অন্ধ্ৰপ্ৰদেশত দুটা সন্তানৰ নীতি সলনি কৰি এতিয়া অধিক সন্তান জন্ম দিয়াৰ বাবে উৎসাহিত কৰিছে মুখ্যমন্ত্ৰী চন্দ্ৰবাবু নাইডুৱে। জনগাঁথনিৰ ভাৰসাম্য ৰক্ষা কৰাৰ লক্ষ্যৰে ৰাজ্য চৰকাৰে এক বিশেষ পৰিকল্পনা হাতত লৈছে য’ত দুইতকৈ অধিক সন্তান থকা দম্পতীৰ বাবে বিভিন্ন পুৰস্কাৰ আৰু চৰকাৰী সুবিধাৰ কথা ঘোষণা কৰা হৈছে।
অন্ধ্ৰৰ মুখ্যমন্ত্ৰীৰ শেহতীয়া ঘোষণা অনুসৰি যদি কোনো দম্পতীৰ তৃতীয়টো সন্তান জন্ম হয় তেন্তে চৰকাৰৰ ফালৰ পৰা তেওঁলোকক একেলগে ২৫ হাজাৰ টকাৰ আৰ্থিক অনুদান আগবঢ়োৱা হ’ব। কেৱল আৰ্থিক সহায়েই নহয় সেই তৃতীয় সন্তানটোৰ ১৮ বছৰ বয়সলৈকে শিক্ষাৰ সম্পূৰ্ণ খৰচ চৰকাৰে বহন কৰিব বুলিও জানিবলৈ দিছে। ইয়াৰ উপৰিও যিসকল দম্পতীয়ে তিনিটা সন্তান জন্ম দিব তেওঁলোকক বিশেষ ছুটিৰ সুবিধা দিয়াৰ লগতে কম খৰচতে আইভিএফ বা অন্যান্য চিকিৎসা সহায় আগবঢ়োৱাৰ প্ৰস্তাৱো এই নীতিত অন্তৰ্ভুক্ত কৰা হৈছে।
এই নতুন জনসংখ্যা নীতিৰ খচৰা ইতিমধ্যে প্ৰস্তুত কৰা হৈছে আৰু অহা এপ্ৰিল মাহৰ পৰাই ইয়াক কাৰ্যকৰী কৰাৰ সম্ভাৱনা আছে। মুখ্যমন্ত্ৰী নাইডুৱে স্পষ্ট কৰি দিছে যে এই অভিনব পদ্ধতিয়ে ৰাজ্যখনৰ জনগাঁথনিৰ ছবিখন সলাই পেলাব। তেওঁৰ মতে অন্ধ্ৰপ্ৰদেশত বৰ্তমান জন্মৰ হাৰ ৰাষ্ট্ৰীয় গড়তকৈ বহু পৰিমাণে কমি গৈছে। ভাৰতত যি সময়ত মহিলাৰ প্ৰতি প্ৰসৱৰ হাৰ ২.১১ শতাংশ সেই সময়ত অন্ধ্ৰপ্ৰদেশত এই হাৰ মাত্ৰ ১.৫ শতাংশলৈ হ্ৰাস পাইছে।
নাইডুৱে দক্ষিণ কোৰিয়া আৰু জাপানৰ দৰে দেশৰ উদাহৰণ দি কয় যে জনসংখ্যা নিয়ন্ত্ৰণ কৰিবলৈ গৈ সেই দেশসমূহত এতিয়া তৰুণ প্ৰজন্মৰ অভাৱ ঘটিছে আৰু বৃদ্ধ লোকৰ সংখ্যা আশংকাজনকভাৱে বৃদ্ধি পাইছে। ইয়াৰ ফলত সেই দেশবোৰৰ অৰ্থনীতি আৰু ভৱিষ্যতৰ কৰ্মশক্তিৰ ওপৰত বিৰূপ প্ৰভাৱ পৰিছে। অন্ধ্ৰপ্ৰদেশ যাতে তেনে কোনো সংকটৰ সন্মুখীন নহয় তাৰ বাবে এতিয়াৰে পৰাই জনগাঁথনিৰ সংস্কাৰ কৰাটো প্ৰয়োজনীয় হৈ পৰিছে বুলি তেওঁ মত প্ৰকাশ কৰিছে।
