নগাঁও জিলাৰ চামগুৰি আৰক্ষী থানাৰ অন্তৰ্গত আমনিত আজি হস্তনিৰ্মিত পিষ্টলসহ দুই দুৰ্ধৰ্ষ ডকাইতক কৰায়ত্ত কৰা ঘটনাই সমগ্ৰ অঞ্চলতে তীব্ৰ চাঞ্চল্যৰ সৃষ্টি কৰিছে।
জানিব পৰা মতে আজি পুৱা প্ৰায় ৯ বজাত আমনিৰ ৰাজকমল ধাবাৰ সন্মুখৰ ৩৭নং ৰাষ্ট্ৰীয় ঘাইপথৰ ওপৰত গোপন সূত্ৰৰ ভিত্তিত চামগুৰি থানাৰ ভাৰপ্ৰাপ্ত আৰক্ষী বিষয়া ৰাজীৱ বৰ্মনৰ নেতৃত্বত যোৱা এটি আৰক্ষী দলে অভিযান চলাই দুজন দুৰ্ধৰ্ষ ডকাইতকসহ এটা হস্তনিৰ্মিত পিষ্টল জব্দ কৰিবলৈ সক্ষম হয়।
ডকাইতি কাণ্ড সংঘটিত কৰাৰ উদ্দেশ্যে শিৱস্থান খলিহামাৰী গাঁৱৰ পৰা ওলাই আহি আৰক্ষীৰ জালত পৰা দুৰ্ধৰ্ষ ডকাইত দুজন হ’ল খলিহামাৰী গাঁৱৰ আফিৰ উদ্দিনৰ পুত্ৰ ৰাফুল আমিন (২৭) আৰু দুই নং গৰুমৰা গাঁৱৰ জাহাদ আলীৰ পুত্ৰ ইছমাইল আলী ওৰফে বাবুল(২৮)।
আৰক্ষীয়ে ধৃত ডকাইত দুজনে বিগত সময়ত বহু কেইটা ডকাইতি কাণ্ডৰ লগত জড়িত থকাৰ সন্দেহ প্ৰকাশ কৰিছে যদিও আৰক্ষীৰ জেৰাতহে সকলোবোৰ তথ্য পোহৰলৈ আহিব বুলি আৰক্ষী সূত্ৰৰ পৰা জানিব পৰা গৈছে।