিব পৰা ছবি নিৰ্মাণ কৰিব পাৰি। তেওঁ নিজকে এগৰাকী আকস্মিক পৰিচালক বুলি অভিহিত কৰি কয় যে ছাত্ৰ-ছাত্ৰীসকলে কেৱল বঁটা বা সফলতাৰ পিছত দৌৰাতকৈ কামৰ প্ৰতি সততা ৰাখিব লাগে। আঞ্চলিক ছবিসমূহৰ বিশ্ব দৰবাৰত থকা সম্ভাৱনাৰ বিষয়েও তেওঁ বিশদভাৱে আলোচনা কৰে।
অনুষ্ঠানৰ শেষত বিভাগীয় মুৰব্বী ড০ মনোজ দেউৰীয়ে উপস্থিত সকলোকে ধন্যবাদ জ্ঞাপন কৰে। তেওঁ কয় যে ২০০১ চনত প্ৰতিষ্ঠা হোৱা এই বিভাগটোৱে যোৱা ২৫ বছৰত উত্তৰ-পূৰ্বাঞ্চলত সাংবাদিকতা আৰু গণসংযোগ শিক্ষাৰ ক্ষেত্ৰত এক বিশেষ স্থান দখল কৰিছে। ৰূপালী জয়ন্তী বৰ্ষৰ আৰম্ভণিৰ এই দিনটো অসমীয়া চলচ্চিত্ৰৰ ইতিহাসৰ সৈতে জড়িত হৈ থকাটো এক সুখৰ বিষয়। তেওঁ জানিবলৈ দিয়ে যে আগন্তুক দিনবোৰতো বিভাগৰ তৰফৰ পৰা দেশৰ বিভিন্ন প্ৰান্তৰ বিশেষজ্ঞসকলক আমন্ত্ৰণ জনাই এনে ধৰণৰ বহুতো সৃজনশীল কাৰ্যসূচী ৰূপায়ণ কৰা হ’ব। অনুষ্ঠানটোত বিশ্ববিদ্যালয়ৰ বহুসংখ্যক ছাত্ৰ-ছাত্ৰী আৰু শিক্ষক-কৰ্মচাৰী উপস্থিত থাকে।
