সশস্ত্ৰ আৰক্ষী আৰু আৰক্ষীৰ বেৰিকেড ওফৰাই ক’ৰ’নাতংকৰ মাজতে ৫০ কিলোমিটাৰ পথ খোজেৰে অতিক্ৰম কৰি হাজাৰ হাজাৰ জনজাতীয় লোকে নিজৰ প্ৰাপ্য বিচাৰি প্ৰতিবাদ সাৱ্যস্ত কৰে ছত্তিশগড়ত।
ছত্তিশগড়ৰ বিজাপুৰ জিলাৰ গংগাধৰ অঞ্চলৰ ১৮ খন গাঁও পঞ্চায়তৰ ৫০ খনৰ গাঁৱৰ হাজাৰ হাজাৰ জনজাতীয় লোকে সোমবাৰে ৫০ কিলোমিটাৰ পথ খোজেৰে অতিক্ৰম কৰি জিলা উপায়ুক্তৰ কৰ্যায়লত বিক্ষোভ প্ৰদৰ্শন কৰে।
লোকসকলে বিভিন্ন দাবীৰ লগতে তেন্দুপাত(বিড়ি বনোৱাত ব্যৱহৃত পাত)ৰ বেংকৰ সলনি নগদ ধন প্ৰদানৰ দাবী তোলে।
উল্লেখ্য যে, ছত্তিশগড়ৰ চৰকাৰে শুকমা, দান্তেৱাড়া আৰু বিজাপুৰ জিলাৰ বন্য উৎপাদিত সামগ্ৰীৰ বাবদ নগদ ধন প্ৰদানৰ সিদ্ধান্ত বাতিল কৰি বেংকৰ যোগেদি ধন প্ৰদান কৰাৰ বাবে সিদ্ধান্ত গ্ৰহণ কৰিছিল।
চৰকাৰী সূত্ৰৰ মতে, ছত্তিশগড় চৰকাৰৰ মন্ত্ৰী কাৱাশী লাক্ষ্মাই মাওবাদীৰ প্ৰাধান্য থকা জিলাতিনিখনত বেংকৰ যোগে লোকসকলক ধন প্ৰদান কৰিব ঘোষণা কৰিছিল।
ইয়াৰ বিৰুদ্ধে জিলাতিনিখনৰ জনজাতীয় লোকসকলে জাঙুৰ উঠিছে।
সোমবাৰে পুৱা বিজাপুৰ আৰক্ষীয়ে চেৰ্পালৰ পৰা বৃহৎসংখ্যক লোকে শান্তিপূৰ্ণ সমদল কৰি চহৰত প্ৰৱেশ কৰাত সতৰ্ক হৈ উঠে আৰু সমদলটোক ভেটা দিবলৈ বিভিন্ন স্থানত বেৰিকেড স্থাপন কৰাৰ লগতে সশস্ত্ৰ আৰক্ষীক মোতায়েন কৰে।
কিন্তু সমদল কৰি অহা জনজাতীয় লোকসকলে বিভিন্ন দিশৰ পৰা আহি আৰক্ষীৰ বেৰিকেড উফৰাই জিলা উপায়ুক্তৰ কাৰ্যালয়ৰ চৌহদত প্ৰৱেশ কৰে।
ইয়াৰ পিছতে সমদলটোৰ এটা সৰু প্ৰতিনিধি দলে জিলা উপায়ুক্ত, জিলা বন সংৰক্ষক আৰু অন্যান্য বিষয়াৰ সৈতে আলোচনাত মিলিত হয়।
“আমাৰ মূল দাবী হৈছে তেন্দুপাতৰ মূল্য গঞাসকলক নগদ ধন হিচাপে দিব লাগিব, বেংকৰ যোগে নহয়। এইটো হৈছে আমাৰ প্ৰধান উপাৰ্জনৰ পথ। চহৰলৈ আহি ধন উলিয়াই নিয়াটো আমাৰ সাধ্যৰ বাহিৰত। কিছুমান লোকৰ এতিয়াও বেংক একাউন্ট নাই।” ৰাজু কাল্মু নামৰ এজন প্ৰতিনিধিয়ে এইদৰে কয়।
ৰমেশ পুনেম নামৰ আন এজন প্ৰতিনিধিয়ে কয়, “২০১৮-১৯ বৰ্ষত প্ৰতিশ্ৰুতি দিয়া তেন্দুপাতৰ বোনাছো আমি বিচাৰিছো, জনজাতীয় শিক্ষাৰ্থীৰ বৃত্তিৰ পৰিমাণ বৃদ্ধি আৰু গাঁৱত বিদ্যালয় আৰু চিকিৎসালয় প্ৰতিষ্ঠা কৰিব লাগিব বুলি আমি দাবী উত্থাপন কৰিছো।”
লগতে তেওঁ কয় যে, আৰক্ষীয়ে জনজাতীয় লোকসকলক যি হাৰাশাস্তি কৰি আহিছে সেয়া বন্ধ কৰিব লাগিব।
উল্লেখ্য যে, ক’ৰ’নাতংকৰ বাবে দেশত সমদল কৰাটো নিষিদ্ধ কৰা হৈছে।
কিন্তু অতি পত্যন্তৰ অঞ্চলৰ জনজাতীয় লোকসকলে স্বতঃস্ফূৰ্তভাৱে শান্তিপূৰ্ণ প্ৰতিবাদী সমদল কৰি জিলা উপায়ুক্তৰ কাৰ্যালয়লৈ অহাত আৰক্ষীয়ে বাধা দিয়াত ব্যৰ্থ হয়।
ইয়াৰ পিছতে ৫০ কিলোমিটাৰো অধিক পথ খোজেৰে অতিক্ৰম কৰি অহা হাজাৰোধিক সমদলটোৰ প্ৰতিনিধিৰে জিলা উপায়ুক্তই আলোচনাত মিলিত হ’বলৈ বাধ্য হৈ পৰে।
উল্লেখ্য যে, উক্ত সমদলটো দেশত নজিৰবিহীন আৰু এটা ঐতিহাসিক ঘটনাৰূপে চিহ্নিত হৈছে।
