উচ্চতম ন্যায়ালয়ৰ লগতে দেশৰ বিভিন্ন আদালতত ভাৰত চৰকাৰৰ বিৰুদ্ধে ৭ লাখ ১৪ হাজাৰ গোচৰ বিচাৰাধীন হৈ আছে। তালিকাৰ শীৰ্ষত আছে বিত্ত মন্ত্ৰালয়। তেওঁলোকৰ বিৰুদ্ধে গোচৰৰ সংখ্যা ১ লাখ ৯৪ হাজাৰ।
সংসদীয় কৰ্মচাৰী তথা প্ৰশাসনিক সংস্কাৰ সমিতি আৰু আইন আৰু ন্যায় মন্ত্ৰালয়ে সংসদত প্ৰকাশ কৰা প্ৰতিবেদনত এই তথ্য দাখিল কৰিছে। প্ৰতিবেদনত কোৱা হৈছে যে নৰেন্দ্ৰ মোডী চৰকাৰৰ যোৱা ১২ বছৰত চৰকাৰৰ গোচৰৰ বিৰুদ্ধে যুঁজ দিয়া অধিবক্তাসকলক ৬৮৩ কোটি টকা আদায় দিছে।
মূলতঃ বিশেষ গোচৰত যুঁজিবলৈ বিখ্যাত অধিবক্তাক নিযুক্তি দিয়াৰ বাবেই এই ধন আদায় দিয়া হৈছে। এনেয়ে উচ্চতম ন্যায়ালয়ত এটৰ্নী জেনেৰেল আৰু ছলিচিটৰ জেনেৰেল আৰু তেওঁলোকৰ অধীনত অধিবক্তা থাকেই, তদুপৰি সকলো উচ্চ ন্যায়ালয়তে আইনজীৱী বা অধিবক্তা হিচাপে কেন্দ্ৰীয় চৰকাৰৰ স্থায়ী প্ৰতিনিধি থাকে। তেওঁলোকৰ দৰমহাও দিবলগীয়া হৈছে কেন্দ্ৰীয় চৰকাৰে।
অধিবক্তাৰ বিল নিষ্পত্তি কৰিবলৈ যোৱা বিত্তীয় বৰ্ষত সৰ্বাধিক ব্যয় কৰা হৈছে। ২০২৪-২৫ বিত্তীয় বৰ্ষত এই খণ্ডত কেন্দ্ৰই ৮৭.৬৫ কোটি টকা ব্যয় কৰিবলগীয়া হৈছিল। চলিত বিত্তীয় বৰ্ষৰ ৩১ ডিচেম্বৰলৈকে ৭৫ কোটি টকা ব্যয় হৈছে।
সংসদীয় সমিতিয়ে এই বিষয়ত চৰকাৰৰ দৃষ্টি আকৰ্ষণ কৰি গোচৰসমূহৰ শীঘ্ৰে নিষ্পত্তিৰ বাবে প্ৰয়োজনীয় পদক্ষেপ গ্ৰহণ কৰিব লাগে বুলি কয়। আইন আৰু ন্যায় মন্ত্ৰালয়ে সংসদীয় কমিটীক অৱগত কৰে যে যোৱা বছৰ তেওঁলোকে এই সন্দৰ্ভত সম্পূৰ্ণ নিৰ্দেশিকা জাৰি কৰিছিল আৰু সংশ্লিষ্ট সকলোকে সকীয়াই দিছিল।
মন্ত্ৰালয়ে পৰ্যবেক্ষণ কৰে যে বহু ক্ষেত্ৰত চৰকাৰী অধিবক্তা অনুপস্থিত থাকে। তেওঁলোক উপস্থিত থাকিলেও বহু ক্ষেত্ৰত দেখা যায় যে তেওঁলোক গোচৰৰ বাবে সাজু নহয়। আদালতৰ পৰা সময় বিচৰাৰ বাবে শুনানি পলম হয়। অৱশ্যে আইন আৰু ন্যায় মন্ত্ৰালয়ে চৰকাৰৰ সংশ্লিষ্ট মন্ত্ৰালয়ৰ বিৰুদ্ধে এলানি অভিযোগ দাখিল কৰিছে। তেওঁলোকে কয় যে বহু গোচৰৰ প্ৰয়োজনীয় নথি-পত্ৰ সংশ্লিষ্ট মন্ত্ৰালয়ৰ পৰা পোৱা নাযায়। বহু মন্ত্ৰালয়ে তেওঁলোকৰ বক্তব্যৰ সমৰ্থনত নথি দাখিল কৰাত ব্যৰ্থ হৈছে। চৰকাৰৰ পৰাজয় অনিবাৰ্য হৈ পৰে।
