ক’ৰ’নাৰ সংক্ৰমণ ৰোধৰ সমান্তৰালভাৱে ৰাজ্যৰ অৰ্থনীতি ধৰি ৰখাৰ অৰ্থে বিভিন্ন কাম-কাজ আৰম্ভ কৰা সন্দৰ্ভত আজি কামৰূপ মহানগৰ জিলা উপায়ুক্তৰ কাৰ্য্যালয়ত মুখ্য মন্ত্ৰী সৰ্বানন্দ সোণোৱালে এখন বৈঠক অনুষ্ঠিত কৰে।
বৈঠকৰ অন্তত মুখ্য মন্ত্ৰী সোণোৱালে সংবাদ মাধ্যমক সম্বোধন কৰি বৈঠকত গ্ৰহণ কৰা বিভিন্ন পদক্ষেপ সন্দৰ্ভত অৱগত কৰে।
মুখ্য মন্ত্ৰী সোণোৱালে কেন্দ্ৰীয় চৰকাৰৰ নিৰ্দেশনা অনুসৰি অসমৰ বিভিন্ন ক্ষেত্ৰত কাম-কাজ আৰম্ভ কৰা হৈছে বুলি উল্লেখ কৰে।
অসমৰ ৰাইজৰ স্বাৰ্থৰ প্ৰতি লক্ষ্য ৰাখি চাহ উদ্যোগ আৰু খেতিপথাৰত সামাজিক দূৰত্ব বজাই ৰাখি যাতে কাম আগবঢ়াই নিব পাৰে সেয়া সুনিশ্চিত কৰাৰ বাবে ব্যৱস্থা গ্ৰহণ কৰিবলৈ নিৰ্দেশ দিয়া হৈছে বুলিও সোণোৱালে কয়।
অসমৰ কেইবাহাজাৰ চাহ বাগিচাৰ চৰ্দাৰ আৰু লাইন চকীদাৰ লগত আলোচনা কৰি প্ৰতি গৰাকী শ্ৰমিকক ক’ৰ’নাৰ সংক্ৰমণৰ পৰা যাতে ৰক্ষা কৰিব পৰা যায় তাৰ ব্যৱস্থা গ্ৰহণ কৰা হৈছে বুলিও মুখ্য মন্ত্ৰীয়ে জানিবলৈ দিয়ে।
আনহাতে, চৰকাৰী সাহায্য প্ৰদানক লৈ কিছুমান অভিযোগ আহিছে বুলি উল্লেখ কৰি সোণোৱালে এই সম্পৰ্কে গাঁওবুঢ়া সকলৰ সৈতে মত বিনিময় কৰা হৈছে বুলি কয়।
‘‘চৰকাৰৰ লক্ষ্য হৈছে ৰাজ্যৰ কোনো লোক যাতে ভোকত থাকিব লগীয়া নহয়, অসৎ অভিপ্ৰায়ৰ লোক সকলে যাতে শীঘ্ৰেই শাস্তি পাই তাৰ ব্যৱস্থা কৰা হ’ব,’’ সোণোৱালৰ মন্তব্য।
তদুপৰি, আজি বৈঠকত কামৰূপ (মেট্ৰ’) জিলাৰ পৰিস্থিতি সন্দৰ্ভতো পৰ্যালোচনা কৰা হয় বুলি সোণোৱালে জানিবলৈ দিয়ে।
পৰ্যালোচনা বৈঠকত মন্ত্ৰী সিদ্ধাৰ্থ ভট্টাচাৰ্য্য বিধায়ক অতুল বৰা (জেষ্ঠ) আৰু অগপৰ বিধায়ক ৰমেন্দ্ৰ নাৰায়ন কলিতা উপস্থিত থাকে।
বৈঠকত কামৰূপ(মেট্ৰ’) জিলা প্ৰশাসনক ২৪ ঘণ্টাই সক্ৰিয় হৈ থকাৰ নিৰ্দেশ দিয়া হয়।
সংবাদ মাধ্যমৰ আগত মুখ্য মন্ত্ৰী সোণোৱালে ইছলামধৰ্মী লোক সকলকো ৰমজান মাহ উপলক্ষে ঘৰতে নামাজ পঢ়াৰ বাবে আহ্বান জনায়।
