মধ্যপ্ৰদেশৰ মুখ্যমন্ত্ৰী মোহন যাদৱৰ পৰিয়ালৰ সদস্যসকলে কোটি কোটি টকা খৰচ কৰি বৃহৎ পৰিমাণৰ মাটি ক্ৰয় কৰাৰ এক গুৰুতৰ অভিযোগ উত্থাপন হৈছে। কংগ্ৰেছ দলে এই সমগ্ৰ ঘটনাৰ উচ্চতম ন্যায়ালয়ৰ এজন ন্যায়াধীশৰ নেতৃত্বত এক উচ্চ পৰ্যায়ৰ তদন্তৰ দাবী উত্থাপন কৰিছে। এক ইংৰাজী দৈনিক কাকতৰ প্ৰতিবেদনত চৰকাৰী ভূমি নথি-পত্ৰৰ উদ্ধৃতি দি দাবী কৰা হৈছে যে মুখ্যমন্ত্ৰীগৰাকীৰ পত্নী, পুত্ৰ, বোৱাৰী আৰু পৰিয়ালৰ অন্যান্য সদস্যসকলে পঁয়তাল্লিশ কোটি টকা খৰচ কৰি এশ আঠষষ্ঠি একৰ ভূমি ক্ৰয় কৰিছে। আশ্চৰ্যজনক কথাটো হ’ল যে যিবোৰ ঠাইত এই মাতিসমূহ ক্ৰয় কৰা হৈছিল, পৰৱৰ্তী সময়ত সেইবোৰ অঞ্চলতে চৰকাৰী আন্তঃগাঁথনিমূলক উন্নয়নমূলক প্ৰকল্পসমূহ ঘোষণা কৰা হৈছিল।
প্ৰতিবেদনখনৰ তথ্য অনুসৰি ২০২৩ চনৰ ডিচেম্বৰ মাহত মোহন যাদৱে মুখ্যমন্ত্ৰী হিচাপে কাৰ্যভাৰ গ্ৰহণ কৰাৰ পিছৰ পৰা ২০২৫ চনৰ ডিচেম্বৰ মাহলৈকে এই ভূমিসমূহ ক্ৰয় কৰা হৈছিল। এই সকলোবোৰ ভূমি ক্ৰয় পোনপটীয়াকৈ বা তেওঁলোকৰ মালিকানাধীন চাৰিখন গৃহ নিৰ্মাণকাৰী প্ৰতিষ্ঠানৰ জৰিয়তে কৰা হৈছিল। অভিযোগ উঠিছে যে এই মাটিসমূহ বিশেষকৈ সেইবোৰ অঞ্চলত ক্ৰয় কৰা হৈছে য’ত চৰকাৰী পথ প্ৰকল্প বা চহৰৰ মাষ্টাৰ প্লেন অনুসৰি কৃষিভূমিক আৱাসিক বা ব্যৱসায়িক স্থানলৈ ৰূপান্তৰ কৰাৰ প্ৰস্তাৱ আছিল। ২০২১ চনৰ পৰা হিচাপ কৰিলে তেөঁলোকৰ পৰিয়ালে মুঠ দুশ তিপন্ন একৰ মাটি নিজৰ অধীনলৈ আনিছে বুলি জানিব পৰা গৈছে। মোহন যাদৱ পূৰ্বতেও দীৰ্ঘদিন ধৰি উজ্জয়িনীৰ উন্নয়ন কৰ্তৃপক্ষ আৰু পৰ্যটন উন্নয়ন নিগমৰ গুৰুত্বপূৰ্ণ পদত অধিষ্ঠিত আছিল।
এই সন্দৰ্ভত ভোপালত এখন সংবাদমেল সম্বোধন কৰি বিধানসভাৰ বিৰোধী দলপতি উমাং সিংহাৰে কয় যে এক সুপৰিকল্পিত নীতিৰে চৰকাৰী প্ৰকল্পসমূহ ঘোষণা কৰাৰ পূৰ্বে সেইবোৰ অঞ্চলৰ মাটি ক্ৰয় কৰা হৈছিল যাতে পিছত মাটিৰ মূল্য বহু পৰিমাণে বৃদ্ধি পায়। তেওঁ কয় যে মুখ্যমন্ত্ৰীয়ে এই সকলোবোৰ নিয়ম অনুসৰি হোৱা বুলি দাবী কৰিব পাৰে কিন্তু প্ৰকৃত সত্যটো উলিয়াবলৈ এজন উচ্চতম ন্যায়ালয়ৰ ন্যায়াধীশৰ নেতৃত্বত তদন্ত কমিটি গঠন কৰাটো অতি জৰুৰী। ইয়াৰ উপৰিও ২০২৮ চনত অনুষ্ঠিত হ’বলগীয়া কুম্ভ মেলাৰ নামতো চৰকাৰখনে কোটি কোটি টকাৰ দুৰ্নীতি কৰা বুলি বিৰোধী দলপতিগৰাকীয়ে গুৰুতৰ অভিযোগ উত্থাপন কৰে।
ৰাজ্যিক কংগ্ৰেছৰ সভাপতি জিতু পাটোৱাৰীয়েও চৰকাৰক প্ৰশ্ন কৰি কয় যে মুখ্যমন্ত্ৰীৰ পৰিয়ালে মাটি কিনা অঞ্চলসমূহৰ ভূমি ব্যৱহাৰ পৰিৱৰ্তনৰ চৰকাৰী অনুমতিৰ তালিকা ৰাজহুৱা কৰা হ’বনে নাই। ইফালে কংগ্ৰেছৰ ৰাষ্ট্ৰীয় সাধাৰণ সম্পাদক জয়ৰাম ৰমেশে এই ঘটনাক লৈ বিজেপিক তীব্ৰ সমালোচনা কৰে। তেওঁ কয় যে মধ্যপ্ৰদেশৰ চৰকাৰখন এতিয়া লুণ্ঠনৰ ইঞ্জিনলৈ পৰিণত হৈছে আৰু স্বয়ং মুখ্যমন্ত্ৰী ইয়াৰ মূল চালক। ইয়াৰ লগতে তেওঁ ইংগিত দিয়ে যে বিজেপি দলৰ আভ্যন্তৰীণ সংঘাতৰ বাবেই এই গোপন চৰকাৰী তথ্যসমূহ এতিয়া ৰাজহুৱা হৈ পৰিছে।
