গুৱাহাটী মহানগৰীৰ সুৰক্ষা আৰু নিৰাপত্তা সম্পৰ্কত পৰ্যালোচনা কৰাৰ উদ্দেশ্যৰে মুখ্য মন্ত্ৰী সৰ্বানন্দ সোণোৱালৰ নেতৃত্বত আজি ব্ৰহ্মপুত্ৰ ৰাজ্যিক অতিথিশালাত এখন উচ্চ পৰ্যায়ৰ বৈঠক অনুষ্ঠিত হয়। বৈঠকত মহানগৰীৰ সুৰক্ষাৰ প্ৰতিটো দিশ পুংখানুপুংখভাৱে আলোচনা কৰা হয়।
মুখ্য মন্ত্ৰীয়ে মহানগৰ আৰক্ষী আয়ুক্তৰ অধীনত প্ৰতিখন আৰক্ষী জিলাত অপৰাধজনিত কাৰ্যকলাপ প্ৰতিহত কৰাৰ বাবে সুকীয়া-সুকীয়া কৌশল অৱলম্বন কৰাৰ ওপৰতো গুৰুত্ব আৰোপ কৰে যাতে প্ৰতিগৰাকী নাগৰিকে এক সুৰক্ষিত বাতাবৰণত জীৱন নিৰ্বাহ কৰিব পাৰে।
বৈঠকত মুখ্য মন্ত্ৰী সোণোৱালে কয় যে মহানগৰবাসীৰ জীৱন আৰু সম্পত্তি সুৰক্ষাৰ ক্ষেত্ৰত আৰক্ষী প্ৰশাসনে দৃঢ় ব্যৱস্থা গ্ৰহণ কৰিব লাগিব যাতে কোনো অপৰাধ জনিত ঘটনা সংঘটিত হ’ব নোৱাৰে।
আনহাতে, মুখ্য মন্ত্ৰীয়ে অপৰাধজনিত ঘটনা ৰোধ কৰাৰ বাবে আৰক্ষী প্ৰশাসনে যথোপপুক্ত ব্যৱস্থা গ্ৰহণ কৰিব লাগিব বুলি উল্লেখ কৰাৰ লগতে ইতিমধ্যে যিবোৰ ঘটনা সংঘটিত হৈছে তাৰ আঁৰত জড়িত থকা দুৰ্স্কৃতিকাৰীসকলক শীঘ্ৰে কৰায়ত্ত কৰাবলৈও মুখ্য মন্ত্ৰীয়ে নিৰ্দেশ দিয়ে।
তদুপৰি নৈশ মহানগৰীৰ নিৰাপত্তা আৰু অধিক শক্তিশালী কৰিব লাগিব বুলি মন্তব্য কৰি সোণোৱালে জনসাধাৰণৰ জীৱন আৰু সা-সম্পত্তি সুৰক্ষিত কৰি ৰাখিবলৈ নিৰীক্ষণ ব্যৱস্থাটো অধিক শক্তিশালী কৰিবলৈ আৰক্ষী-প্ৰশাসনক নিৰ্দেশ দিয়ে।
মুখ্য মন্ত্ৰীয়ে আৰক্ষী সঞ্চালক প্ৰধানক কোনো অপৰাধ জনিত ঘটনা যাতে সংঘটিত হ’ব নোৱাৰে তাৰ বাবে শক্তিশালী নিৰাপত্তা বেষ্টনি এটা গঢ়ি তোলাৰ বাবে নিৰ্দেশ দিয়ে। আকৌ চাইবাৰ অপৰাধ ভালদৰে মোকাবিলা কৰাৰ ক্ষেত্ৰত আৰক্ষী প্ৰশাসনক সৰ্বদা সচেষ্ট ভূমিকা গ্ৰহণ কৰিবলৈ বৈঠকৰ সময়ত কোৱা হয়। শিশু আৰু মহিলাৰ বিৰুদ্ধে সংঘটিত অপৰাধমূলক ঘটনাৰ সৈতে জড়িত অপৰাধীৰ বিৰুদ্ধে দ্ৰুত আৰু দায়বদ্ধ পদক্ষেপ গ্ৰহণ কৰাৰ বাবেও মুখ্য মন্ত্ৰীয়ে নিৰ্দেশ দিয়ে।
আজিৰ বৈঠকত মুখ্য মন্ত্ৰীৰ মিডিয়া উপদেষ্টা হৃষীকেশ গোস্বামী, আইন উপদেষ্টা শান্তনু ভৰালী, নিৰাপত্তা উপদেষ্টা ৰঞ্জিত কুমাৰ পাচনন্দা, আৰক্ষী সঞ্চালক প্ৰধান কুলধৰ শইকীয়া, গৃহ আৰু ৰাজনৈতিক বিভাগৰ অতিৰিক্ত মুখ্য সচিব কুমাৰ সঞ্জয় কৃষ্ণ, মুখ্য মন্ত্ৰীৰ প্ৰধান সচিব সঞ্জয় লোহিয়া, গৃহ আৰু ৰাজনৈতিক বিভাগৰ আয়ুক্ত সচিব আশুতোষ অগ্নিহোত্ৰী, মহানগৰ আৰক্ষী আয়ুক্ত দীপক কুমাৰৰ লগতে অন্যান্য শীৰ্ষ বিষয়াসকল উপস্থিত থাকে।