দেশৰ মুখ্য ন্যায়াধীশ ৰঞ্জন গগৈয়ে আজি তেওঁৰ গৃহ চহৰ ডিব্ৰুগড়ত উপস্থিত হয়। আজি দিনৰ ২ বজাত মুখ্য ন্যায়াধীশজন সপত্নীক যোৰহাটৰ ৰৰৈয়া বিমানবন্দৰত উপস্থিত হয়। বিমান বন্দৰত তেওঁক জিলাখনৰ মুখ্য ন্যায়িক দণ্ডাধীশ ৰাণী বড়ো আৰু জিলা আৰু ছেছন ন্যায়াধীশ ভি কে চন্দকে আদৰণি জনায়।
বিমান বন্দৰৰ পৰা মুখ্য ন্যায়াধীশ গগৈয়ে ডিব্ৰুগড় অভিমুখী যাত্ৰাত ঢেঁকীয়াখোৱা নামঘৰতো সোমাই যায় আৰু তাত শৰাই আগ বঢ়ায়। নামঘৰ পৰিচালনা সমিতিয়ে মুখ্য ন্যায়াধীশজনক এখন চেলেং চাদৰ আৰু সঁফুৰা আগ বঢ়াই আদৰে।
তাৰ পৰা গৈ ন্যায়াধীশজনে তেওঁৰ পত্নীৰসৈতে শিৱসাগৰৰ ঐতিহাসিক শিৱদ’লো ভ্ৰমণ কৰে আৰু তাতো পূজা-সেৱা আগ বঢ়ায়।
মন কৰিব লগীয়া যে আজিও ন্যায়াধীশজনে ৰাজ্য চৰকাৰৰ নিৰাপত্তা নল’লে। অসম আৰক্ষীৰ পৰিৱৰ্তে আজিও তেওঁ চি আৰ পি এফৰ বেষ্টনীত ঘূৰে।
উল্লেখযোগ্য যে দেশৰ মুখ্য ন্যায়াধীশৰ পদত অধিষ্ঠিত হোৱাৰ পিছত ১৬ অক্টোবৰত অসম ভ্ৰমণ কৰিছিল ন্যায়াধীশ গগৈয়ে। ১৭ অক্টোবৰত মুখ্য ন্যায়াধীশজনে সপত্নীক কামাখ্যা দৰ্শনৰ বাবে যাওঁতে তেওঁক যথাযথ নিৰাপত্তা আগ বঢ়োৱা হোৱা নাছিল। তেওঁৰ সৈতে অসম আৰক্ষীৰ কোনো উচ্চপদস্থ আৰক্ষী বিষয়া তথা দণ্ডাধীশ উপস্থিত নাছিল। ইয়াৰ ফলত ভিৰত আবদ্ধ হৈ পৰা মুখ্য ন্যায়াধীশ ৰঞ্জন গগৈ অস্বস্তিত পৰাৰ লগতে তিক্ততাপূৰ্ণ অভিজ্ঞতাৰ সন্মুখীন হৈছিল।
মুখ্য ন্যায়াধীশজনৰ প্ৰতি সঠিক দায়িত্ব পালন নকৰাৰ জগৰত পৰি ২০ অক্টোবৰত চাকৰিৰ পৰা নিলম্বিত হৈছিল প্ৰশান্ত কুমাৰ কাঠকটীয়া। প্ৰশান্ত কাঠকটীয়াৰ পিছত একেই জগৰত গুৱাহাটী (পশ্চিম) উপ আৰক্ষী আয়ুক্ত ভৱৰলাল মীনাও নিলম্বিত হৈছিল।
তাৰ পিছত যোৱা ১৭ নৱেম্বৰত পুনৰ কামাখ্য ভ্ৰমণৰ সময়ত ৰাজ্য চৰকাৰৰ নিৰাপত্তা লোৱা নাছিল মুখ্য ন্যায়াধীশজনে। এইবাৰো একেই স্থিতি লৈ কেৱল চি আৰ পি এফৰ নিৰাপত্তা বেষ্টনী লৈয়ে ঘূৰে মুখ্য ন্যায়াধীশজনে।
