নিদান পত্ৰ (প্ৰেছক্ৰিপচন) অবিহনে ঔষধৰ দোকানৰ পৰা আৰু কোনো চিৰাপ ক্ৰয় কৰিব নোৱাৰিব। মঙলবাৰে কেন্দ্ৰীয় চৰকাৰে এক অধিসূচনা জাৰি কৰে। অধিসূচনা অনুসৰি এই নিৰ্দেশৰ অধীনত কাহৰ চিৰাপো আহিব। অৰ্থাৎ গ্ৰাহকে পঞ্জীয়নভুক্ত চিকিৎসকৰ প্ৰেছক্ৰিপচন লৈ গ’লেহে এনে চিৰাপ ক্ৰয় কৰিব পাৰিব।
জুন মাহত এই বিষয়টো সন্দৰ্ভত ‘ড্ৰাগছ (পঞ্চম সংশোধনী) নিয়ম, ২০২৬’ৰ অধীনত এক নিৰ্দেশনা জাৰি কৰা হৈছিল। এই নিৰ্দেশনা চৰকাৰী ৰাজপত্ৰত প্ৰকাশ পোৱা দিনৰ পৰা সমগ্ৰ দেশতে কাৰ্যকৰী হ’ব বুলি জনোৱা হয়। সেই অনুসৰি মঙলবাৰৰ পৰা কাৰ্যকৰী হ’ল এই নিয়ম।
সেই অৰ্থত বিক্ৰীৰ বাবে কোনো চৰ্ত নথকা ঔষধৰ তালিকাৰ পৰা কেন্দ্ৰীয় চৰকাৰে চিৰাপ শব্দটো আঁতৰাই পেলাইছে, যিবোৰ ঔষধৰ দোকানৰ পৰা সহজে ক্ৰয় কৰিব পাৰি। ফলত প্ৰেছক্ৰিপচন অবিহনে যিকোনো ধৰণৰ চিৰাপ কিনাটো এতিয়া সম্পূৰ্ণ অবৈধ।
ইয়াৰ পূৰ্বে কাহৰ চিৰাপক লৈ সমগ্ৰ দেশতে বিতৰ্কৰ সৃষ্টি হৈছিল। মধ্যপ্ৰদেশত কমেও ২২টা শিশুৰ মৃত্যুৰ পিছতে এই বিতৰ্কৰ সৃষ্টি হয়। কেইবাখনো ৰাজ্যত তদন্তও চলি আছে। কিছুমান নিৰ্দিষ্ট ঔষধ কোম্পানীৰ কাৰখানা বন্ধ কৰি দিয়া হৈছে। ভাৰতত দুবছৰৰ তলৰ শিশুৰ সকলো কাহ আৰু চৰ্দি-কাহৰ ঔষধো নিষিদ্ধ কৰা হয়। এইবাৰ কেন্দ্ৰই সকলো ধৰণৰ চিৰাপৰ ক্ষেত্ৰত কঠোৰ সিদ্ধান্ত লৈছে।
