কেন্দ্ৰীয় বিত্তমন্ত্ৰী নিৰ্মলা সীতাৰমণে আজি নৱমবাৰৰ বাবে দেশৰ সাধাৰণ বাজেট দাখিল কৰে। স্বাধীন ভাৰতৰ ইতিহাসত প্ৰথমবাৰৰ বাবে দেওবাৰে দাখিল কৰা এই বাজেটত ভাৰতক বিশ্বব্যাপী ডিজিটেল আৰু ক্লাউড হাব হিচাপে গঢ়ি তোলাৰ দিশত কেতবোৰ যুগান্তকাৰী পদক্ষেপ গ্ৰহণ কৰা হৈছে।
বিত্তমন্ত্ৰীগৰাকীয়ে ঘোষণা কৰে যে ভাৰতত ডাটা চেণ্টাৰৰ জৰিয়তে বিশ্বজুৰি গ্ৰাহকক ক্লাউড সেৱা প্ৰদান কৰা বিদেশী কোম্পানীসমূহক ২০৪৭ চনলৈকে ‘টেক্স হলিডে’ (Tax Holiday) অৰ্থাৎ কৰ ৰেহাই প্ৰদান কৰা হ’ব। বাজেট ভাষণত তেওঁ উল্লেখ কৰে যে গুৰুত্বপূৰ্ণ ডিজিটেল আন্তঃগাঁথনি শক্তিশালী কৰাৰ লগতে ডাটা চেণ্টাৰ খণ্ডত বিনিয়োগ বৃদ্ধি কৰাৰ প্ৰয়োজন আছে।
অৱশ্যে, এই সুবিধা লাভ কৰিবলৈ চৰকাৰে এক বিশেষ চৰ্ত আৰোপ কৰিছে। এই কৰ ৰেহাই লাভ কৰিবলৈ বিদেশী কোম্পানীসমূহে ভাৰতীয় গ্ৰাহকক এজন ‘ভাৰতীয় পুনৰ বিক্ৰেতা সত্তা’ (Indian Reseller Entity)-ৰ জৰিয়তেহে সেৱা আগবঢ়াব লাগিব। ঘৰুৱা কোম্পানীসমূহক শক্তিশালী কৰাৰ লগতে স্থানীয় পৰিৱেশ তন্ত্ৰক প্ৰসাৰিত কৰাৰ লক্ষ্যৰে এই পদক্ষেপ লোৱা হৈছে।
তথ্য প্ৰযুক্তি (IT) সেৱাৰ শ্ৰেণীবিভাজন
বিত্তমন্ত্ৰীগৰাকীয়ে জনোৱা অনুসৰি, এতিয়াৰে পৰা ছফট্ ৱেৰ ডেভেল’পমেণ্ট, আই টি-সক্ষম সেৱা (ITES), ‘জ্ঞান ভিত্তিক সেৱা বাহ্যিক উৎসৰ পৰা সম্পন্ন কৰোৱা আৰু চুক্তিবদ্ধ গৱেষণা তথা বিকাশৰ (R&D) দৰে সকলোবোৰ সেৱাক একক শ্ৰেণী ‘তথ্য প্ৰযুক্তি সেৱা’-ৰ অধীনত গোট কৰা হ’ব।
ইয়াৰ উপৰিও আই টি সেৱাৰ বাবে ‘ছেফ হাৰ্বাৰ’ (Safe Harbor) নিয়মো সৰল কৰা হৈছে:
সকলো আই টি সেৱাৰ বাবে ১৫.৫% একেধৰণৰ ছেফ হাৰ্বাৰ মাৰ্জিন প্ৰযোজ্য হ’ব।
ইয়াৰ সীমা ৩০০ কোটিৰ পৰা ২০০০ কোটিলৈ বৃদ্ধি কৰা হৈছে।
এই অনুমোদন প্ৰক্ৰিয়া সম্পূৰ্ণৰূপে স্বয়ংক্ৰিয় আৰু নিয়মভিত্তিক কৰা হ’ব, যাৰ ফলত কৰ কৰ্তৃপক্ষৰ অডিটৰ (Audit) প্ৰয়োজনীয়তা নাথাকিব।
উল্লেখ্য যে বাজেটত কৃত্ৰিম বুদ্ধিমত্তাক (AI) ভৱিষ্যতৰ অৰ্থনীতিৰ কেন্দ্ৰবিন্দু হিচাপে ৰখা হৈছে। ‘IndiaAI Mission’-ৰ বাবে চৰকাৰে ১০০০ কোটি টকা আবণ্টন দিছে।
