আই পি এলৰ সফল দল দুটাৰ মাজত যুঁজ। এক কথাত ক’বলৈ গ’লে ইণ্ডিয়ান প্ৰিমিয়াৰ লীগৰ আটাইতকৈ আকৰ্ষণীয় যুঁজৰ খেলখন। কিন্তু সেই যুঁজখনে প্ৰত্যাশা পূৰণ কৰিব পাৰিলেনে? অধিনায়ক হাৰ্দিক পাণ্ডিয়া আৰু বলিং বিভাগত দলৰ মূল অস্ত্ৰ যশপ্ৰীত বুমৰাহৰ অবিহনে মহেন্দ্ৰ সিং ধোনী আৰু ঋতুৰাজ গায়কোৱাডৰ চেন্নাই ছুপাৰ কিংছে শিথিল মুম্বাই ইণ্ডিয়ানছক পৰাস্ত কৰিবলৈ বিশেষ কষ্ট কৰিবলগীয়াই নহ’ল।
খেলৰ ফলাফলত চেন্নাইয়ে ৪ উইকেটত জয়লাভ কৰে। মাত্ৰ ৫ টা বল বাকী থাকিল। কিন্তু বাস্তৱত মেচখনৰ বেছিভাগ সময়তে চেন্নাইয়ে আধিপত্য বিস্তাৰ কৰিছিল। প্ৰথম ইনিংছত কিছু সময়ৰ বাহিৰে মুম্বাই খেলখনত নিষ্প্ৰভ আছিল।
আশা কৰা মতেই দেওবাৰে চেন্নাইৰ স্পিনৰ ফান্দত আবদ্ধ হৈ পৰে মুম্বাই। অৱশ্যে ইনিংছৰ আৰম্ভণিতে মুম্বাইৰ হৈ পেচাৰ খলিল আহমেদে আঘাত হানে। আৰম্ভণিতে দ্ৰুত একেৰাহে উইকেট হেৰুৱাই চাপত পৰে মুম্বাই। তাৰ পৰাই অধিনায়ক সূৰ্যকুমাৰ যাদৱে তিলক ভাৰ্মাৰ সৈতে যুটী বান্ধি মুম্বাইক পুনৰ মেচলৈ অনাৰ চেষ্টা কৰে।
কিন্তু মুম্বাইৰ ইনিংছৰ একাদশ অভাৰত মহেন্দ্ৰ সিং ধোনীয়ে সূৰ্য্যকুমাৰ যাদৱক ক্ষিপ্ৰতাৰে ষ্টাম্প কৰি বাস্তৱতে মুম্বাইক মেচখনৰ পৰা বাহিৰ কৰি দিয়ে। সূৰ্যৰ উইকেটৰ পিছত ইটোৰ পিছত সিটোকৈ উইকেট হেৰুৱাই থাকিল মুম্বাইয়ে। শেষত ১৫৫ ৰানত ৰোহিতৰ ইনিংছ সমাপ্ত হয়। সূৰ্য্যই ২৯ ৰান সংগ্ৰহ কৰে। তিলক ভাৰ্মাই ৩১ ৰান সংগ্ৰহ কৰে। শেষত ২৮ ৰানৰ আকৰ্ষণীয় ইনিংছ খেলি দলৰ ৰান সন্মানজনক স্থানলৈ লৈ যায় দীপক চাহাৰে। মুম্বাইৰ এই দুৰ্দশাৰ মূল নায়ক নূৰ আহমেদ। তেওঁ ৪ অভাৰত ১৮ ৰানত ৪ টা উইকেট দখল কৰে।
প্ৰত্যুত্তৰত চেন্নাইয়ে বেটিং কৰিবলৈ নামি ভাল আৰম্ভণি কৰা নাছিল। দ্বিতীয় অভাৰতে ৰাহুল ত্ৰিপাঠীয়ে পেভিলিয়নলৈ উভতি যায়। কিন্তু প্রথম উইকেটৰ পাছত ৰাচিন ৰবিন্দ্র আৰু ঋতুৰাজ গাইকোৱাডে যুটী বান্ধি চেন্নাইৰ ইনিংছটো নিয়ন্ত্ৰণ কৰিবলৈ লয়। এই যুটিটোৱে ৬৭ ৰান সংযোজন কৰে। মাত্ৰ ২৬টা বলত ৫৩ ৰান সংগ্ৰহ কৰি পুনৰ পেভিলিয়নলৈ উভতি আহে অধিনায়ক ঋতুৰাজে। তেওঁক ঘূৰাই পঠায় মুম্বাইৰ যুৱ স্পিনাৰ ভিগনেশ পুথুৰে। তাৰ পিছত মুম্বাইয়ে সেই যুৱ স্পিনাৰৰ সহায়ত অলপ যুঁজখনলৈ ঘুৰি আহে। এজন এজনকৈ শিৱম ডুবে, দীপক হুদা, আৰু ছেম কাৰানে পেভিলিয়নলৈ উভতি যায়।
অৱশ্যে ৰচিন ৰবিন্দ্ৰ আৰু ৰবীন্দ্ৰ জাদেজাই শেষত নিজৰ শীতল মস্তিষ্কেৰে দলটোক সহজে জয়ৰ দিশে আগুৱাই লৈ যায়। ৰাচিনে অকলেই ৬৫ ৰান সংগ্ৰহ কৰে। শেষত মহেন্দ্ৰ সিং ধোনিও দুটা বলৰ বাবে খেলপথাৰলৈ আহিব লগা হয়।
এই সহজ জয়ে আকৌ এবাৰ প্ৰমাণ কৰিলে যে চেন্নাই ছুপাৰ কিংছ এই ছিজনতো ঘৰুৱা খেলপথাৰত অনবদ্য হ’ব। চিপকত চেন্নাইক পৰাস্ত কৰিবলৈ বিপক্ষই যথেষ্ট পৰিশ্ৰম কৰিব লাগিব। অৱশ্যে পৰাস্ত হ’লেও মুম্বাই বেছি হতাশ নহ’ব৷ কিয়নো প্ৰথমে দলৰ দুই মূল শক্তি অবিহনে খেলিব লগা হৈছিল। তদুপৰি বিগত দশক ধৰি প্ৰথমখন মেচত মুম্বাইয়ে পৰাস্ত হোৱাৰ অভ্যাস যেন কৰি তুলিছে। সেয়ে প্ৰথমখন মেচত পৰাস্ত হোৱাটো ৰোহিতৰ দলৰ বাবে নতুন কথা নহয়। তদুপৰি, এই খেলখনত যুৱ স্পীনাৰ ভিগনেশ পুথুৰে যি ধৰণে প্ৰদৰ্শন আগবঢ়াইছে, সেইটোৱেও মুম্বাইৰ মেনেজমেন্টক ভৰসা দিব।
সংক্ষিপ্ত স্কোৰঃ
মুম্বাই ইণ্ডিয়ানছঃ ১৫৫-৯ (তিলক ৩১, সূৰ্য্য ২৯, নূৰ ৪-১৮)
চেন্নাই ছুপাৰ কিংছঃ ১৫৮-৬ (ৰচিন ৰবীন্দ্ৰ ৬৫, ঋতুৰাজ গাইকোৱাড ৫৩)
চেন্নাই ছুপাৰ কিংছে ৪ উইকেটত জয়লাভ কৰে।
