অসম চৰকাৰৰ সংসদীয় পৰিক্ৰমা মন্ত্ৰী চন্দ্ৰমোহন পাটোৱাৰীয়ে বিভিন্ন অসুস্থতাৰ কাৰণত ডিটেনশ্যন কেম্পত মৃত্যু হোৱা ২৮ গৰাকী লোকৰ ভিতৰত মাত্ৰ তিনিগৰাকী লোক বাংলাদেশী পৰিচয়ৰ বুলি মন্তব্য কৰে।
৩০ নৱেম্বৰত অসম বিধানসভা অধিৱেশনত অসম গণ পৰিষদৰ বিধায়ক উৎপল দত্তৰ প্ৰশ্নৰ উত্তৰ দি পাটোৱাৰীয়ে কয়।
‘‘বিভিন্ন অসুস্থতাৰ বাবে অসমৰ ডিটেনশ্যন কেম্পত মৃত্যু হোৱা মুঠ ২৮ গৰাকী লোকৰ ভিতৰত মাত্ৰ তিনিগৰাকী লোকৰহে বাংলাদেশৰ ঠিকনা আছে,’’ পাটোৱাৰীৰ মন্তব্য।
আনহাতে, ডিটেনশ্যন কেম্পত মৃত্যু হোৱা বাসুদেৱ বিশ্বাস, নগেন দাস আৰু দুলাল মিঞাই তেওঁলোকৰ বাংলাদেশৰ ঠিকনা দিছিল বুলিও মন্ত্ৰী গৰাকীয়ে কয়।
বাংলাদেশী লোক তিনিগৰাকীৰ বাদে ডিটেনশ্যন কেম্পত মৃত্যু হোৱা অন্য ২৫ গৰাকী লোকৰ অসমৰ বিভিন্ন জিলাৰ ঠিকনা আছে বুলিও পাটোৱাৰীয়ে কয়।
ডিটেনশ্যন কেম্পত মৃত্যু হোৱা লোকসকলৰ পৰিয়ালক অসম চৰকাৰৰ তৰফৰ পৰা সাহায্য দিয়া হৈছে নেকি বুলি সোধা এক প্ৰশ্নৰ উত্তৰত চন্দ্ৰমোহন পাটোৱাৰীয়ে তেনেধৰণৰ কোনো ব্যৱস্থা নাই বুলি মন্তব্য কৰে।
পাটোৱাৰীয়ে অসম চৰকাৰৰ তৰফৰ পৰা কেন্দ্ৰীয় চৰকাৰলৈ ৰাজ্যত অধিক ডিটেনশ্যন কেম্প স্থাপন কৰাৰ বাবে প্ৰস্তাৱ প্ৰেৰণ কৰা হৈছে বুলিও উল্লেখ কৰে।
উল্লেখযোগ্য যে, অসমৰ ডিটেনশ্যন কেম্পত বন্দী হৈ থকা লোকৰ মৃত্যুৰ প্ৰসংগত বিভিন্ন সময়ত প্ৰতিবাদী কাৰ্য্যসূচী গ্ৰহণ কৰা হৈছে। বহু সময়ত মৃতকৰ পৰিয়ালৰ লোকে চৰকাৰৰ পৰা মৃতদেহ গ্ৰহণ কৰিবলৈও অস্বীকাৰ কৰিছিল।
