শনিবাৰে অসম বিধানসভাৰ চলিত বাজেট অধিৱেশনৰ অন্তিম দিনটোত মুখ্যমন্ত্ৰী সৰ্বানন্দ সোণোৱালক যথেষ্ট সৰৱ হোৱা দেখা গ’ল।
বিধানসভাত বক্তৱ্য ৰাখি মুখ্যমন্ত্ৰী সোণোৱালে কয়, ‘’আমাৰ চৰকাৰৰ দিনত বৰাক-ব্ৰহ্মপুত্ৰ উপত্যকাৰ সকলোৱে সম মৰ্যাদা পাইছে ৷ আপোনালোকে বেজাৰ কৰিব নালাগে, অহাবাৰো আমাৰেই চৰকাৰ হ’ব।‘’
শনিবাৰে অসম বিধানসভাৰ নতুন ভৱনত আৰম্ভ হোৱা অধিৱেশনৰ অন্তিম দিনৰ কাৰ্যসূচীত মুখ্যমন্ত্ৰী সোণোৱালে চৰকাৰৰ পাঁচ বছৰীয়া কাৰ্যকালৰ এক খতিয়ান দাঙি ধৰে।
কোভিড-১৯ৰ পৰিস্থিতিৰ বাবে চৰকাৰখনে ২০২০ৰ মাৰ্চৰ পৰা ডিচেম্বৰলৈকে কাম কৰিব নোৱাৰাৰ কথা স্বীকাৰ কৰি মুখ্যমন্ত্ৰীয়ে কয় যে চৰকাৰখনে প্ৰকৃতাৰ্থত চাৰে তিনি বছৰহে কাম কৰাৰ সুবিধা পালে।
মুখ্যমন্ত্ৰী সোণোৱালে ৰাজ্যৰ প্ৰতিখন জিলাকেই তেওঁৰ ভ্ৰমণসূচীত অন্তৰ্ভুক্ত কৰাৰ কথাও উল্লেখ কৰে। মানকাচৰতো নিশা কটোৱাৰ কথা উল্লেখ কৰি তেওঁ লগতে কয় যে এতিয়া কোনো বিধায়কে আহি ক’ব নোৱাৰে যে ‘মই কোনো বিধায়কক অৱহেলা কৰিছো।‘’
দুৰ্নীতি সন্দৰ্ভত মুখ্যমন্ত্ৰীগৰাকীয়ে দুৰ্নীতিমুক্ত অসম কেৱল শ্লোগান হ’ব নোৱাৰে বুলি উল্লেখ কৰি তাৰ বাবে নিৰন্তৰ কাম কৰিব লাগিব বুলি দোহাৰে।
মুখ্যমন্ত্ৰীয়ে বিশ্ব বিনিয়োগ সন্মিলন আয়োজনৰ ফলত অসম লাভান্বিত হোৱা বুলিও উল্লেখ কৰে।
এইখন চৰকাৰৰ দিনত বনাঞ্চলৰ সংখ্যা বৃদ্ধি পোৱা বুলি দাবী কৰি সোণোৱালে অভিভাৱকসকলক সন্তানৰ জন্মদিনত একোজোপাকৈ গছ পুলি উপহাৰ দিবলৈ আহ্বান জনায়।
