দেশৰ ৭৪ তম স্বাধীনতা দিৱসত ৰাজ্যবাসীক সম্বোধন কৰে মুখ্য মন্ত্ৰী সৰ্বানন্দ সোণোৱালে।
জজ খেলপথাৰত ৰাজ্য চৰকাৰে অনুষ্ঠিত কৰা স্বাধীনতা দিৱসৰ কাৰ্য্যসূচীত অংশগ্ৰহণ কৰি ৰাজ্যবাসীক উদ্দেশ্যি দিয়া ভাষণত কেইবাটাও গুৰুত্বপূৰ্ণ ঘোষণা কৰে।
বিশেষকৈ ৰাজ্যৰ কৃষিক্ষেত্ৰৰ উন্নয়নৰ প্ৰতি লক্ষ্য ৰাখি কেতবোৰ আঁচনি ৰূপায়ণৰ কথা ঘোষণা কৰে মুখ্য মন্ত্ৰীগৰাকীয়ে।
তেওঁ কয়, ‘বায়’গিক প্ৰযোজনা হিচাপে ধেমাজি আৰু বাস্কা জিলাত ৰাইচ ক্লাষ্টাৰ স্থাপন কৰিবলৈ সিদ্ধান্ত গ্ৰহণ কৰা হৈছে।‘
ৰাজ্যৰ কৃষক উৎপাদিত সামগ্ৰীৰ বিপৰীতে ৰাজ্য চৰকাৰৰ পৰা নূন্যতম মূল্য লাভ কৰে সেয়া নিশ্চিত কৰিবলৈ জিলা পৰ্য্যায়ত ধান ক্ৰয় কৰিবলৈ ব্যৱস্থা গ্ৰহণ কৰিছে বুলিও তেওঁ জানিবলৈ দিয়ে।
পথাৰৰ ধান কৃষকৰ পৰা গ্ৰাহকৰ হাতলৈ লৈ যাব পৰাকৈ সহায়ক হোৱাকৈ ৰাজ্যৰ বিভিন্ন প্ৰান্তত অসম চৰকাৰে ২২০ টা ধান বনা কল স্থাপন কৰিবলৈ সাহায্য আগবঢ়াব বুলি ঘোষণা কৰি মুখ্য মন্ত্ৰীয়ে লগতে কল সমূহ স্থাপনৰ বাবে ইচ্ছুক উদ্যোগ, সমবায় গোটক চৰকাৰে ৩০ শতাংশ ৰাজ সাহায্য আগবঢ়াব বুলিও উল্লেখ কৰে।
আনহাতে, পথাৰ আৰু বজাৰৰ মাজত সংযোগ অতি সুদৃঢ় কৰিবলৈ থলুৱা যুৱক আৰু আত্ম সহায়ক গোটক ৰাজ সাহায্যযুক্ত ১০০০ খন মিনি ট্ৰাক প্ৰদান কৰাৰ সিদ্ধান্ত গ্ৰহণ কৰাৰ কথাও ঘোষণা কৰে মুখ্য মন্ত্ৰীয়ে।
জৈৱিক হাব গঠনৰ বাবে প্ৰধান মন্ত্ৰীয়ে জনোৱা আহ্বানৰ প্ৰতি সঁহাৰি জনাই ৰাজ্য চৰকাৰে ৭৫ বিঘা ভুমি চিনাক্ত কৰিছে বুলি জনাই তেওঁ লগতে কয়, ‘ৰাজ্য চৰকাৰে বিশ্বনাথ জিলাত এটা চেন্টাৰ অৱ এক্সিলেঞ্চ ফৰ অ’ৰগেনিক এগ্রিকালচাৰ স্থাপন কৰিব।‘
ইপিনে, ৰাজ্যৰ জিলা দুগ্ধ সমবায় সমূহত শক্তিশালীভাৱে গঢ় দিবলৈ পদক্ষেপ হাতত লৈছে বুলি দাবী জনাই তেওঁ লগতে কয়, ‘ৰাজ্যৰ সকলো জিলাত একোটাকৈ দুগ্ধ সংসাধন উদ্যোগ স্থাপনৰ সিদ্ধান্ত গ্ৰহণ কৰিছে। প্ৰথম পৰ্য্যায়ত প্ৰায়োগিক পৰিযোজনা হিচাপে মৰিগাঁও, শোণিতপুৰ আৰু বজালী জিলাত দুগ্ধ সংসাধন স্থাপন কৰা হব।‘
ইয়াৰ লগতে প্ৰতিখন জিলাতে কৃষি সামগ্ৰী বিজ্ঞানসন্মতভাৱে সংৰক্ষণ কৰিবলৈ শীতলীকৰণ ভঁৰালো আৰু প্ৰতিখন জিলাতে পশুখাদ্য মিল স্থাপন হ’ব বুলি মুখ্য মন্ত্ৰীয়ে ঘোষণা কৰে।
ৰাজ্যত মাকৈ খেতি অধিক জনপ্ৰিয় কৰিবলৈ অসম কৃষি বিশ্ববিদ্যালয়ৰ সহযোগত শীঘ্ৰে এখন নতুন কাৰ্য্যসূচী গ্ৰহণ কৰিবলৈ সিদ্ধান্ত লৈছে।
ৰাজ্যৰ সকলো বিল-জলাশয় চিনাক্তকৰণ আৰু জৰীপ কৰি আত্ম সহায়ক গোটখিনিক মৎস পালনৰ সুযোগ প্ৰদানৰ সিদ্ধান্ত গ্ৰহণ কৰা হৈছে বুলি তেওঁ জনায়।
তদুপৰি, গোলাঘাটত আসাম বেম্ব’ এণ্ড কেন পলিচি প্ৰণয়ন আৰু লগতে আন্তঃৰাষ্ট্ৰীয় বাণিজ্যিক কেন্দ্ৰ স্থাপন কৰা হ’ব বুলি তেওঁ উল্লেখ কৰে।
তদুপৰি, ৰাজ্যৰ ১৩৭ খন সত্ৰ দেৱালয়ক বছৰি ৩৬০ লাখকৈ টকা প্ৰদান কৰাৰ কথা ঘোষণা কৰে সৰ্বানন্দ সোণোৱালে।
ইপিনে, গোৱালপাৰা জিলাত বসবাস কৰা কোচ-ৰাজবংশী লোকসকলৰ বাবেও কমতাপুৰ স্বায়ত্বশাসিত পৰিষদ গঠনৰ ব্যৱস্থা গ্ৰহণ কৰা হৈছে। মৰান আৰু মটক জনগোষ্ঠীৰ বাবেও দুখন সুকীয়া স্বায়ত্ব শাসিত পৰিষদ গঠনৰ কথা ঘোষণা।
লগতে টাই আহোম মৰাণ মটক আৰু চুতীয়া জনগোষ্ঠীৰ সৰ্বাঙ্গীন বিকাশৰ বাবে এককালীন পুজিঁ আবন্টনৰ কথা ঘোষণা কৰে মুখ্যমন্ত্ৰী সৰ্বানন্দ সোণোৱালে।
তাৎপৰ্যপূৰ্ণভাৱে মুখ্য মন্ত্ৰীয়ে অসম চুক্তিৰ প্ৰতিটো দফা ৰূপায়নেৰে বিদেশী মুক্ত অসম গঢ়াৰ বাবে চৰকাৰে আন্তৰিকতাৰে কাম কৰি অহা বুলিও দোহাৰে।
