চলিত বিত্তীয় বৰ্ষত জিএছটি ঘাটি ২.৩৫ লাখ কোটি টকা। সেয়া পূৰণ কৰাৰ বাবে ৰাজ্যসমূহক দুটা বিকল্প দিছে জিএছটি কাউন্সিলে।
কেন্দ্ৰৰ এই প্ৰস্তাৱ সম্পৰ্কত বিচাৰ কৰাৰ বাবে ৰাজ্যসমূহক সাতদিনৰ সময় বান্ধি দিয়া হৈছে।
কেন্দ্ৰীয় বিত্ত মন্ত্ৰী নিৰ্মলা সীতাৰমনৰ অধ্যক্ষতাত বৃহস্পতিবাৰে জিএছটি কাউন্সিলৰ ৪১সংখ্যক বৈঠক অনুষ্ঠিত হয়।
বৈঠকৰ অন্তত কেন্দ্ৰীয় ৰাজহ সচিব অজয় ভূষণে জানিবলৈ দিয়ে কৰ’না ভাইৰাছ মহামাৰীৰ ফলত জিএছটি আদায়ত ব্যাপক লোকচান হৈছে।
কেন্দ্ৰৰ হিচাপ অনুসৰি, চলিত বিত্তীয় বৰ্ষত জিএছটিৰ বাবদ ৰাজ্যসমূহৰ ক্ষতিপূৰণৰ পৰিমান ৩লাখ কোটি টকা হ’ব।
ইয়াৰ ভিতৰত জিএছটিৰ আওতাৰ কৰৰ সৌজন্যত ৬৫,০০০কোটি টকা আদায় কৰিব পৰা যাব পাৰে।
বিত্তমন্ত্ৰীয়ে বাকী ২.৩৫লাখ কোটি টকাৰ ক্ষতিপূৰণ পূৰণ কৰি দিয়াৰ বাবে ৰাজ্যসমূহক দুটা বিকল্প দিয়া হৈছে বুলি জানিব দিয়ে।
প্ৰথম বিকল্প হিচাপে ৰিজাৰ্ভ বেংক অফ ইণ্ডিয়াৰ সৈতে আলোচনাৰ ভিত্তিত ৰাজ্যসমূহক এক নিৰ্দিষ্ট সময়সীমা দিয়া হ’ব। ইয়াৰ ভিতৰত সুতৰ হাৰ ৯৭,০০০কোটি টকা ঋণ লোৱাৰ সুযোগ পাব।
কৰ আদায়ৰ পৰা পাঁচ বছৰত (জিএছটি আৰম্ভৰ পাঁচ বছৰ অৰ্থাৎ ২০২২) সেই ধন পৰিশোধ কৰি দিয়া যাব।
দ্বিতীয় বিকল্প হিচাপে বিশেষ ‘উইণ্ডো’ৰ আওতাত ৰাজ্যসমূহে সম্পূৰ্ণ ২.৩৫লাখ কোটি টকাৰ ঋণ ল’ব পাৰিব।
বিত্ত মন্ত্ৰী সীতাৰমনে কয় যে বিকল্পৰ বিষয়ে চিন্তা-চৰ্চা কৰাৰ বাবে ৰাজ্যসমূহক সাতদিনৰ সময় দিয়া হৈছে। কেবল চলিত বিত্তীয় বৰ্ষৰ বাবেহে এই বিকল্প থাকিব। পৰৱৰ্তী বছৰত পৰিস্থিতি পৰ্যালোচনা কৰি চোৱা হ’ব।
