ক’ৰ’ণা মাহামাৰীয়ে নাগৰিকৰ জীৱনলৈ কঢ়িয়াই আনিছে মানসিক হতাশাগ্ৰস্ততা।
ল’কডাউনৰ ফলত ঘৰতে আৱদ্ধ হৈ পৰাৰ ফলত দেশৰ অসংখ্য লোক মানসিক অৱসাদগ্ৰস্ততাৰো স্বীকাৰ হৈছে।
আনকি দেশত এই মানসিক অৱসাদগ্ৰস্ততাৰ স্বীকাৰ হোৱা বহু লোকে আত্মহত্যাৰ পথো বাচি লৈছে।
দেশৰ মানসিক অৱসাদগ্ৰস্ত তথা হতাশাগ্ৰস্ত নাগৰিকৰ বাবে কেন্দ্ৰ চৰকাৰে এটা টল ফ্ৰী হেল্পলাইন নম্বৰ মুকলি কৰিছে।
১৮০০-৫৯৯-০০১৯ এই টল ফ্ৰী নম্বৰটোত ফোন কৰি মানসিক হতাশাগ্ৰস্ততাত ভোগা লোকে মনোবিদৰ পৰা পৰামৰ্শ আদি গ্ৰহণ কৰিব পাৰিব।
মনোবিদসকলে এই নম্বৰটোৰ দ্বাৰা প্ৰাথমিক চিকিৎসা, ডিচষ্ট্ৰেছ মেনেজমেন্ট, ইতিবাচক চিন্তাৰ আদিৰ বিষয়ে পৰমাৰ্শ প্ৰদান কৰিব।
স্বেচ্ছাসেৱী সংস্থা, পৰিবাৰ, বিশেষজ্ঞ তথা চিকিৎসা আদিৰ প্ৰয়োজন হ’লে এই নম্বৰটোত ফোন কৰিলে সেই সহায় লাভ কৰিবলৈ সক্ষম হ’ব ভুক্তভোগীয়ে।
এই নম্বৰটোত ১৩টা আঞ্চলিক ভাষাত সেৱা উপলব্ধ হ’ব। হিন্দী আৰু ইংৰাজীৰ বাহিৰেও তেলেগু, উড়িয়া, মালয়ালম, গুজৰাটী, পাঞ্জাৱী, কন্নড়, অসমীয়া, মাৰাঠী, উৰ্দু আৰু বাংলা ভাষাত সেৱা লাভ কৰিব।
এই নম্বৰটো বছৰৰ প্ৰতিটো দিনৰ ২৪ ঘণ্টাই কাৰ্যক্ষম হৈ থাকিব বুলি জনাইছে কেন্দ্ৰই।
এই সমগ্ৰ প্ৰক্ৰিয়াটোত ৬৬০ গৰাকী ক্লীনিকেল তথা ৰিহেব চাইক’লজিষ্ট আৰু ৬৬৮ গৰাকী মনোবিদ প্ৰতিটো ক্ষণতে পৰামৰ্শ দানৰ বাবে সাজু হৈ থাকিব।
